ഗയാനയില്‍ മലയാളിയെ കുത്തിക്കൊന്നു

ഗയാന: ലാറ്റിനമേരിക്കയിലെ ഗയാനയില്‍ മലയാളി യുവാവിനെ കുത്തിക്കൊന്നു. കോട്ടയം സ്വദേശിയായ കാച്ചപ്പള്ളിയില്‍ പീറ്റര്‍ ജെയിംസ് എന്ന മുപ്പത്കാരനാണ് കൊല്ലപ്പെട്ടത്.

ഗയാനയിലെ ബീച്ചില്‍ വച്ച് ഒക്ടോബര്‍ 23 ന് വ്യാഴാഴ്ചയായിരുന്നു സംഭവം. മോഷണ ശ്രമം ചെറുക്കുന്നതിനിടെയാണ് പീറ്റര്‍ ജെയിംസ് അക്രമികളുടെ കത്തിക്കിരയായത്.

മെയില്‍ നഴ്‌സ് ആയ പീറ്റര്‍, ഗയാന ബെല്‍വന്ത് സിങ് ആശുപത്രിയിലാണ് ജോലി ചെയ്തിരുന്നത്. നാല് വര്‍ഷമായി ഗയാനയില്‍ എത്തിയിട്ട്.

ദീപാവലി ആഘോഷിക്കാനാണ് പീറ്റര്‍ ജയിംസ് സുഹൃത്തുക്കള്‍ക്കൊപ്പം ബീച്ചിലെത്തിയത്. അപ്പോഴായിരുന്നു മോഷ്ടാക്കള്‍ ആക്രമിച്ചത്. ഗുരുതരമായി പരിക്കേറ്റ പീറ്ററിനെ ഉടന്‍ ആശുപത്രിയിലെത്തിച്ചെങ്കിലും മരിച്ചു.

ഗയാനയില്‍ ഇത്തരം പിടിച്ചുപറിയും മോഷണവും പതിവാണ്. എന്നാല്‍ മലയാളി ഇത്തരത്തില്‍ ആക്രമിക്കപ്പെടുന്നത് ആദ്യമായിട്ടാണ്.

കോട്ടയം ആര്‍പ്പൂക്കര സ്വദേശിയാണ് പീറ്റര്‍. കാച്ചപ്പള്ളി കെപി ജെയിംസിന്റേയും റോസമ്മയുടേയും മകനാണ്. അടുത്ത ജനുവരിയില്‍ നാട്ടിലേക്ക് വരാന്‍ ഒരുങ്ങിയിരിക്കുകയായിരുന്നു പീറ്റര്‍.

English summary

Malayali stabbed to death in Guyana