ഇന്ത്യ ഉൾപ്പടെ തെക്കൻ ഏഷ്യൻ രാജ്യങ്ങളിൽ ചൂടും വേനൽക്കാല മൺസൂണും വർധിക്കും: ഐപിസിസി റിപ്പോർട്ട്

Published: Monday, August 9, 2021, 14:29 [IST]

ന്യൂഡൽഹി: ഇന്ത്യയടക്കമുള്ള ദക്ഷിണ ഏഷ്യൻ രാജ്യങ്ങളിൽ കാലാവസ്ഥ വ്യതിയാനത്തിന്റെ ആഘാതങ്ങൾ വളരെ പ്രകടമാണെന്ന് തെളിയിക്കുകയാണ് ഐപിസിസി റിപ്പോർട്ട്. വരും വർഷങ്ങളിൽ ചൂട് തരംഗങ്ങളും ഈർപ്പമുള്ള ചൂട് സമ്മർദ്ദവും കൂടുതൽ തീവ്രവും പതിവുള്ളതുമായിരിക്കുമെന്ന് ഐപിസിസി റിപ്പോർട്ടിൽ പറയുന്നു. വേനൽക്കാല മഴയും വർധിക്കുമെന്നാണ് നിലവിലെ സാഹചര്യങ്ങൾ വ്യക്തമാക്കുന്നത്.കാലാവസ്ഥാ വ്യതിയാനത്തെക്കുറിച്ചു പഠിക്കുന്ന ഇന്റർ ഗവൺമെന്റൽ പാനൽ ഓൺ ക്ലൈമറ്റ് ചെയ്ഞ്ച് എന്ന കോൺഗ്ലേവിന്റേതാണ് ഈ റിപ്പോർട്ട്.

ലോകനേതാക്കൾക്ക് അവരുടെ നയങ്ങൾ അറിയിക്കുന്നതിനായി കാലാവസ്ഥാ വ്യതിയാനത്തെക്കുറിച്ചുള്ള ഏറ്റവും പുതിയ വിവരങ്ങൾ നൽകുന്നതിനും രൂപീകരിച്ചിട്ടുള്ള ഐപിസിസിയുടെ റിപ്പോർട്ടിനെ ഏറെ പ്രാധാന്യത്തോടെയാണ് ആഗോള സമൂഹം ഉറ്റുനോക്കുന്നത്. 60-ലധികം രാജ്യങ്ങളിൽ നിന്നുള്ള 234 പ്രമുഖ ശാസ്ത്രജ്ഞരിൽ നിന്നുള്ള അഞ്ച് വർഷത്തെ വിലയിരുത്തൽ, എഴുത്ത്, അവലോകനം എന്നിവ അടിസ്ഥാനപ്പെടുത്തിയാണ് റിപ്പോർട്ട് തയാറാക്കിയിരിക്കുന്നത്.

ഇത് പ്രകാരം 1850-1900 കാലഘട്ടത്തെ അപേക്ഷിച്ച് ഇപ്പോൾ ഉപരി താപനിലയിൽ കൃത്യമായ വർധനവ് ഏഷ്യൻ രാജ്യങ്ങളിൽ വ്യക്തമാണ്. തണുപ്പിന്റെ തീവ്രത കുറയുമ്പോൾ ചൂട് അസഹനീയമായ രീതിയിൽ വർധിക്കുകയാണ്. വരും വർഷങ്ങളിൽ ഇത് കൂടുതൽ തീവ്രമാകുമെന്നാണ് റിപ്പോർട്ടിൽ പറയുന്നത്. ഏഷ്യൻ മേഖലയിൽ സമുദ്ര ഉഷ്‌ണതരംഗങ്ങൾ വർധിക്കുകയും ശരാശരിയിലും കനത്ത മഴയുണ്ടാകുകയും ചെയ്യുമെന്ന് ഐപിസിസി റിപ്പോർട്ടിൽ പറയുന്നു.

മേഘവിസ്ഫോടനങ്ങളും പേമാരിയും പതിവാകുമെന്നും റിപ്പോർട്ടിൽ പറയുന്നു. വളരെ കുറഞ്ഞ സമയത്തിനകം ഒരു പ്രദേശത്തുണ്ടാകുന്ന അതിശക്തമായ പേമാരിയാണ് മേഘസ്ഫോടനം എന്നുപറയുന്നത്. നിമിഷങ്ങൾ കൊണ്ട് മേഘസ്ഫോടനം ഉണ്ടാകുന്ന പ്രദേശം മുഴുവൻ വെള്ളപ്പൊക്കവും ഉരുൾപൊട്ടലും കൊണ്ട് നാശനഷ്ടങ്ങളുണ്ടാകും. കാറ്റും ഇടിയും മിന്നലും കൂടിയാകുന്നതോടെ ആ പ്രദേശം അക്ഷരാർത്ഥത്തിൽ പ്രളയത്തിലാകുന്നു. പൊതുവേ, മണിക്കൂറിൽ 100 മില്ലീമീറ്ററിൽ കൂടുതൽ മഴ ഒരു സ്ഥലത്തു ലഭിച്ചാൽ, അതിനെ മേഘസ്ഫോടനം എന്നുവിളിക്കാം. കേരളത്തിലടക്കം ചെറു മേഘ വിസ്ഫോടനങ്ങൾ പതിവാകുന്നെന്ന് നേരത്തെ കുസാറ്റിന്റെ പഠന റിപ്പോർട്ട് പുറത്ത് വന്നിരുന്നു.

വടക്കൻ ഏഷ്യൻ പ്രദേശങ്ങളിൽ ചൂട് കാലാവസ്ഥ സീസൺ വർധിക്കാനും സാധ്യത കൂടുതലാണ്. ഹിമപാളികൾ ഉരുകുന്നത് കാലാനുസൃതമായ മഞ്ഞുവീഴ്ച, ഹിമപാതം എന്നിവ -ാം നൂറ്റാണ്ടിന്റെ മധ്യത്തോടെ കുറയാൻ കാരണമാകുമെന്നും റിപ്പോർട്ടിൽ ചൂണ്ടി കാണിക്കുന്നു. ഏഷ്യൻ ഉയർന്ന പർവതനിരകളിലെ ഹിമാനികളുടെ ഒഴുക്ക് 21-ആം നൂറ്റാണ്ടിന്റെ മദ്ധ്യത്തിൽ വർദ്ധിക്കും, തുടർന്ന് ഹിമാനിയുടെ സംഭരണം നഷ്ടപ്പെട്ടതിനാൽ ഒഴുകുന്നത് കുറയുകയും ചെയ്യാം.