ഇന്ത്യന്‍ ദമ്പതികളെ ഫിലിപ്പൈന്‍സില്‍ വെടിവെച്ച് കൊലപ്പെടുത്തി

ബഹാഗ്വന്ത് സിങ്(45), ഭാര്യ ജസ്വന്തിര്‍ കൗര്‍(36), എന്നിവരാണ് വെടിയേറ്റു മരിച്ചത്.

മനില: ഇന്ത്യയില്‍ നിന്നുള്ള സിക്ക് ദമ്പതികള്‍ ഫിലിപ്പൈന്‍സില്‍ വെടിയേറ്റു മരിച്ചു. ഫിലിപ്പൈന്‍സിലെ കമറൈനല്‍ പ്രദേശത്തുവെച്ച് ബൈക്കിലെത്തിയ രണ്ടുപേരാണ് ദമ്പതികളെ വെടിവെച്ചതെന്ന് പോലീസ് അറിയിച്ചു. ഇരുവരും സംഭവസ്ഥലത്തുവെച്ചുതന്നെ മരിച്ചു. അക്രമികളെ പിന്തുടര്‍ന്ന പോലീസ് രണ്ടുപേരെ അറസ്റ്റ് ചെയ്തിട്ടുണ്ട്.

ബഹാഗ്വന്ത് സിങ്(45), ഭാര്യ ജസ്വന്തിര്‍ കൗര്‍(36), എന്നിവരാണ് വെടിയേറ്റു മരിച്ചത്. സിപ്പോകോട്ട് പ്രൊവിന്‍സിലെ താമസക്കാരാണ് ഇവര്‍. സംഭവത്തില്‍ മര്‍വിന്‍ മഗ്‌ഡോങ്, റുഡോള്‍ഫോ എന്നിവരെ പോലീസ് പിന്തുടര്‍ന്ന് പിടികൂടുകയായിരുന്നു. ബൈക്കില്‍ രക്ഷപ്പെട്ട ഇവരെ ബംഗാസ് കേവില്‍ നിന്നുമാണ് പിടികൂടിയത്.

കൊലപാതകത്തിന്റെ കാരണം വ്യക്തമായിട്ടില്ല. ഇവരില്‍ നിന്നും രണ്ട് തോക്കുകളും വെടിയുണ്ടകളും കണ്ടെടുത്തു. അടുത്തിടെ ഇന്ത്യക്കാര്‍ക്കെതിരെ ഫിലിപ്പൈന്‍സില്‍ ഒട്ടേറെ ആക്രമണങ്ങളുണ്ടായിട്ടുണ്ട്. ഓഗസ്തില്‍ ഇരുപത്തിയാറുകാരനായ പഞ്ചാബ് സ്വദേശിയെ സാന്റിയോഗോ സിറ്റിയില്‍ വെച്ച് കൊലപ്പെടുത്തിയിരുന്നു. ഇയാളുടെ വിവാഹത്തിന് മാസങ്ങള്‍ക്കു മുന്‍പായിരുന്നു കൊലപാതകം.

ഇന്ത്യന്‍ വംശജരെ തിരഞ്ഞുപിടിച്ച് ആക്രമിക്കുന്ന സംഘം ഫിലിപ്പൈന്‍സില്‍ വ്യാപകമാവുകയാണെന്നാണ് റിപ്പോര്‍ട്ട്. കൊലപാതകത്തിനും മറ്റും കടുത്ത ശിക്ഷ ലഭിക്കുന്നുണ്ടെങ്കിലും വന്‍തോതില്‍ ക്രിമിനല്‍ കേസുകള്‍ രജിസ്റ്റര്‍ ചെയ്യുന്ന രാജ്യങ്ങളിലൊന്നാണ് ഫിലിപ്പൈന്‍സ്.

English summary

Indian Sikh couple shot dead in Philippines