ചൈനയില്‍ എവിടെ കുഴിച്ചാലും സ്വർണമോ? വീണ്ടും കണ്ടെത്തി 1000 ടണ്‍, മൂന്ന് മാസത്തിനിടെ 2000 ടണ്‍

ആഗോള തലത്തില്‍ സ്വർണ വില വലിയ തോതില്‍ മുന്നേറിക്കൊണ്ടിരിക്കുമ്പോള്‍ ഇന്ത്യ അടക്കമുള്ള രാജ്യങ്ങള്‍ സ്വന്തമായി സ്വർണം പര്യവേക്ഷണം ചെയ്യാനുള്ള തീവ്രശ്രമത്തിലാണ്. ഒഡീഷയിലും യുപിയിലും പുതിയ സ്വർണ നിക്ഷേപങ്ങള്‍ കണ്ടെത്തിയിട്ടുണ്ടെങ്കിലും ഖനനത്തിന്റെ പ്രാഥമിക ഘട്ടത്തിലേക്ക് പോലും കടന്നിട്ടില്ല. കർണാടകയിലെ ഹട്ടിയില്‍ നിന്ന് മാത്രമാണ് ഇന്ത്യയില്‍ ഇപ്പോള്‍ സ്വർണ്ണ ഖനനം നടക്കുന്നത്. എന്നാല്‍ ഇന്ത്യയുടെ അയല്‍ രാജ്യം കൂടിയായ ചൈനയെ സംബന്ധിച്ചാകട്ടെ കഴിഞ്ഞ മൂന്ന് മാസത്തിനുള്ളില്‍ മാത്രം 2000 ടൺ സ്വർണ്ണം ശേഖരം കണ്ടെത്തിയെന്നാണ് അവർ അവകാശപ്പെടുന്നത്.

3D സാങ്കേതികവിദ്യ ഉപയോഗിച്ചാണ് ചൈന പുതിയ സ്വർണ നിക്ഷേപം കണ്ടെത്തിയിരിക്കുന്നത് എന്നതാണ് ശ്രദ്ധേയം. പുതുതായി കണ്ടെത്തിയ ഈ സ്വർണ്ണ ഖനികളിൽ മുതിർന്ന ചൈനീസ് ഉദ്യോഗസ്ഥർ ഇപ്പോൾ സമഗ്രമായ പരിശോധനകൾ നടത്തി വരികയാണെന്നും അന്തർദേശീയ മാധ്യമങ്ങള്‍ റിപ്പോർട്ട് ചെയ്യുന്നു.

സൗത്ത് ചൈന മോർണിംഗ് പോസ്റ്റ് റിപ്പോർട്ട് ചെയ്യുന്നത് പ്രകാരം 2024 നവംബറിൽ ഹുനാൻ പ്രവിശ്യയിലാണ് അടുത്ത കാലത്ത് ആദ്യമായി ഏറ്റവും വലിയ സ്വർണ ശേഖരം കണ്ടെത്തിയത്. 1000 ടൺ സ്വർണ്ണത്തിന്റെ ശേഖരം ഇവിടെയുണ്ടെന്ന് ചൈനീസ് ശാസ്ത്രജ്ഞന്മാർ അവകാശപ്പെടുന്നു. ഇതിന് പിന്നാലെയാണ് അടുത്തിടെ 1000 ടണ്‍ സ്വർണ ശേഖരം കൂടെ കണ്ടെത്തിയതായുള്ള വിവരം പുറത്ത് വരുന്നത്.

3 കിലോമീറ്ററിലധികം മുതൽ 2.5 കിലോമീറ്റർ വരെ വിസ്തൃതിയിലാണ് പുതിയ സ്വർണ ശേഖരം വ്യാപിച്ച് കിടക്കുന്നത്. പര്യവേക്ഷണം പുർത്തിയാക്കിയ ശേഷം വിശദമായ വിവരങ്ങൾ മാധ്യമങ്ങളുമായി പങ്കിടുമെന്ന് ചൈനീസ് സർക്കാരും സ്ഥിരീകരിച്ചിട്ടുണ്ട്. 3D ജിയോളജിക്കൽ മോഡലിംഗ് സാങ്കേതികവിദ്യയുടെ സഹായത്തോടെ ആഴത്തിലുള്ള ഡ്രില്ലിംഗ് ഉപകരണങ്ങള്‍ ഉപയോഗിച്ചാണ് ഭൂമിയുടെ അടിത്തട്ടിലുള്ള സ്വർണ നിക്ഷേപം കണ്ടെത്തിയിരിക്കുന്നത്. 2023 നവംബറിൽ ഹുനാനിൽ നടന്ന കണ്ടെത്തലിലും ഇതേ സാങ്കേതികവിദ്യ നിർണായക പങ്കുവഹിച്ചിരുന്നു.

അവകാശവാദങ്ങൾ ശരിയാകുകയാണെങ്കില്‍, ലോകത്തിലെ ഏറ്റവും വലിയ സ്വർണ്ണ കണ്ടെത്തലുകളിൽ ഒന്നായിരിക്കാം ചൈനയിലേത്. ഇതോടെ സ്വർണ്ണ ഉൽപാദനത്തിൽ ചൈനയുടെ ആധിപത്യം കൂടുതൽ ശക്തമാക്കുകയും
ആഗോള സ്വർണ്ണ വിപണിയിൽ വലിയ സ്വാധീനം ചെലുത്തിയേക്കാമെന്ന വിലയിരുത്തലുകളും ശക്തമാണ്. നിലവില്‍ സ്വർണ്ണത്തിന്റെ വാർഷിക ഉല്‍പ്പാദനത്തില്‍ ഖനന ഭീമന്മാരായ ദക്ഷിണാഫ്രിക്ക, ഓസ്‌ട്രേലിയ, റഷ്യ എന്നിവരേക്കാള്‍ മുന്നിലാണ് ചൈന. എന്നാല്‍ സ്ഥിരീകരിക്കപ്പെട്ട സ്വർണ നിക്ഷേപത്തിന്റെ കാര്യത്തില്‍ ചൈന ഇപ്പോഴും പിന്നിലാണ്.