കുവൈത്ത്:സ്വപ്നത്തില് പോലും പ്രതീക്ഷിക്കാത്ത 'പണി' സ്പോണ്സര്ക്ക് നല്കി ജോലിക്കാരി നാട്ടിലേയ്ക്ക്
കുവൈത്ത് സിറ്റി: കഷ്ടപ്പെടുത്തിയ സ്പോണ്സര്ക്ക് ഉഗ്രന് പണി കൊടുത്ത് വീട്ടുജോലിക്കാരി നാട്ടിലേയ്ക്ക് മടങ്ങി. കുവൈത്തിലാണ് സംഭവം. കരാര് അവസാനിച്ചതിനെത്തുടര്ന്ന് നാട്ടിലേയ്ക്ക് മടങ്ങിയ സ്ത്രീയാണ് വിമാനം പുറപ്പെടുന്നതിന് തൊട്ടുമുന്പ് സ്പോണ്സറിനെ വിളിച്ച് ഞെട്ടിയ്ക്കുന്ന ചില കാര്യങ്ങള് പറഞ്ഞത്.
തന്നോട് ഒരിയ്ക്കലും മാന്യമായി പെരുമാറാതിരുന്ന തൊഴിലുടമയില് നിന്നും 2000 കുവൈത്ത് ദിനാര് മോഷ്ടിച്ചുവെന്നാണ് യുവതി വെളിപ്പെടുത്തിയത്. എന്നാല് ഈ തുക ഒറ്റ ദിവസം കൊണ്ട് മോഷ്ടിച്ചതല്ല കേട്ടോ. വീട്ടുജോലിയ്ക്ക് നിന്ന കാലയളവില് ആണ് ഈ തുകയത്രയും താന് കട്ടെടുത്തതെന്നും യുവതി പറഞ്ഞു.
സ്പോണ്സറെ അസഭ്യം പറയുകയും ശപിയ്ക്കുകയും ചെയ്ത യുവതി ധൈര്യമുണ്ടെങ്കില് തന്നെ പിടികൂടാന് സ്പോണ്സറെ വെല്ലുവിളിയ്ക്കുകയും ചെയ്തു. സ്പോണ്സറുടെ വീട്ടില് നരകതുല്യമായ ജീവിതമായിരുന്നു സ്ത്രീയ്ക്കെന്നും അതിനാലാണ് ഇത്തരത്തില് പെരുമാറിയതെന്നും കുവൈത്ത് സ്വദേശിയായ മറിയം എന്ന പെണ്കുട്ടി പറയുന്നു. എന്തായാലും സംഭവം സോഷ്യല് മീഡിയയില് ഹിറ്റായി മാറുകയാണ്.