ലങ്കന് പ്രസിഡന്റ് സിരിസേന ഞായറാഴ്ച ഇന്ത്യയിലെത്തും
കൊളംബോ: ശ്രീലങ്കന് പ്രസിഡന്റ് മൈത്രിപാല സിരിസേന ഞായറാഴ്ച ഇന്ത്യയിലെത്തും. അധികാരമേറ്റെടുത്തതിനു ശേഷമുള്ള ആദ്യത്തെ വിദേശ സന്ദര്ശനത്തിന് ലങ്കന് മാധ്യമങ്ങള് ഏറെ രാഷ്ട്രീയം പ്രാധാന്യം നല്കുന്നുണ്ട്.
പ്രധാനമന്ത്രി നരേന്ദ്രമോദിയടക്കമുള്ള ഉന്നത നേതാക്കളുമായുള്ള ചര്ച്ച, ബുദ്ധ് ഗയ, തിരുപ്പതി തുടങ്ങിയ പുണ്യസ്ഥലങ്ങളില് സന്ദര്ശനം എന്നിവയാണ് മൂന്നു ദിവസത്തെ പരിപാടികളില് ഉള്പ്പെടുത്തിയിട്ടുള്ളത്.
മഹീന്ദ രാജപക്സയെ തോല്പ്പിച്ച സിരിസേന ഇന്ത്യയുമായുള്ള ബന്ധം മെച്ചപ്പെടുത്തുന്നതിന് മുന്തിയ പരിഗണന നല്കുമെന്ന് പ്രഖ്യാപിച്ചിരുന്നു. മുന് സര്ക്കാറിന്റെ കാലത്ത് ചൈനയും പാകിസ്താനുമായി കൂടുതല് സഹകരിക്കാന് തീരുമാനിച്ചത് ഇന്ത്യക്ക് വന് സുരക്ഷാ ഭീഷണിയുണ്ടാക്കിയിരുന്നു. പുതിയ സര്ക്കാര് ഇത്തരം കരാറുകള് റദ്ദാക്കുകയോ പുനപ്പരിശോധിക്കുകയോ ചെയ്യുമെന്ന് പ്രഖ്യാപിച്ചിട്ടുണ്ട്.
നരേന്ദ്ര മോദി സര്ക്കാറിന്റെ തന്ത്രപ്രധാനമായ ഒരു നയതന്ത്രവിജയം കൂടിയായിരുന്നു ലങ്കന് തിരഞ്ഞെടുപ്പ്. ഔദ്യോഗികമായി രാജ്പക്സയെ പിന്തുണച്ചിരുന്നുവെങ്കിലും ഇന്ത്യന് രഹസ്യാന്വേഷ.ണ ഏജന്സിയായ റോ സിരിസേനയുടെ വിജയത്തിനുവേണ്ടിയുള്ള അണിയറ പ്രവര്ത്തനങ്ങള് നടത്തുകയായിരുന്നു. തമിഴ് വംശഹത്യയുടെ പേരില് കുറ്റാരോപിതനായ രാജപക്സയ്ക്കെതിരേയുള്ള വികാരം സിരിസേനയ്ക്ക് അനുകൂലമാക്കുന്നതില് ഇന്ത്യന് സംഘടനകള് വിജയം കണ്ടതായി റിപ്പോര്ട്ടുകളുണ്ടായിരുന്നു.
ആര്ക്കാണ് മുന്തൂക്കമെന്ന് മനസ്സിലാക്കാന് ബുദ്ധിമുട്ടേറിയ സാഹചര്യത്തിലായിരുന്നു ഈ ഡബിള് ഗെയിം. ഇന്ത്യയെ സംബന്ധിച്ചിടത്തോളം സുരക്ഷയുടെ കാര്യത്തില് ഏറെ തന്ത്രപ്രധാനമായ സ്ഥലമാണ് ശ്രീലങ്ക. പാകിസ്താനും ചൈനയും ഇവിടെ ആധിപത്യം ഉറപ്പിക്കുന്നതും സൈനിക്കത്താവളങ്ങള് ഉണ്ടാക്കുന്നതും ഇന്ത്യയ്ക്ക് ഭീഷണിയായിരുന്നു. രാജപക്സയെ വെറുപ്പിക്കാതിരിക്കുകയും അതേ സമയം ഇന്ത്യന് താത്പര്യങ്ങള് സംരക്ഷിക്കപ്പെടുന്നുവെന്ന് ഉറപ്പുവരുത്തുകയും ചെയ്യുകയെന്ന തന്ത്രമാണ് ഇന്ത്യ സ്വീകരിച്ചത്.