അമേരിക്കയില്‍ ഇനി ബൈഡന്റെ കാലം; ജോ ബൈഡനും കമലഹാരിസും ഇന്ന് സത്യപ്രതിജ്ഞ ചെയ്ത് അധികാരമേല്‍ക്കും

Updated: Wednesday, January 20, 2021, 9:52 [IST]

വാഷിംഗ്ടണ്‍: അമേരിക്കയുടെ 46ാം പ്രസിഡന്റായി ജോ ബൈഡനും 49ാം വൈസ് പ്രസിഡന്റായി കമല ഹാരിസും ഇന്ന് സത്യപ്രതിജ്ഞ ചെയ്ത് അധിമാകമേല്‍ക്കും. ഇന്ന് ഉച്ചയ്ക്ക് 12 മണിക്കാണ് ( ഇന്ത്യന്‍ സമയം 10.30) സത്യപ്രതിജ്ഞ ചെയ്യുക. അമേരിക്കയുടെ ചരിത്രത്തില്‍ ഏറ്റവും ഉയര്‍ന്ന പ്രായത്തില്‍ അധികാരമേല്‍ക്കുന്ന പ്രസിഡന്റാണ് ജോ ബൈഡന്‍. വൈസ് പ്രസിഡന്റ് പദവിയില്‍ എത്തുന്ന ആദ്യ വനിത കൂടിയാണ് കമല ഹാരിസ്. യുസ് വൈസ് പ്രസിഡന്റ് ആകുന്ന ആദ്യ ഇന്ത്യന്‍ വംശജ കൂടിയാണ് കമല ഹാരിസ്.

മുന്‍ കാലങ്ങളില്‍ അമേരിക്കന്‍ പ്രസിഡന്റിന്റെ സത്യപ്രതിജ്ഞ ചടങ്ങ് വന്‍ ജനക്കൂട്ടത്തിന്റെ സാന്നിധ്യത്തിലായിരുന്നു നടന്നിരുന്നത്. എന്നാല്‍ ഇത്തവണ വെറും 1000 പേര്‍ക്ക് മാത്രമാണ് ചടങ്ങില്‍ പങ്കെടുക്കാന്‍ സാധിക്കുക. ആക്രമങ്ങള്‍ നടക്കാന്‍ സാധ്യതയുണ്ടെന്ന മുന്നറിയിപ്പിനെ തുടര്‍ന്ന് അതീവ സുരക്ഷയാണ് രാജ്യ തലസ്ഥാനത്ത് ഏര്‍പ്പെടുത്തിയിരിക്കുന്നത്.

അതേസമയം, അധികാര കൈമാറ്റത്തിന് ഡൊണാള്‍ഡ് ട്രംപ് എത്തില്ലെന്നതും ഈ വര്‍ഷത്തെ ഒരു പ്രത്യേകതയാണ്. ട്രംപ് ഇന്ന് രാവിലെയോടെ വൈറ്റ് ഹൗസ് വിട്ടെന്നാണ് സൂചന. മുന്‍ കാലങ്ങളില്‍ സ്ഥാനമൊഴിയുന്ന പ്രസിഡന്റും വൈസ് പ്രസിഡന്റും സത്യപ്രതിജ്ഞ ചടങ്ങിന് എത്താറുണ്ടായിരുന്നു. ഭരണത്തുടര്‍ച്ച ലഭിക്കാത്തതിനെ തുടര്‍ന്ന് നിരാശനായ ട്രംപ് ഫ്‌ലോറിഡ പാം ബീച്ചിലുള്ള സ്വന്തം ക്ലബ്ബിലേക്ക് പോയെന്നാണ് വിവരം.