അമ്മ മകളെ 30 അലങ്കാര മത്സ്യങ്ങളെ പച്ചയ്ക്ക് തീറ്റിച്ചു

By Sruthi K M

Updated: Wednesday, February 17, 2016, 18:54 [IST]

ടോക്യോ: സ്വന്തം മാതാവില്‍ നിന്ന് മക്കള്‍ക്കേല്‍ക്കേണ്ടി വരുന്ന പീഡനങ്ങള്‍ ചെറുതൊന്നുമല്ല. ജപ്പാനില്‍ നടന്നതും അത്തരം മൃഗീയമായ പീഡനമാണ്. മുപ്പത് അലങ്കാര മത്സ്യങ്ങളെയാണ് പച്ചയ്ക്ക് മകളെ കൊണ്ട് തീറ്റിച്ചത്. ജപ്പാനിലെ ഒരമ്മയുടെ ശിക്ഷയിങ്ങനെയാണ്. അക്വോറിയത്തിലെ മീനുകളെയെല്ലാം കൊന്നശേഷം അമ്മയും കാമുകനും ചേര്‍ന്ന് മകളെ കൊണ്ട് തീറ്റിക്കുകയാണുണ്ടായത്.

അമ്മയുടെയും കാമുകന്റെയും പീഡനങ്ങളേല്‍ക്കേണ്ടി വരുന്നത് ഇതാദ്യമല്ല. ഇതിനുമുന്‍പ് പെണ്‍കുട്ടിയെ കട്ടിലില്‍ കെട്ടിയിട്ട് നാവില്‍ സിഗരറ്റ് വച്ച് പൊള്ളിച്ചിട്ടുണ്ട്. യുക്കൊ ഒഗാട്ട എന്ന യുവതിയാണ് മകളോട് ഈ ക്രൂരത കാട്ടിയത്. യുക്കൊ ഒഗാട്ടയെയും കാമുകന്‍ തകേഷി എഗാമിയെയും പോലീസ് അറസ്റ്റ് ചെയ്തിട്ടുണ്ട്.

വീട്ടിലെ അക്വോറിയത്തില്‍ ഉണ്ടായിരുന്ന മത്സ്യങ്ങളെ വാഷിംഗ് പൗഡര്‍ ഇട്ട് കൊന്നശേഷം പെണ്‍കുട്ടിയെ കൊണ്ട് തീറ്റിക്കുകയായിരുന്നു. പിടിച്ചുവെച്ചാണ് അമ്മയും കാമുകനും പെണ്‍കുട്ടിയെ തീറ്റിച്ചത്.

പെണ്‍കുട്ടിയെ ആശുപത്രിയില്‍ പ്രവേശിപ്പിച്ചിരിക്കുകയാണ്. പെണ്‍കുട്ടിക്ക് ഇപ്പോള്‍ കുഴപ്പമൊന്നുമില്ലെന്ന് ആശുപത്രി ഡോക്ടര്‍മാര്‍ അറിയിച്ചിട്ടുണ്ട്. നേരത്തെ പെണ്‍കുട്ടിയോട് കാണിച്ച ക്രൂരതയ്ക്ക് അമ്മയെയും കാമുകനെയും പോലീസ് അറസ്റ്റ് ചെയ്തിരുന്നു. ഇതു രണ്ടാമത്തെ തവണയാണ് സംഭവം ആവര്‍ത്തിക്കുന്നത്.