ഹിലാരി ക്ലിന്റന്റെ ലീക്കായ ഇ-മെയിലിലെ ചോദ്യം അമിതാഭ് ബച്ചനെ കുറിച്ച് !
ഡെമോക്രാറ്റിക് പാര്ട്ടിയുടെ അമേരിക്കന് പ്രസിഡന്റ് സ്ഥാനാര്ത്ഥി ഹിലാരി ക്ലിന്റന്റെ ലീക്കായ ഇ-മെയിലില് നടന് അമിതാഭ് ബച്ചനെ കുറിച്ചുള്ള ചോദ്യവും.
ന്യൂയോര്ക്ക്: ഡെമോക്രാറ്റിക് പാര്ടിയുടെ അമേരിക്കന് പ്രസിഡന്റ് സ്ഥാനാര്ത്ഥി ഹിലാരി ക്ലിന്റന്റെ ലീക്കായ ഇ മെയിലില് നടന് അമിതാഭ് ബച്ചനെ കുറിച്ചുള്ള ചോദ്യവും. ഹിലാരിയുടെ അടുത്ത സഹായിയും പാക് വംശജയുമായ ഹുമാ അബേദിനോടാണ് ഹിലാരി മെയിലില് അമിതാഭ് ബച്ചനെ കുറിച്ച് ചോദിച്ചിരിക്കുന്നത്.
2010 ല് യു എസ് സ്റ്റേറ്റ് സെക്രട്ടറിയായിരുന്നപ്പോഴാണ് ഹിലാരി ഇങ്ങനെയൊരു മെയില് അയക്കുന്നത്. നമ്മള് കുറച്ചു വര്ഷങ്ങള്ക്കു മുന്പു കണ്ട ആ ഇന്ത്യന് നടന് ആരാണെന്നാണ് ഹിലാരി ഇ -മെയിലില് ചോദിക്കുന്നത്. വാഷിങ് ടണ് പോസ്റ്റിന്റെ നാഷണല് റിപ്പോര്ട്ടര് ജോസ് എ ഡെല് റീലാണ് ലീക്കായ ഈമെയില് ട്വീറ്റ് ചെയ്തിരിക്കുന്നത്.
അബേദിന് അമിതാഭ് ബച്ചന് എന്നു മറുപടി പറയുകയും ചെയ്യുന്നുണ്ട്. ഏത് സാഹചര്യത്തിലാണ് ഹിലാരി അമിതാഭ് ബച്ചനെ കുറിച്ചു ചോദിച്ചതെന്ന കാര്യം വ്യക്തമല്ല. റിപ്പബ്ലിക്കന് സ്ഥാനാര്ത്ഥി ഡൊണാള്ഡ് ട്രംപും ഡെമോക്രാറ്റിക് സ്ഥാനാര്ത്ഥി ഹിലരി ക്ലിന്റണും തമ്മിലുള്ള പോരാട്ടം മുറുകുന്നതിനിടെയാണ് ഇ മെയില് വിവാദത്തെ തുടര്ന്ന് എഫ് ബി ഐ അന്വേഷണം പ്രഖ്യാപിക്കുന്നത്. ഇത് ഹിലാരിയുടെ ലീഡ് നിലയ്ക്ക് തിരിച്ചടിയായിരിക്കുകയാണ്.