കാറിനുളളില് തണുത്തുറഞ്ഞ് സ്ത്രീ! ചില്ലുപൊട്ടിച്ച് പുറത്തെടുത്ത പോലീസ് ഞെട്ടി
കാറിനുള്ളില് തണുത്തു മരവിച്ചിരുന്ന വൃദ്ധയെ രക്ഷിക്കാന് പോലീസ് കാര് തകര്ത്തു. എന്നാല് അത് വൃദ്ധ ആയിരുന്നില്ല, ബൊമ്മയാണെന്ന് പോലീസ്.
ന്യൂയോര്ക്ക് : കാറിനുള്ളില് തണുത്തുറഞ്ഞിരിക്കുന്ന വൃദ്ധയെ രക്ഷിക്കുന്നതിനായി പോലീസ് കാറിന്റെ ജനല് തല്ലി തകര്ത്തു. എന്നാല് പിന്നെ സംഭവിച്ചതെന്തെന്നറിയണ്ടേ? ന്യൂയോര്ക്കിലെ ഹഡ്സനിലാണ് സംഭവം നടന്നത്. വെള്ളിയാഴ്ച രാവിലെ പോലീസ് സ്റ്റേഷനില് ഒരു ഫോണ് സന്ദേശമെത്തി. സീറ്റ് ബെല്റ്റിട്ട നിലയില് കാറിനുള്ളില് വൃദ്ധ തണുത്ത് മരവിച്ചിരിക്കുന്നുവെന്നായിരുന്നു സന്ദേശം.
രക്ഷാപ്രവര്ത്തനത്തിനായി പോലീസ് സ്ഥലത്തേക്ക് പാഞ്ഞു. മഞ്ഞുമൂടിയ നിലയില് കാറും അതിനുള്ളില് തണുത്ത് മരവിച്ച് മരിച്ച നിലയില് വൃദ്ധയെയും കണ്ടു. ഓക്സിജന് മാസ്ക് ധരിച്ച് മുന്നിലെ സീറ്റില് ഇരിക്കുകയായിരുന്നു വൃദ്ധ. ഡോര് ഉള്ളില് നിന്ന് ലോക്ക് ചെയ്തിട്ടുമുണ്ട്. പിന്നെ ഒന്നും ചിന്തിക്കാതെ പോലീസ് കാറിന്റെ ചില്ല് തകര്ത്തു.
പിന്നെ സംഭവിച്ചത് പോലീസിനെ പോലും ചിരിപ്പിച്ചുപോയി. കാറിനുള്ളില് ഉണ്ടായിരുന്നത് മനുഷ്യനെന്നു തോന്നിപ്പിക്കുന്ന ബൊമ്മയായിരുന്നു. നന്നായി വസ്ത്രം ധരിച്ച, ഷൂസൊക്കെ ഇട്ട ബൊമ്മയെ കണ്ടാല് ശരിക്കും വൃദ്ധയാണെന്നേ തോന്നൂ എന്നാണ് പോലീസ് പറയുന്നത്. എന്തായാലും മനുഷ്യനാവാതിരുന്നതില് പോലീസും ആശ്വസിക്കുന്നുണ്ട്.
എന്നാല് ഫോണ്വിളിച്ച ആളെ പോലീസ് കണ്ടെത്തി. കാറിന്റെ ഉടമതന്നെയാണ് പോലീസിനെ അറിയിച്ചത്. എന്നാല് കബളിക്കാന് വേണ്ടി ആയിരുന്നില്ലെന്നും മെഡിക്കല് ട്രെയിനിങിന്റെ ഭാഗമായിട്ടാണ് ഇങ്ങനെ ചെയ്തതെന്നും ഇയാള് പറഞ്ഞു. എങ്കിലും ഇയാള്ക്കെതിരെ കേസെടുത്തിട്ടുണ്ട്.