ലോകത്തിലെ ഏറ്റവും നീളം കൂടിയ പെരുന്പാന്പ് ചത്തു

കൊലാലംപൂര്‍: ലോകത്തിലെ ഏറ്റവും നീളം കൂടിയ പെരുമ്പാമ്പ് ചത്തു. ദിവസങ്ങള്‍ക്ക് മുമ്പ് മലേഷ്യയിലെ പെനാഗിലാണ് പാമ്പിനെ കണ്ടെത്തിയത്. നിര്‍മ്മാണത്തിലിരിയ്ക്കുന്ന കെട്ടിടത്തിന് സമീപത്ത് നിന്നും തൊഴിലാളികളാണ് പാമ്പിനെ കണ്ടെത്തിയത്.

എട്ട് മീറ്റര്‍ നീളവും 250 കിലോ ഭാരവുമുള്ള പാമ്പിനെ വ്യാഴാഴ്ചയാണ് തൊഴിലാളികള്‍ കണ്ടെത്തിയത്. എന്നാല്‍ മുട്ടയിട്ട് മൂന്ന് ദിവസം കഴിഞ്ഞപ്പോള്‍ പാമ്പ് ചത്തു. ഞായറാഴ്ചയാണ് ലോകത്തിലെ നീളം കൂടിയ പെരുമ്പാമ്പ് ചത്തത്.

ലോകത്ത് ഇതുവരെ മനുഷ്യന്‍ പിടികൂടുന്നവയില്‍ ഏറ്റവും നീളം കൂടിയ പാമ്പായിരുന്നു പെനാഗിലേത്. മുന്‍പ് കന്‍സാസ് നഗരത്തിലെ ഒരു വീട്ടില്‍ നിന്നും പിടികൂടിയ പാമ്പായിരുന്നു നീളത്തിന്റെ പേരില്‍ ഗിന്നസ് റെക്കോര്‍ഡില്‍ ഇടം നേടിയത്. 7.67 മീറ്റര്‍ നീളമുള്ള പാമ്പിന് 158 കിലോ ഭാരം ഉണ്ടായിരുന്നു.

പെനാഗില്‍ നിന്നും കണ്ടെത്തിയ പാമ്പിനെ തൊഴിലാളികള്‍ വനംവകുപ്പ് ഉദ്യോഗസ്ഥര്‍ക്ക് കൈമാറിയിരുന്നു. പിഴുത് വീണ ഒരു മരത്തിനടയില്‍ അവശ നിലയിലായിരുന്നു പാമ്പിനെ കണ്ടെത്തിയത്.

English summary

'Longest-ever' captured python dies in Malaysia