മോഷണ ആരോപണം; മറഡോണയുടെ മുന്‍ കാമുകി അറസ്റ്റില്‍

ബ്യൂണസ് ഐറിസ്: ഫുട്‌ബോള്‍ ഇതിഹാസം ഡീഗോ മറഡോണയുടെ മുന്‍ കാമുകി അറസ്റ്റില്‍. അര്‍ജന്റീനയിലെ വനിതാ ഫുട്‌ബോള്‍ താരം 22കാരിയായ റോസിയോ ഒലിവയാണ് ബ്യൂണസ് ഐറിസിലെ ഇസെയ്‌സാ വിമാനത്താവളത്തില്‍ വെച്ച് പിടിയിലായത്. കാമുകി തന്റെ വിലപിടിപ്പുള്ള വസ്തുക്കളുമായി കടന്നു കളഞ്ഞെന്ന മറഡോണയുടെ പരാതി പ്രകാരമാണ് അറസ്റ്റ്.

നേരത്തെ ദുബായില്‍ സ്‌പോര്‍ട്‌സ് പ്രൊമോട്ടറായി പ്രവര്‍ത്തിക്കുന്ന കാലയളവില്‍ റോസിയോ ഒലിവയായിരുന്നു മറഡോണയുടെ കാമുകി. കോടീശ്വരന്‍മാര്‍ താമസിക്കുന്ന കൃത്രിമദ്വീപായ പാം ജുമെയ്‌റയില്‍ ഇരുവരും ഒരുമിച്ചാണ് താമസിച്ചുവന്നത്. ഇതിനിടയില്‍ ഇരുവരും തമ്മില്‍ വഴക്കുണ്ടായതായി പറയുന്നു. വഴക്കിനെ തുടര്‍ന്ന് മറഡോണ കാമുകിയെ വീട്ടില്‍ നിന്നും ഇറക്കിവിടുകയും ചെയ്തു.

എന്നാല്‍, തന്റെ തന്റെ വിലപിടിച്ച വാച്ചും വജ്ര കമ്മലുകളും മറ്റ് സ്വര്‍ണാഭരണങ്ങളും മോഷ്ടിച്ചാണ് റോസിയോ കടന്നു കളഞ്ഞതെന്ന് മറഡോണ പിന്നീട് ദുബായ് പോലീസില്‍ പരാതി നല്‍കുകയായിരുന്നു. അപ്പോഴെക്കും റോസിയോ അര്‍ജന്റീനയിലേക്ക് നാടുപിടിച്ചതിനാല്‍ ദുബായ് പോലീസ് പിന്നീട് ഇന്റര്‍പോളിന്റെ സഹായം അഭ്യര്‍ത്ഥിച്ചു.

ഇന്റര്‍പോളാണ് റോസിയോയെ ബ്യൂണസ് ഐറിസിലെ വിമാനത്താവളത്തില്‍ വെച്ച് പിടികൂടിയത്. താന്‍ ആരുടെയും ഒന്നും മോഷ്ടിച്ചിട്ടില്ലെന്നാണ് പിടിയിലായ റോസിയോ പറയുന്നത്. പ്രണയകാലത്ത് മറഡോണ സമ്മാനമായി കൊടുത്തതാണ് ആഭരണങ്ങളെന്നും പറയപ്പെടുന്നുണ്ട്. അതേസമയം, ആഭരണങ്ങളും വാച്ചും തിരിച്ചു തന്നാല്‍ കേസ് പിന്‍വലിക്കാമെന്ന വാഗ്ദാനവുമായി മറഡോണയുടെ അഭിഭാഷകന്‍ രംഗത്തെത്തിയത് റോസിയോയ്ക്ക് ആശ്വാസമാണ്.

English summary

Interpol arrests Diego Maradona's ex girlfriend