തുടര്‍ച്ചയായി വീഡിയോ ഗെയിം കളിച്ച യുവാവ് മരിച്ചു

തായ്‌പേയ്: മൂന്ന് ദിവസം തുടര്‍ച്ചയായി വീഡിയോ ഗെയിം കളിച്ചതിനെത്തുടര്‍ന്ന് യുവാവ് മരിച്ചു. വടക്കന്‍ തായ്‌വാനിലാണ് സംഭവം നടക്കുന്നത്. മൂന്ന് ദിവസം ഇന്റര്‍നെറ്റ് കഫെയിലിരുന്ന് വീഡിയോ ഗെയിം കളിച്ച ഹ്‌സീ എന്ന മുപ്പത്തിരണ്ടുകാരനാണ് മരിച്ചത്. തുടര്‍ച്ചയായി വീഡിയോ ഗെയിം കളിച്ചതിനെ തുടര്‍ന്നുണ്ടായ ഹൃദയാഘാതമാണ് മരണത്തിനു കാരണമായത്.

തായ്‌വാനിലെ കവോസിയുങ് നഗരത്തിലെ ഒരു ഇന്റര്‍നെറ്റ് കഫെയാണ് ഈ ദാരുണ സംഭവത്തിന് കേന്ദ്രമായത്. ഹ്‌സീ ഇന്റര്‍നെറ്റ് കഫെയിലെ സ്ഥിരം സന്ദര്‍ശകനാണെന്നാണ് കഫെ ഉടമ പറയുന്നത്. വീഡിയോ ഗെയിം കളിച്ച് ക്ഷീണിക്കുമ്പോള്‍ കഫെയില്‍ തന്നെ ഇരുന്ന് ഉറങ്ങാറുണ്ടെന്നും ഉടമ പോലീസിനോട് പറഞ്ഞു.

ഇയാളെ കഫെയിലെ മുറിയില്‍ മരിച്ച നിലയിലാണ് കണ്ടെത്തിയത്. ഉറങ്ങുകയാണെന്നു ആദ്യം വിചാരിച്ച ഉടമ ഇയാളെ വിളിച്ചുണര്‍ത്താന്‍ പോയില്ല. പിന്നീട് ഒരു കഫേക്കാരന്‍ ഇയാള്‍ ശ്വാസോഛ്വാസം നടത്തുന്നില്ലെന്ന് പറയുകയും തുടര്‍ന്ന് ആശുപത്രിയില്‍ എത്തിക്കുകയുമായിരുന്നു.

ആശുപത്രിയില്‍ എത്തിക്കുന്നതിനു മുന്‍പ് തന്നെ ഇയാള്‍ മരിച്ചിരുന്നുവെന്ന് ഡോക്ടര്‍ സ്ഥിരീകരിച്ചു. വീഡിയോ ഗെയിം തുടര്‍ച്ചയായി കളിച്ചതിനെ തുടര്‍ന്ന് കഴിഞ്ഞ ദിവസം ഒരു തായ്‌വാന്‍ സ്വദേശി മരിച്ചിരുന്നുവെന്നും പോലീസ് വ്യക്തമാക്കുന്നു.

English summary

Taiwanese man dies after three day non stop playing video game in internet cafe.