ഇസ്രായേല് തൊടുത്തു വിടുന്നത് വൈറ്റ് ഫോസ്ഫറസ് ബോംബുകളോ? യുഎന് നിരോധിച്ച അതിമാരക ആയുധം
ടെൽ അവീവ്: ഇസ്രായേല് - ഹമാസ് സംഘർഷം രൂക്ഷമായതോടെ പശ്ചിമേഷ്യയില് ഒരിക്കല് കൂടി യുദ്ധ ഭീതി ശക്തമായിരിക്കുകയാണ്. ഹമാസിന്റെ കര-കടൽ വ്യോമാക്രമണത്തിന് മറുപടിയായി ഗാസയുടെ പല മേഖലകളിലും തീവ്രമായ ആക്രമണമാണ് ഇസ്രായേല് സേന നടത്തുന്നത്. ഹമാസിനെയും അതിന്റെ ശൃംഖലയെയും പൂർണ്ണമായും തകർക്കുമെന്ന് അവകാശപ്പെടുന്ന ഇസ്രായേൽ നിരോധിത വൈറ്റ് ഫോസ്ഫറസ് ബോംബുകൾ ഉപയോഗിച്ചുവെന്ന ആരോപണവും ശക്തമാണ്.
ഗാസ മുനമ്പിലെ ജനസാന്ദ്രതയുള്ള പ്രദേശങ്ങളിൽ ബോംബാക്രമണം നടത്താൻ ഇസ്രായേൽ അതിമാരകമായ വൈറ്റ് ഫോസ്ഫറസ് ബോംബുകള് ഉപയോഗിച്ചുവെന്നാണ് പാലസ്തീന് ആരോപിക്കുന്നത്. "ഇസ്രായേൽ അധിനിവേശകർ വടക്കൻ ഗാസയിലെ കരാമ മേഖലയിലുള്ള ഫലസ്തീനികൾക്കെതിരെ അന്താരാഷ്ട്രതലത്തിൽ നിരോധിച്ച വൈറ്റ് ഫോസ്ഫറസ് ബോംബുകൾ ഉപയോഗിക്കുന്നു" പാലസ്തീന് വിദേശകാര്യ മന്ത്രാലയം എക്സില് കുറിച്ചു.
ഇസ്രായേലിന്റെ ഫോസ്ഫറസ് ബോംബുകളുടെ ഉപയോഗം എന്ന് അവകാശപ്പെട്ടുകൊണ്ട് യൂറോപ്യൻ ഒബ്സർവേറ്ററി ഫോർ ഹ്യൂമൻ റൈറ്റ്സിന്റെ സ്ഥാപകനായ റാമി അബ്ദോ എക്സ് പ്ലാറ്റ്ഫോമിൽ ഒരു വീഡിയോ ക്ലിപ്പ് പങ്കിടുകയും ചെയ്തിട്ടുണ്ട്. "ഗാസ സിറ്റിയുടെ വടക്ക് പടിഞ്ഞാറ് ജനസാന്ദ്രതയുള്ള പ്രദേശങ്ങളിൽ ഇസ്രായേൽ സൈനിക സേന വിഷാംശമുള്ള വെളുത്ത ഫോസ്ഫറസ് [ബോംബുകൾ] ഉപയോഗിക്കുന്നു" റാമി അബ്ദോ എക്സില് കുറിച്ചു.
ന്യൂയോർക്ക് ആസ്ഥാനമായുള്ള മനുഷ്യാവകാശ സംഘടനയായ ഹ്യൂമൻ റൈറ്റ്സ് വാച്ചും മുൻകാല സംഘർഷങ്ങളിൽ ഇസ്രായേൽ ഗാസയിൽ വൈറ്റ് ഫോസ്ഫറസ് ബോംബുകൾ ഉപയോഗിച്ചതിന്റെ റിപ്പോർട്ടുകൾ പുറത്ത് വിട്ടിരുന്നു. വൈറ്റ് ഫോസ്ഫറസ് ആയുധങ്ങൾ ഉപയോഗിച്ച് സ്മോക്ക് സ്ക്രീൻ സൃഷ്ടിക്കുന്നതിനും സൈനിക നീക്കങ്ങൾ മറയ്ക്കുന്നതിനും നിയമപരമായി അംഗീകാരമുണ്ടെങ്കിലും, 1980 ലെ ജനീവ കൺവെൻഷൻ ജനസാന്ദ്രതയുള്ള പ്രദേശങ്ങളിൽ ഇത് ഉപയോഗിക്കുന്നത് നിരോധിച്ചിട്ടുണ്ട്.
സിവിലിയൻമാർക്കെതിരെ വൈറ്റ് ഫോസ്ഫറസ് ബോംബുകൾ ഉപയോഗിക്കുന്നത് യുദ്ധക്കുറ്റമായി കണക്കാക്കപ്പെടുകയും ചെയ്യുന്നു. ഉക്രെയ്നിലെ ബഖ്മുട്ടില് റഷ്യയാണ് വൈറ്റ് ഫോസ്ഫറസ് ബോംബുകൾ അവസാനമായി ഉപയോഗിച്ചതെന്നും അന്താരാഷ്ട്ര മാധ്യമങ്ങള് റിപ്പോർട്ട് ചെയ്യുന്നു. ഗാസയിലെ ജനസാന്ദ്രതയുള്ള പ്രദേശത്ത് ഇസ്രായേൽ സൈന്യം നിരോധിത വൈറ്റ് ഫോസ്ഫറസ് ബോംബുകൾ പ്രയോഗിക്കുന്നതായി അവകാശപ്പെട്ടുകൊണ്ടുള്ള നിരവധി വീഡിയോകളും ഇതിനോടകം പുറത്ത് വന്നിട്ടുണ്ട്. എന്നാല് ഇവയില് പലതും ഇപ്പോഴത്തെ ആക്രമങ്ങളുടേത് അല്ലെന്നതാണ് വസ്തുത.
എന്താണ് വൈറ്റ് ഫോസ്ഫറസ്
മെഴുക് പോലെയുള്ള ഒരു തരം രാസവസ്തുവാണ് വൈറ്റ് ഫോസ്ഫറസ്. ഇത് വളരെ വേഗത്തില് തീ പിടിക്കുന്ന പദാർത്ഥം കൂടിയാണ് ഇത്. ഇത് വായുവിൽ സമ്പർക്കം പുലർത്തുമ്പോൾ വേഗത്തില് കത്തുന്നു. യുണൈറ്റഡ് സ്റ്റേറ്റ്സ് ഉൾപ്പെടെ ലോകമെമ്പാടുമുള്ള സൈനികർ, രാത്രിയിൽ ലക്ഷ്യങ്ങൾ കണ്ടെത്തുക അല്ലെങ്കിൽ ശത്രുക്കൾക്ക് നാശം വരുത്തുക എന്നിങ്ങനെയുള്ള വിവിധ ആവശ്യങ്ങൾക്കായി ആയുധങ്ങളിൽ ഇത് ഉപയോഗിക്കുന്നു.
വൈറ്റ് ഫോസ്ഫറസ് ബോംബ് അതിതീവ്രമായ ചൂട് (ഏകദേശം 815 ഡിഗ്രി സെൽഷ്യസ്), പ്രകാശം, കട്ടിയുള്ള വെളുത്ത പുക എന്നിവ ഉണ്ടാക്കുന്നു. സെൻസിറ്റീവ് സോണുകളിൽ പുകമറകൾ സൃഷ്ടിക്കാൻ സൈന്യത്തെ സഹായിക്കുന്നു. വെളുത്ത ഫോസ്ഫറസ് ഭൂമിയിൽ വ്യാപകമായ തീപിടുത്തത്തിന് ഇടയാക്കും. ഈ തീ അത്ര പെട്ടെന്ന് കെടുത്താനും സാധ്യമല്ല. ശരീരത്തിലും ദേഹത്തിലും പതിച്ചാല് അവിടെ പറ്റിപ്പിടിച്ച് തീ ആളിക്കത്തിക്കുന്നു. ഈ തീ എല്ലുകളിലേക്ക് വരെ ആഴത്തില് തുളച്ച് കയറുന്നു. വൈറ്റ് ഫോസ്ഫറസ് ബോംബ് ആക്രമണത്തില് പരിക്കേറ്റവർ രക്ഷപ്പെടാനുള്ള സാധ്യതയും വളരെ കുറവാണ്.
ഐക്യാരഷ്ട്ര സഭയുടെ ഇടപെടല്
1972-ൽ, ഐക്യരാഷ്ട്രസഭയുടെ ജനറൽ അസംബ്ലി ഇത്തരം ആയുധങ്ങളെ "ഭീകരതയോടെ വീക്ഷിക്കുന്ന ആയുധങ്ങൾ" എന്ന് തരംതിരിക്കുന്ന ഒരു പ്രമേയം പാസാക്കി. 1980-ൽ, സാധാരണക്കാർക്ക് അമിതമായ വേദനയോ ഉപദ്രവമോ ഉണ്ടാക്കുന്ന ചില ആയുധങ്ങളുടെ ഉപയോഗം നിരോധിക്കാനോ നിയന്ത്രിക്കാനോ അന്താരാഷ്ട്ര സമൂഹം തയ്യാറായി. ഈ കരാറിന്റെ പ്രോട്ടോക്കോൾ III പ്രകാരം വസ്തുക്കൾക്ക് തീയിടുന്ന ആയുധങ്ങളുടെ ഉപയോഗം നിയന്ത്രിക്കുന്നു.
Click it and Unblock the Notifications
Sign in with Google