ലുലു ഗ്രൂപ്പിനെ കസാഖിസ്ഥാനും വേണം: യൂസഫലിയെ നേരിട്ട് കണ്ട് പ്രധാനമന്ത്രി; വന്‍ പദ്ധതി വരുന്നു

Updated: Saturday, September 13, 2025, 7:59 [IST]

കാർഷിക-വ്യാപാര മേഖലയിൽ വൻ കുതിപ്പിന് ലക്ഷ്യമിട്ട് ലുലു ഗ്രൂപ്പ് ഇന്റർനാഷനലുമായി സഹകരിക്കാന്‍ ഒരുങ്ങി കസാഖ്സ്ഥാന്‍. സഹകരണവുമായി ബന്ധപ്പെട്ട കാര്യങ്ങള്‍ ചർച്ച ചെയ്യാനായി കസാഖ് പ്രധാനമന്ത്രി ഓൾഷാസ് ബെക്ടെനോവ്, ലുലു ഗ്രൂപ്പിന്റെ സ്ഥാപകനും ചെയർമാനുമായ എം എ യൂസഫലിയുമായി നേരിട്ട് കൂടിക്കാഴ്ച നടത്തി. കാർഷിക-വ്യവസായ മേഖലയിലെ സംയുക്ത നിക്ഷേപ പദ്ധതികളും വ്യാപാര സാധ്യതകളും യോഗ്യത്തില്‍ ചർച്ചാ വിഷയമായി.

മാംസ സംസ്കരണ പ്ലാന്റും കാർഷികോൽപ്പന്ന വിതരണ കേന്ദ്രവും സ്ഥാപിക്കുന്നതിനാണ് പ്രത്യേക ശ്രദ്ധ നൽകുന്നത്. കൂടിക്കാഴ്ചയിൽ, യൂസഫലി, കസാഖ്സ്ഥാനിൽ നിന്ന് മാംസവും കാർഷികോൽപ്പന്നങ്ങളും ഇറക്കുമതി ചെയ്യുന്നതിന്റെ പ്രാധാന്യം എടുത്തുപറഞ്ഞതായി റിപ്പോർട്ടുകള്‍ വ്യക്തമാക്കുന്നു. കസാഖ്സ്ഥാന്റെ കാർഷിക മേഖലയുടെ വലിയ സാധ്യതകളും അനുകൂലമായ നിക്ഷേപ അന്തരീക്ഷവും ചൂണ്ടിക്കാട്ടി, ശക്തമായ സഹകരണത്തിനും അദ്ദേഹം ആഹ്വാനം ചെയ്തു.

ലുലു ഗ്രൂപ്പിന്റെ ആഗോള വിതരണ ശൃംഖല, പ്രത്യേകിച്ച് മിഡിൽ ഈസ്റ്റ്, ഏഷ്യ, യൂറോപ്പ് എന്നിവിടങ്ങളിലെ 250-ലധികം ഹൈപ്പർമാർക്കറ്റുകൾ, കസാഖ് ഉൽപ്പന്നങ്ങൾക്ക് വിശാലമായ വിപണി ഉറപ്പാക്കുമെന്നാണ് പ്രതീക്ഷ. , അബുദാബി ആസ്ഥാനമായി പ്രവർത്തിക്കുന്ന ലുലു ഗ്രൂപ്പിന്റെ ശക്തമായ ശൃംഖല, കസാഖ് കാർഷികോൽപ്പന്നങ്ങൾ ആഗോള വിപണിയിലെത്തിക്കാൻ പ്രയോജനപ്പെടുത്തുമെന്നും യൂസഫലി വ്യക്തമാക്കി.

കസാഖ്സ്ഥാനിൽ ഒരു അത്യാധുനിക മാംസ സംസ്കരണ പ്ലാന്റും കാർഷികോൽപ്പന്നങ്ങൾ വാങ്ങുന്നതിനുള്ള വിതരണ കേന്ദ്രവും സ്ഥാപിക്കാനുള്ള ലുലു ഗ്രൂപ്പിന്റെ പദ്ധതി ചർച്ചയിൽ പ്രധാന വിഷയമായിരുന്നു. ഈ പദ്ധതികൾ, മൂല്യവർധിത ഉൽപ്പന്നങ്ങൾ ഉത്പാദിപ്പിക്കുന്നതിനും കയറ്റുമതി വർധിപ്പിക്കുന്നതിനും സഹായിക്കും. കസാഖ്സ്ഥാൻ 75% ഭൂവിസ്തൃതി കാർഷിക ആവശ്യങ്ങൾക്ക് അനുയോജ്യമാണെങ്കിലും, നിലവിൽ 30% മാത്രമാണ് ഉപയോഗിക്കുന്നത്. ഈ പദ്ധതികൾ ഈ സാധ്യതകൾ പ്രയോജനപ്പെടുത്തി, പ്രാദേശിക ഉൽപ്പാദനവും വിതരണവും ശക്തിപ്പെടുത്തും.

കസാഖ്സ്ഥാന്റെ കാർഷിക മേഖല, രാജ്യത്തിന്റെ സമ്പദ്‌വ്യവസ്ഥയിൽ 5.1% സംഭാവന ചെയ്യുന്നു. 45% ജനസംഖ്യ ഗ്രാമീണ മേഖലയിൽ താമസിക്കുന്നു. 2023-ൽ, 207 കാർഷിക പദ്ധതികൾക്കായി 358 മില്യൺ ഡോളർ നിക്ഷേപം നടത്തി, പുതിയ സാങ്കേതിക വിദ്യകളും ഗവേഷണവും ഉപയോഗിച്ച് ഉൽപ്പാദനക്ഷമത മൂന്നിരട്ടിയാക്കാൻ ലക്ഷ്യമിടുന്നു. ലുലു ഗ്രൂപ്പുമായുള്ള സഹകരണം, ഈ ലക്ഷ്യങ്ങൾ കൈവരിക്കുന്നതിന് സുപ്രധാന പങ്ക് വഹിക്കുമെന്നാണ് പ്രതീക്ഷ. കസാഖ് സർക്കാർ, ജോയിന്റ് അഗ്രികൾചറൽ ടെക്നോപാർക്കുകൾ, എക്സ്പോർട്ട്-ഓറിയന്റഡ് ലോജിസ്റ്റിക്സ് ഹബ്ബുകൾ, ഇ-കൊമേഴ്സ് എന്നിവയിലൂടെ സഹകരണം വിപുലീകരിക്കാൻ തയ്യാറാണ്.

കൂടിക്കാഴ്ചയെ തുടർന്ന്, പദ്ധതികൾ നടപ്പാക്കാൻ ആവശ്യമായ എല്ലാ സഹായങ്ങളും സർക്കാർ ഏജൻസികൾക്ക് നൽകാൻ പ്രധാനമന്ത്രി ബെക്ടെനോവ് നിർദേശം നൽകി. കസാഖ്സ്ഥാൻ, നിക്ഷേപകർക്ക് നികുതി ഇളവുകൾ, ലാൻഡ് ലീസ്, സബ്സിഡികൾ എന്നിവ വാഗ്ദാനം ചെയ്യുന്നു, ഇത് ലുലു ഗ്രൂപ്പിന്റെ പദ്ധതികൾ വേഗത്തിൽ നടപ്പാക്കാൻ സഹായിക്കും. ഈ വർഷം കസാഖ്സ്ഥാൻ 16.6 ദശലക്ഷം ടൺ ധാന്യങ്ങളും 5 ദശലക്ഷം ടൺ ഫോറേജ് വിളകളും ഉത്പാദിപ്പിച്ചു. തുർക്കിസ്ഥാൻ മേഖലയിൽ, ആധുനിക സാങ്കേതിക വിദ്യകൾ ഉപയോഗിച്ച് ഉൽപ്പാദനക്ഷമത അഞ്ചിരട്ടി വർധിച്ചു. 1,543 ഹെക്ടറിൽ ജലസേചന സംവിധാനം പൂർത്തീകരിച്ചത്, 3.2 മില്യൺ ഡോളറിന്റെ നിക്ഷേപത്തോടെ, കാർഷിക മേഖലയെ കൂടുതൽ ശക്തിപ്പെടുത്തി.

ലുലു ഗ്രൂപ്പ് റീട്ടെയിൽ ഇന്ന് ഫുഡ് പ്രോസസിംഗ്, ലോജിസ്റ്റിക്സ്, റിയൽ എസ്റ്റേറ്റ് മേഖലകളിൽ ആഗോള ശക്തിയായി മാറിയിരിക്കുകയാണ്. 2025-ലെ ഫോർബ്സ് റിയൽ-ടൈം ബില്യണേഴ്സ് പട്ടികയിൽ, 5.4 ബില്യൺ ഡോളർ ആസ്തിയോടെ യൂസഫലി 748-ാം സ്ഥാനത്താണ്. ഇന്ത്യ, ഒമാൻ, ഖത്തർ എന്നിവിടങ്ങളിൽ ഫുഡ് പ്രോസസിംഗ്, ലോജിസ്റ്റിക്സ് പദ്ധതികൾ നടപ്പാക്കുന്ന ലുലു, കസാഖ്സ്ഥാന്റെ കാർഷിക മേഖലയെ ആഗോള വിപണിയിലേക്ക് എത്തിക്കാൻ പോകുന്നു.