യേശു മാമോദീസ സ്വീകരിച്ചിടത്ത് മറഡോണയ്ക്കും മാമോദീസ
അമാന്: യേശുക്രിസ്തു മാമോദീസ സ്വീകരിച്ച അതേ സ്ഥലത്തുനിന്നും ഫുട്ബോള് ഇതിഹാസം ഡീഗോ മറഡോണയും മാമോദീസ സ്വീകരിച്ചു. ഫിഫ പ്രസിഡന്റ് സ്ഥാനത്തേക്ക് മത്സരിക്കുന്ന ജോര്ദന് രാജകുമാരന് അലി ബിന് അല് ഹുസൈന്റെ സ്ഥാനാര്ഥിത്വം പ്രഖ്യാപിക്കാന് ജോര്ദ്ദാനിലെത്തിയപ്പോഴായിരുന്നു ചടങ്ങ് സംഘടിപ്പിക്കപ്പെട്ടത്.
കാമുകി റോസിയോ ഒലീവിയയും മറഡോണയ്ക്കൊപ്പമുണ്ടായിരുന്നു. യേശു സ്നാപക യോഹന്നാനില് നിന്നും മാമോദീസ സ്വീകരിച്ചെന്ന് കരുതപ്പെടുന്ന ജോര്ദാന് നദിയില് വെച്ചായിരുന്നു ചടങ്ങ്. ഇതേ സ്ഥലത്തുവെച്ചാണ് യേശു മാമോദീസ സ്വീകരിച്ചതെന്നാണ് ക്രിസ്തുമത വിശ്വാസികള് കരുതുന്നത്.
ഫിഫ അധ്യക്ഷന് സ്ഥാനത്തേക്ക് മത്സരിക്കുന്ന അലി ബിന് അല് ഹുസൈന് മറഡോണയുടെ അടുത്ത സുഹൃത്തുക്കളിലൊരാളാണ്. ഇദ്ദേഹത്തിന്റെ നിര്ദ്ദേശപ്രകാരമാണ് ചടങ്ങിനുള്ള സൗകര്യം ഒരുക്കിയത്. നിലവിലെ ഫിഫ അധ്യക്ഷന് സെപ് ബ്ലാറ്റര് ഫിഫയെ അരാജകത്വത്തിലേക്ക് നയിച്ചുവെന്ന് കഴിഞ്ഞദിവസം മറഡോണ ആരോപിച്ചിരുന്നു.
അലി ബിന് അല് ഹുസൈനെ കൂടാതെ ലൂയി ഫിഗോ, സെപ് ബ്ലാറ്റര്, മൈക്കല് വാന് പ്രാഗ് എന്നിവരാണ് ഫിഫ പ്രസിഡന്റ് സ്ഥാനത്തേക്ക് മത്സരിക്കുന്നത്. തന്റെ സുഹൃത്തിനുവേണ്ടി മറഡോണ നേരിട്ട് വോട്ടഭ്യര്ത്ഥിച്ചു തുടങ്ങിയെന്നാണ് റിപ്പോര്ട്ട്. സെപ് ബ്ലാറ്ററെ ഏതുവിധേനയും തോല്പിക്കുമെന്ന് മറഡോണ പ്രഖ്യാപിച്ചുകഴിഞ്ഞു.