ഇറാനിലെ ട്രാഫിക് ക്യാമറകൾ ഇസ്രായേലിന്റെ കയ്യിൽ! ആയത്തുള്ള ഖാംനഇയെ വധിച്ചത് ഇങ്ങനെ

ഇറാൻ പരമോന്നത നേതാവ് ആയത്തുള്ള അലി ഖാംനഇയെ ലക്ഷ്യമിട്ട് നടത്തിയ വ്യോമാക്രമണത്തിന് പിന്നിലെ അതീവ രഹസ്യമായ വിവരങ്ങൾ പുറത്തുവരുന്നു. വർഷങ്ങളോളം നീണ്ടുനിന്ന നിരീക്ഷണത്തിനൊടുവിലാണ് ഇസ്രയേൽ ഈ ദൗത്യം വിജയകരമായി പൂർത്തിയാക്കിയതെന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. ഇതിനായി ടെഹ്‌റാൻ നഗരത്തിലെ വിപുലമായ ട്രാഫിക് ക്യാമറ ശൃംഖല ഇസ്രയേൽ ഹാക്ക് ചെയ്തിരുന്നതായി പ്രമുഖ അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു.

വർഷങ്ങൾ നീണ്ട നിരീക്ഷണം

റിപ്പോർട്ടുകൾ പ്രകാരം, വർഷങ്ങൾക്ക് മുൻപ് തന്നെ ഇസ്രയേൽ രഹസ്യാന്വേഷണ വിഭാഗമായ മൊസാദിന്റെ ഹാക്കർമാർ ടെഹ്‌റാനിലെ ട്രാഫിക് ക്യാമറകളിൽ കടന്നുകൂടിയിരുന്നു. നഗരത്തിലെ ഏതാണ്ട് എല്ലാ പ്രധാന ക്യാമറകളും ഇസ്രയേലിന്റെ നിയന്ത്രണത്തിലായിരുന്നു. ഇതിലൂടെ ലഭിക്കുന്ന ദൃശ്യങ്ങൾ എൻക്രിപ്റ്റ് ചെയ്ത് ടെൽ അവീവിലെ സെർവറുകളിലേക്ക് അയച്ചിരുന്നു. ഖാംനഇയുടെ സുരക്ഷാ ഉദ്യോഗസ്ഥരുടെ നീക്കങ്ങൾ, അവർ കാറുകൾ പാർക്ക് ചെയ്യുന്ന സ്ഥലങ്ങൾ, അവരുടെ ജോലി സമയം എന്നിവയെല്ലാം കൃത്യമായി മനസ്സിലാക്കാൻ ഈ ഹാക്കിംഗിലൂടെ ഇസ്രയേലിന് സാധിച്ചു. പാസ്‌ചർ സ്ട്രീറ്റിലെ (Pasteur Street) ഖമനെയിയുടെ വസതിക്ക് സമീപമുള്ള ഒരു പ്രത്യേക ക്യാമറ ആംഗിൾ സുരക്ഷാ ഉദ്യോഗസ്ഥരുടെ ദിനചര്യകൾ മനസ്സിലാക്കുന്നതിൽ നിർണ്ണായക പങ്കുവഹിച്ചുവെന്നും റിപ്പോർട്ട് വ്യക്തമാക്കുന്നു.

സാങ്കേതിക വിദ്യയുടെ കരുത്ത്

ശേഖരിച്ച വൻതോതിലുള്ള ഡാറ്റ വിശകലനം ചെയ്യുന്നതിനായി ആർട്ടിഫിഷ്യൽ ഇന്റലിജൻസ് (AI) ടൂളുകളും അത്യാധുനിക അൽഗോരിതങ്ങളുമാണ് ഇസ്രയേൽ ഉപയോഗിച്ചത്. ഇത് ഖാംനഇയുടെയും മറ്റ് ഉന്നത ഉദ്യോഗസ്ഥരുടെയും സഞ്ചാരപഥങ്ങൾ മുൻകൂട്ടി മനസ്സിലാക്കാൻ അവരെ സഹായിച്ചു. ആക്രമണം നടന്ന ശനിയാഴ്ച രാവിലെ അലി ഖാംനഇ വസതിയിലുണ്ടെന്ന് ഉറപ്പിക്കാൻ ഈ നിരീക്ഷണ സംവിധാനങ്ങൾ വഴിയൊരുക്കി. കൂടാതെ, ആക്രമണത്തിന് തൊട്ടുമുൻപായി പ്രദേശത്തെ മൊബൈൽ ടവറുകൾ പ്രവർത്തനരഹിതമാക്കിയതായും റിപ്പോർട്ടുകളുണ്ട്. ഇത് സുരക്ഷാ ഉദ്യോഗസ്ഥർക്ക് മുന്നറിയിപ്പ് സന്ദേശങ്ങൾ ലഭിക്കുന്നത് തടയാൻ സഹായിച്ചു.

ഇസ്രയേലിന്റെ ഇന്റലിജൻസ് വിവരങ്ങൾക്ക് പുറമെ, അമേരിക്കൻ രഹസ്യാന്വേഷണ ഏജൻസിയായ സിഐഎയുടെ (CIA) സഹായവും ഈ ദൗത്യത്തിനുണ്ടായിരുന്നു. ഖാംനഇ വസതിയിലുണ്ടെന്ന കാര്യം സിഐഎയുടെ കീഴിലുള്ള ഒരു ചാരൻ നേരിട്ട് സ്ഥിരീകരിച്ചതായും സൂചനയുണ്ട്. ഇസ്രയേൽ യുദ്ധവിമാനങ്ങൾ 30-ഓളം പ്രിസിഷൻ മിസൈലുകൾ ഉപയോഗിച്ചാണ് ആക്രമണം നടത്തിയത്. പകൽ വെളിച്ചത്തിൽ നടത്തിയ ഈ ആക്രമണം ഇറാനിയൻ സൈന്യത്തെ ഞെട്ടിക്കുകയും തന്ത്രപരമായ മുൻതൂക്കം നൽകുകയും ചെയ്തു. ഖമനെയിക്ക് പുറമെ ഇറാനിലെ നിരവധി സൈനിക, രാഷ്ട്രീയ ഉന്നതരും ഈ ആക്രമണത്തിൽ കൊല്ലപ്പെട്ടതായാണ് വിവരം.

പശ്ചിമേഷ്യയിലെ സുരക്ഷാ സാഹചര്യങ്ങളെ മാറ്റിമറിക്കുന്ന ഈ സംഭവം ഇസ്രയേലിന്റെ സാങ്കേതിക മികവിന്റെയും രഹസ്യാന്വേഷണ കരുത്തിന്റെയും തെളിവായി വിലയിരുത്തപ്പെടുന്നു. ഇറാൻ നഗരങ്ങളെ തങ്ങളുടെ കൈവെള്ളയിലെന്നപോലെ ഇസ്രയേലിന് അറിയാമായിരുന്നു എന്നാണ് ഒരു ഉന്നത ഉദ്യോഗസ്ഥൻ ഇതിനെക്കുറിച്ച് പ്രതികരിച്ചത്.

അതേ സമയം പശ്ചിമേഷ്യയിൽ ഇസ്രയേലും അമേരിക്കയും സംയുക്തമായി നടത്തുന്ന സൈനിക നീക്കം മൂന്നാം ദിവസത്തിലേക്ക് കടക്കുമ്പോൾ മേഖല അതീവ ഗുരുതരമായ സാഹചര്യത്തിലൂടെയാണ് കടന്നുപോകുന്നത്. ഇറാന്റെ തിരിച്ചടിയിൽ കുവൈറ്റിൽ പ്രവർത്തിച്ചിരുന്ന അമേരിക്കൻ താൽക്കാലിക ഓപ്പറേഷൻ സെന്ററിന് നേരെ നടന്ന ആക്രമണത്തിൽ ആറ് യുഎസ് സൈനികർ കൊല്ലപ്പെട്ടതായി സ്ഥിരീകരിച്ചു. റിയാദിലെ യുഎസ് എംബസിയിലും ബഹ്റൈനിലെ യുഎസ് താവളത്തിലും ഇറാൻ ഡ്രോൺ ആക്രമണം നടത്തി.