ഊർജ്ജ വിപ്ലവം;കാനഡയുമായി കൈകോർത്ത് ഇന്ത്യ, ഇനി ഇന്ധന സുരക്ഷയുടെ കാലം

ആഗോള ഊർജ്ജ ഭൂപടത്തിൽ തങ്ങളുടെ സ്വാധീനം ഉറപ്പിച്ചുകൊണ്ട് ഇന്ത്യയും കാനഡയും തമ്മിലുള്ള തന്ത്രപരമായ പങ്കാളിത്തം പുതിയ ഉയരങ്ങളിലേക്ക് എത്തുകയാണ്. ഗോവയിൽ നടന്ന 'ഇന്ത്യ എനർജി വീക്ക് 2026' (IEW 2026) വേദിയിൽ വെച്ച് ഇരുരാജ്യങ്ങളും ഊർജ്ജ സഹകരണത്തിനുള്ള സംയുക്ത പ്രസ്താവനയിൽ ഒപ്പുവെച്ചു. ഊർജ്ജ സുരക്ഷ, ശുദ്ധമായ ഊർജ്ജത്തിലേക്കുള്ള മാറ്റം, ദീർഘകാല സാമ്പത്തിക സഹകരണം എന്നിവയിൽ ഊന്നൽ നൽകുന്നതാണ് ഈ കരാർ.

ഇന്ത്യൻ പെട്രോളിയം-പ്രകൃതിവാതക മന്ത്രാലയവും കാനഡയുടെ നാച്ചുറൽ റിസോഴ്‌സസ് മന്ത്രാലയവും തമ്മിലാണ് കരാർ ഒപ്പിട്ടത്. കേന്ദ്രമന്ത്രി ഹർദീപ് സിംഗ് പുരിയും കാനഡയുടെ ഊർജ്ജ-പ്രകൃതിവിഭവ മന്ത്രി തിമോത്തി ഹോഡ്‌സണും തമ്മിൽ നടത്തിയ ഉന്നതതല ചർച്ചകൾക്ക് ശേഷമാണ് ഈ നിർണ്ണായക പ്രഖ്യാപനം ഉണ്ടായത്. ഇന്ത്യ എനർജി വീക്കിൽ ആദ്യമായാണ് ഒരു കനേഡിയൻ കാബിനറ്റ് മന്ത്രി പങ്കെടുക്കുന്നത് എന്നത് ഈ ബന്ധത്തിന്റെ പ്രാധാന്യം വ്യക്തമാക്കുന്നു.

2025 ജൂണിൽ കാനഡയിൽ വെച്ച് നടന്ന ജി7 ഉച്ചകോടിക്കിടെ ഇരുരാജ്യങ്ങളുടെയും പ്രധാനമന്ത്രിമാർ തമ്മിൽ നടത്തിയ ചർച്ചകളുടെ തുടർച്ചയായാണ് ഈ പുതിയ നീക്കം. തടസ്സപ്പെട്ടുപോയിരുന്ന 'ഇന്ത്യ-കാനഡ മിനിസ്റ്റീരിയൽ എനർജി ഡയലോഗ്' ഇതോടെ ഔദ്യോഗികമായി പുനരാരംഭിച്ചു. ആഗോള ഭൗമരാഷ്ട്രീയ സാഹചര്യങ്ങൾ മാറിക്കൊണ്ടിരിക്കുന്ന വേളയിൽ, ഊർജ്ജ വിതരണ ശൃംഖല വൈവിധ്യവൽക്കരിക്കേണ്ടത് അനിവാര്യമാണെന്ന് ഇരു രാജ്യങ്ങളും വിലയിരുത്തി.

ലോകത്തിലെ ഏറ്റവും വലിയ ഊർജ്ജ ഉൽപ്പാദകരിൽ ഒന്നായി മാറാൻ ശ്രമിക്കുന്ന കാനഡയ്ക്ക് ഏഷ്യൻ വിപണി അത്യന്താപേക്ഷിതമാണ്. എൽഎൻജി (LNG), ക്രൂഡ് ഓയിൽ, എൽപിജി (LPG) എന്നിവയുടെ വിതരണത്തിൽ കാനഡയ്ക്ക് വലിയ സാധ്യതകളുണ്ട്. മറുവശത്ത്, ലോകത്തിലെ മൂന്നാമത്തെ വലിയ എണ്ണ ഉപഭോക്താവും നാലാമത്തെ വലിയ എൽഎൻജി ഇറക്കുമതിക്കാരുമാണ് ഇന്ത്യ. അടുത്ത രണ്ട് പതിറ്റാണ്ടിനുള്ളിൽ ആഗോള ഊർജ്ജ ആവശ്യം വർദ്ധിക്കുന്നതിന്റെ മൂന്നിലൊന്ന് ഇന്ത്യയിൽ നിന്നായിരിക്കും. ഈ സാഹചര്യത്തിൽ ഇന്ത്യയുമായുള്ള ദീർഘകാല പങ്കാളിത്തം കാനഡയ്ക്ക് ഗുണകരമാകും.

കാനഡയിൽ നിന്ന് ഇന്ത്യയിലേക്ക് എൽഎൻജി, എൽപിജി, ക്രൂഡ് ഓയിൽ എന്നിവയും, ഇന്ത്യയിൽ നിന്ന് കാനഡയിലേക്ക് സംസ്കരിച്ച പെട്രോളിയം ഉൽപ്പന്നങ്ങളും കയറ്റുമതി ചെയ്യുന്നതിലൂടെ ഉഭയകക്ഷി വ്യാപാരം ശക്തിപ്പെടുത്താൻ കരാറിൽ ധാരണയായി.

നിക്ഷേപവും സാങ്കേതിക വിദ്യയും ഊർജ്ജ മേഖലയിലെ നിക്ഷേപം വർദ്ധിപ്പിക്കാനും ഇരുമന്ത്രിമാരും തീരുമാനിച്ചു. കാനഡ തങ്ങളുടെ ഊർജ്ജ പദ്ധതികൾക്കായി 116 ബില്യൺ ഡോളറിന്റെ നിക്ഷേപം ലക്ഷ്യമിടുമ്പോൾ, ഇന്ത്യ ഈ മേഖലയിൽ 500 ബില്യൺ ഡോളറിന്റെ നിക്ഷേപ സാധ്യതകളാണ് തുറന്നിടുന്നത്. കാർബൺ ക്യാപ്‌ചർ (CCUS), ഹരിത ഹൈഡ്രജൻ, ബയോ ഫ്യുവൽസ്, ബാറ്ററി സംഭരണ സംവിധാനങ്ങൾ, ആർട്ടിഫിഷ്യൽ ഇന്റലിജൻസ് (AI) എന്നിവയിൽ സഹകരിക്കാനും ഇരുരാജ്യങ്ങളും സമ്മതിച്ചു.

കാലാവസ്ഥാ വ്യതിയാനം നേരിടുന്നതിനുള്ള ആഗോള ശ്രമങ്ങളിൽ പങ്കാളികളാകുമ്പോൾ തന്നെ, ഊർജ്ജം സാധാരണക്കാർക്ക് മിതമായ നിരക്കിൽ ലഭ്യമാക്കുന്നുണ്ടെന്ന് ഉറപ്പുവരുത്തേണ്ടത് പ്രധാനമാണെന്ന് സംയുക്ത പ്രസ്താവന ഊന്നിപ്പറയുന്നു. സുസ്ഥിരമായ ഒരു ഭാവിയിലേക്കുള്ള ഇന്ത്യയുടെയും കാനഡയുടെയും പ്രയാണത്തിൽ ഈ കരാർ ഒരു നാഴികക്കല്ലായി മാറും