ആയത്തുള്ള അലി ഖാംനഇ കൊല്ലപ്പെട്ടു! സ്ഥിരീകരിച്ച് ഇറാൻ

ഇസ്രായേലും അമേരിക്കയും ചേർന്ന് ഇറാനിൽ നടത്തിയ അതിശക്തമായ സൈനിക ആക്രമണത്തിൽ ഇറാന്റെ പരമോന്നത നേതാവ് ആയത്തുള്ള അലി ഖാംനഇ കൊല്ലപ്പെട്ടതായി ഇറാൻ ഔദ്യോഗികമായി സ്ഥിരീകരിച്ചു. നേരത്തെ അമേരിക്കയുടെയും ഇസ്രായേലിന്റെയും അവകാശവാദങ്ങൾ ഇറാൻ ഭരണകൂടം തള്ളിയിരുന്നു. ഇപ്പോൾ പുറത്തുവരുന്ന വാർത്തകൾ വലിയ ഞെട്ടലോടെയാണ് അന്താരാഷ്ട്ര സമൂഹം നോക്കിക്കാണുന്നത്. തസ്നീം, ഫാർ തുടങ്ങിയ ഇറാനിയൻ ഔദ്യോഗിക വാർത്താ ഏജൻസികൾ ഈ വിവരം സ്ഥിരീകരിച്ചതോടെ, ഇറാനിലെ അധികാര കേന്ദ്രങ്ങളിൽ വലിയ അനിശ്ചിതത്വവും ആശയക്കുഴപ്പവും ഉടലെടുത്തിരിക്കുകയാണ്.

ആക്രമണത്തിൽ ഖാംനഇയുടെ മകൾ, മരുമകൻ, മരുമകൾ, ചെറുമകൻ എന്നിവരും കൊല്ലപ്പെട്ടതായി റിപ്പോർട്ടുകളുണ്ട്. ഖമനേയിയുടെ ഔദ്യോഗിക വസതി, റെവല്യൂഷണറി ഗാർഡ് കമാൻഡർമാരുടെ താവളങ്ങൾ, മുതിർന്ന ആണവ ഉദ്യോഗസ്ഥരുടെ കേന്ദ്രങ്ങൾ എന്നിവ ലക്ഷ്യമാക്കിയാണ് ഇസ്രായേൽ-അമേരിക്കൻ സംയുക്ത സേന വ്യോമാക്രമണം നടത്തിയത്. ഇറാന്റെ 24 പ്രവിശ്യകളിലായി നടന്ന ഈ ആക്രമണത്തിൽ 201 പേർ കൊല്ലപ്പെടുകയും 700-ലധികം പേർക്ക് പരിക്കേൽക്കുകയും ചെയ്തു.

ഈ സംഭവത്തെ ഇറാൻ ഭരണകൂടം അമേരിക്കയുടെയും ഇസ്രായേലിന്റെയും 'ഭീകരാക്രമണം' എന്നാണ് വിശേഷിപ്പിച്ചത്. ഈ കൊലപാതകത്തിന് ലോകം കണ്ടിട്ടില്ലാത്ത വിധത്തിലുള്ള ശക്തമായ പ്രത്യാക്രമണം നൽകുമെന്ന് ഇറാൻ മുന്നറിയിപ്പ് നൽകി. "ഈ വഞ്ചനയ്ക്ക് പിന്നിലുള്ളവർ വൈകാതെ ഖേദിക്കേണ്ടി വരും" എന്ന് കാബിനറ്റ് പ്രസ്താവനയിൽ വ്യക്തമാക്കിയിട്ടുണ്ട്. രാജ്യത്തിന്റെ ചരിത്രത്തിലെ തന്നെ ഏറ്റവും വലിയ ആഘാതമായി കണക്കാക്കപ്പെടുന്ന ഈ സംഭവത്തിൽ, ഇറാൻ സർക്കാർ 40 ദിവസത്തെ ഔദ്യോഗിക ദേശീയ ദുഃഖാചരണവും ഏഴ് ദിവസത്തെ പൊതു അവധിയും പ്രഖ്യാപിച്ചു.