'തിളങ്ങുന്നതും മികച്ചതുമായ ഭാവിയിലേക്ക് ഉറ്റ് നോക്കുന്ന സന്തോഷവാനായ വയസ്സൻ', ട്രംപിനെ ട്രോളി ഗ്രേറ്റ

Updated: Thursday, January 21, 2021, 12:19 [IST]

വാഷിംഗ്ടണ്‍: ഡൊണാള്‍ഡ് ട്രംപ് വൈറ്റ് ഹൗസ് വിട്ടതിന് പിന്നാലെ പ്രതികരണവുമായി പരിസ്ഥിതി ആക്ടിവിസ്റ്റ് ഗ്രേറ്റ തുന്‍ബെര്‍ഗ്. ജോ ബൈഡന്‍ അമേരിക്കയുടെ പുതിയ പ്രസിഡണ്ടായി സ്ഥാനമേല്‍ക്കുന്ന ചടങ്ങിന് തൊട്ട് മുന്‍പാണ് ഡൊണാള്‍ഡ് ട്രംപ് വൈറ്റ് ഹൗസിന്റെ പടിയിറങ്ങിയത്. വൈറ്റ് ഹൗസില്‍ നിന്നിറങ്ങി വിമാനത്തില്‍ കയറുന്നതിന് തൊട്ട് മുന്‍പായി തന്റെ അനുയായികളെ അഭിവാദ്യം ചെയ്യുന്ന ഡൊണാള്‍ഡ് ട്രംപിന്റെ ചിത്രം പങ്കുവെച്ചാണ് ഗ്രേറ്റ തുന്‍ബെര്‍ഗ് പരിഹാസവുമായി രംഗത്ത് വന്നിരിക്കുന്നത്.

തിളങ്ങുന്നതും മികച്ചതുമായ ഭാവിയിലേക്ക് ഉറ്റ് നോക്കുന്ന സന്തോഷവാനായ ഒരു വയസ്സനെ പോലുണ്ട്. കാണുമ്പോള്‍ സന്തോഷം തോന്നുന്നു എന്നാണ് ഗ്രേറ്റ തുന്‍ബെര്‍ഗ് ട്വീറ്റ് ചെയ്തിരിക്കുന്നത്. നേരത്തെ മുതല്‍ക്കേ തന്നെ ഡൊണാള്‍ഡ് ട്രംപും ഗ്രേറ്റയും വാക്‌പോരില്‍ ഏര്‍പ്പെട്ടിട്ടുളളതാണ്. ഒരിക്കല്‍ ട്രംപ് ഗ്രേറ്റയെ പരിഹസിച്ച അതേ രൂപത്തിലാണ് ഇപ്പോള്‍ ഗ്രേറ്റ തിരിച്ചടിച്ചിരിക്കുന്നത്.

2019ലെ ഐക്യരാഷ്ട്ര സഭ കാലാവസ്ഥാ ഉച്ചകോടിയില്‍ ഡൊണാള്‍ഡ് ട്രംപിനെ രൂക്ഷമായി വിമര്‍ശിച്ച് ഗ്രേറ്റ തുന്‍ബെര്‍ഗ് നടത്തിയ പ്രസംഗം ലോകശ്രദ്ധ നേടിയിരുന്നു. അന്ന് ട്രംപ് പ്രതികരിച്ചത് ഇങ്ങനെ ആയിരുന്നു. ''തിളങ്ങുന്നതും മികച്ചതുമായ ഭാവിയിലേക്ക് ഉറ്റ് നോക്കുന്ന സന്തോഷവതിയായ ഒരു പെണ്‍കുട്ടിയെ പോലുണ്ട്. കാണുമ്പോള്‍ സന്തോഷം തോന്നുന്നു''. ഇതേ വാക്കുകള്‍ കടമെടുത്താണ് ഗ്രേറ്റ ഇപ്പോള്‍ പ്രതികരിച്ചിരിക്കുന്നത്.