ഭര്‍ത്താവിനെ പേടി; മധുവിധു തീരും മുന്പേ 15കാരിയായ ഭാര്യ പൊലീസില്‍ അഭയം തേടി

കൊളംബോ: ഭര്‍ത്താവിന്റെ ക്രൂരമായ മര്‍ദ്ദനമുറകളില്‍ നിന്നും രക്ഷതേടി 15കാരിയായ ഭാര്യ പൊലീസില്‍. 21കാരനായ യുവാവാണ് പെണ്‍കുട്ടിയുടെ പരാതിയെത്തുടര്‍ന്ന് അറസ്റ്റിലായത്. പ്രായപൂര്‍ത്തിയാകും മുമ്പ് വിവാഹിതയായതാണ് പെണ്‍കുട്ടി. മൂന്ന് മാസത്തോളമായി ഇവരുടെ വിവാഹം കഴിഞ്ഞിട്ടും. മത്സ്യ ബന്ധനത്തൊഴിലാളിയാണ് പെണ്‍കുട്ടിയുടെ ഭര്‍ത്താവ്.

സ്ഥിരമായി മദ്യപിച്ചെത്തുന്ന യുവാവ് പെണ്‍കുട്ടിയേയും മദ്യപിയ്ക്കാന്‍ നിര്‍ബന്ധിയ്ക്കുമായിരുന്നു. വിസമ്മതിയ്ക്കുമ്പോള്‍ അതിക്രൂരമായി മര്‍ദ്ദിയ്ക്കും. ഇരുമ്പ് ദണ്ഡ് കൊണ്ട് പലതവണ പെണ്‍കുട്ടിയുടെ തലയ്ക്കടിച്ച് പരിക്കേല്‍പ്പിച്ചിരുന്നു, മദ്യത്തില്‍ മൂത്രം കലര്‍ത്തിയാണ് യുവാവ് പെണ്‍കുട്ടിയ്ക്ക് നല്‍കാന്‍ ശ്രമിച്ചത്.

യുവാവിന്റെ ക്രൂരതകള്‍ അതിര് കടന്നപ്പോഴാണ് പരാതിയുമായി പെണ്‍കുട്ടി പൊലീസിനെ സമീപിച്ചത്. മൂന്ന് മാസത്തിനുള്ളില്‍ താന്‍ അനുഭവിച്ച കൊടിയ പീഡനങ്ങളെപ്പറ്റി പൊലീസിനോട് പറഞ്ഞു. ദിക്വെല്ല പൊലീസിലാണ് പരാതി നല്‍കിയത്. പരാതിയെത്തുടര്‍ന്ന് യുവാവിനെ പൊലീസ് അറസ്റ്റ് ചെയ്തു. മര്‍ദ്ദനമേറ്റ് ആരോഗ്യം നശിച്ച പെണ്‍കുട്ടിയെ ചികിത്സയ്ക്കായി ആശുപത്രിയിലേയ്ക്ക് മാറ്റി.

English summary

Minor wife reports husband for brutality, torture