ഇന്തോനേഷ്യയിലെ ഫ്ലോറസ് ദ്വീപിന് സമീപം ശക്തമായ ഭൂചലനം; സുനാമി മുന്നറിയിപ്പ്
കിഴക്കന് ഇന്തോനേഷ്യയിലെ ഫ്ലോറസ് ദ്വീപിന് സമീപം ശക്തമായ ഭൂചലനം. റിക്ടര് സ്കെയിലില് 7.7 തീവ്രത രേഖപ്പെടുത്തിയ ഭൂചലനം ആണ് ശനിയാഴ്ച പുലര്ച്ചെയോടെ അനുഭവപ്പെട്ടത്. ഇതിനെത്തുടര്ന്ന് സുനാമി മുന്നറിയിപ്പ് നല്കുകയും നൂറുകണക്കിന് ആളുകളെ സുരക്ഷിത സ്ഥാനങ്ങളിലേക്ക് മാറ്റുകയും ചെയ്തു.
ദ്വീപിന്റെ വടക്കന് തീരത്ത്, എന്ഡെ നഗരത്തില് നിന്ന് വടക്കുപടിഞ്ഞാറായി ഏകദേശം 68 കിലോമീറ്റര് (42 മൈല്) അകലെയാണ് ഭൂമിക്കടിയില് ആഴം കുറഞ്ഞ രീതിയില് ഈ ഭൂചലനം ഉണ്ടായതെന്ന് യുഎസ് ജിയോളജിക്കല് സര്വേ അറിയിച്ചു. ആദ്യത്തെ ചലനത്തിന് പിന്നാലെ അതേ പ്രദേശത്ത് ശക്തമായ തുടര്ചലനങ്ങളും ഉണ്ടായി. ഇതില് ഒന്നിന് 6.1 തീവ്രത ഉണ്ടായിരുന്നു.
'പെട്ടെന്ന് കുലുക്കം തുടങ്ങിയപ്പോള് ഞാന് പരിഭ്രാന്തനായി. രോഗികള് ആശുപത്രിയില് നിന്ന് ഓടിപ്പോയി, അത്രയും ശക്തമായിരുന്നു കുലുക്കം. ചില ഭിത്തികളില് വിള്ളലുകള് വീഴുന്നുണ്ടായിരുന്നു.' ആശുപത്രിയിലെ കസ്റ്റമര് സര്വീസ് ഉദ്യോഗസ്ഥനായ 31-കാരന് ലൂക്കാസ് ലോട്ടാര് എഎഫ്പിയോട് പറഞ്ഞു. ഭൂചലനത്തെത്തുടര്ന്ന് സുനാമി തിരമാലകള് ഉണ്ടാകാന് സാധ്യതയുണ്ടെന്ന് ഇന്തോനേഷ്യയുടെ കാലാവസ്ഥാ, ഭൂമിശാസ്ത്ര ഏജന്സി മുന്നറിയിപ്പ് നല്കി.
'ഈസ്റ്റ് നുസ തെങ്ഗാര, സൗത്ത് സുലവേസി, വെസ്റ്റ് നുസ തെങ്ഗാര എന്നീ പ്രവിശ്യകളില് സുനാമിക്ക് കാരണമാകാന് സാധ്യതയുള്ള ഭൂചലനമാണിതെന്ന് സുനാമി മോഡലിംഗ് ഫലങ്ങള് സൂചിപ്പിക്കുന്നു,' ബിഎംകെജിയുടെ ഭൂചലന-സുനാമി വിഭാഗം ഡയറക്ടര് വിജയാന്തോ പറഞ്ഞു.
0.5 മീറ്റര് മുതല് മൂന്ന് മീറ്റര് വരെ (1.6 മുതല് 9.8 അടി വരെ) ഉയരമുള്ള തിരമാലകള് ഉണ്ടാകാന് സാധ്യതയുണ്ടെന്ന മുന്നറിയിപ്പാണ് നല്കിയത്. അതിനിടെ മുന്നറിയിപ്പിനെ തുടര്ന്ന് ഏകദേശം 2,400 കിലോമീറ്റര് (1,500 മൈല്) അകലെയുള്ള ഫ്ലോറസ് ദ്വീപിലെ മൗമെരെ പട്ടണത്തിലുള്ളവര് ഉയര്ന്ന പ്രദേശങ്ങളിലേക്ക് മാറി എന്ന് എഎഫ്പി റിപ്പോര്ട്ട് ചെയ്യുന്നു. സുനാമിക്ക് മുന്നോടിയായി സാധാരണയായി കണ്ടുവരുന്ന പ്രതിഭാസമായ, കടല്വെള്ളം പിന്വാങ്ങുന്നത് ആ പ്രദേശത്ത് കാണാമായിരുന്നുവെന്ന് റിപ്പോര്ട്ടില് പറയുന്നു.
നഗെക്കിയോ മേഖലയില് നൂറുകണക്കിന് ആളുകള് സുരക്ഷിത സ്ഥാനങ്ങളിലേക്ക് മാറി. ഇവിടെ പല കെട്ടിടങ്ങള്ക്കും കേടുപാടുകള് സംഭവിച്ചിട്ടുണ്ട്. ആളപായമൊന്നും റിപ്പോര്ട്ട് ചെയ്തിട്ടില്ലെങ്കിലും, 19 മുതല് 30 സെന്റീമീറ്റര് വരെ ഉയരമുള്ള സുനാമി തിരമാലകള് രേഖപ്പെടുത്തിയതായി അധികൃതര് അറിയിച്ചു.
ജപ്പാന് മുതല് തെക്കുകിഴക്കന് ഏഷ്യ വഴി പസഫിക് മേഖലയിലുടനീളം വ്യാപിച്ചുകിടക്കുന്ന, തീവ്രമായ ഭൂചലന സാധ്യതയുള്ള 'റിംഗ് ഓഫ് ഫയര്' എന്ന മേഖലയില് സ്ഥിതി ചെയ്യുന്നതിനാല് ഇന്തോനേഷ്യയിലും അയല്രാജ്യങ്ങളിലും ഇടയ്ക്കിടെ ഭൂചലനങ്ങള് ഉണ്ടാകാറുണ്ട്. ഇന്തോനേഷ്യയുടെ ചരിത്രത്തിലെ മാരകമായ ഭൂചലനങ്ങളില് ഒന്ന് 2004-ല് സുമാത്ര തീരത്തുണ്ടായ 9.1 തീവ്രത രേഖപ്പെടുത്തിയ ഭൂചലനമാണ്.
ഇതിനെത്തുടര്ന്നുണ്ടായ സുനാമിയില് ഇന്തോനേഷ്യയിലെ ഏകദേശം 1,70,000 പേര് ഉള്പ്പെടെ ആകെ 2,20,000-ത്തോളം ആളുകള്ക്ക് ജീവന് നഷ്ടമായി. രേഖപ്പെടുത്തപ്പെട്ട ചരിത്രത്തിലെ ഏറ്റവും വലിയ പ്രകൃതിദുരന്തങ്ങളിലൊന്നായിരുന്നു 'ബോക്സിംഗ് ഡേ'യില് (ഡിസംബര് 26-ന്) സംഭവിച്ച ആ ദുരന്തം.
2018-ല് ലൊംബോക്ക് ദ്വീപിലുണ്ടായ ശക്തമായ ഭൂചലനത്തെത്തുടര്ന്ന് അടുത്ത ഏതാനും ആഴ്ചകളിലായി നിരവധി തുടര്ചലനങ്ങളും ഉണ്ടായി. വിനോദസഞ്ചാര കേന്ദ്രമായ ഈ ദ്വീപിലും അയല്ദ്വീപായ സുംബാവയിലുമായി 550-ലധികം ആളുകള്ക്കാണ് അന്ന് ജീവന് നഷ്ടമായത്. അതേ വര്ഷം പിന്നീട്, സുലവേസി ദ്വീപിലെ പാലുവില് ഉണ്ടായ 7.5 തീവ്രതയുള്ള ഭൂചലനത്തിലും തുടര്ന്നുണ്ടായ സുനാമിയിലും 4,300-ലധികം ആളുകള് മരിക്കുകയോ കാണാതാവുകയോ ചെയ്തു.
Click it and Unblock the Notifications
Sign in with Google