ടെക്‌സാസിലെ പള്ളിയില്‍ വെടിവെപ്പ്, 27 പേര്‍ കൊല്ലപ്പെട്ടു

ടെക്‌സാസ്: അമേരിക്കയിലെ ടെക്‌സാസിലെ പള്ളിയിലുണ്ടായ വെടിവെപ്പില്‍ 27 പേര്‍ കൊല്ലപ്പെട്ടതായി റിപ്പോര്‍ട്ട്. 20 പേര്‍ക്ക് പരിക്കേറ്റിട്ടുണ്ട്. പ്രാര്‍ത്ഥന നടന്നുകൊണ്ടിരിക്കെ പള്ളിയിലെത്തിയ തോക്കുധാരി വിവേചനരഹിതമായി വെടിവെയ്ക്കുകയായിരുന്നു. വില്‍സണ്‍ കൗണ്ടിയിലെ ബാപ്റ്റിസ്റ്റ് പള്ളിയിലാണ് സംഭവം. ആളുകളെ വെടിവെച്ചു കൊന്നതിനു ശേഷം അക്രമി സ്വയം വെടിവെച്ചു മരിച്ചു.

ഞായറാഴ്ച ഉച്ചയ്ക്ക് 11.30ഓടെയാണ് ആക്രമണമുണ്ടായത്. ടെക്‌സാസില്‍ ഇതുവരെയുണ്ടായതില്‍ വെച്ചേറ്റവും വലിയ ആക്രമണമാണിതെന്ന് ടെക്‌സാസ് ഗവര്‍ണര്‍ ഗ്രെഗ് അബോട്ട് പറഞ്ഞു. 1991ല്‍ ആള്‍കൂട്ടത്തിലേക്ക് ട്രക്ക് ഓടിച്ചു കയറ്റിയതിനെ തുടര്‍ന്ന് 23 പേര്‍ കൊല്ലപ്പെട്ടിരുന്നു. പളളിയിലുണ്ടായിരുന്ന 26 പേരാണ് കൊല്ലപ്പെട്ടത്. അക്രമിയടക്കമാണ് 27 പേരെന്ന് സുരക്ഷാ ഉദ്യോഗസ്ഥര്‍ സ്ഥിരീകരിച്ചു.

ഡെവിന്‍ പി കെല്ലി എന്നയാളാണ് ആക്രമണത്തിനു പിന്നിലെന്ന് പോലിസ് വ്യക്തമാക്കി. സംഭവസമയത്ത് 70ഓളം പേര്‍ പള്ളിയിലുണ്ടായിരുന്നു. പള്ളിയില്‍ നിന്നും കാറില്‍ കയറി രക്ഷപ്പെട്ട കെല്ലിയെ പിന്നീട് മരിച്ച നിലയില്‍ കണ്ടെത്തിയെന്നാണ് പോലിസ് റിപ്പോര്‍ട്ട്.

English summary

At least 27 people killed in shooting at Texas church