ഇസ്രായേല് സുന്ദരിക്കൊപ്പം സെല്ഫിയെടുത്തു; മിസ് ഇറാഖിന്റെ കുടുംബത്തിന് രാജ്യം വിടേണ്ടിവന്നു
ബാഗ്ദാദ്: ഒരു സെല്ഫി എടുക്കുന്നതില് എന്തിരിക്കുന്നു എന്ന് കരുതേണ്ട. ആര്ക്കൊപ്പം എടുക്കുന്നു എന്നത് വളരെ നിര്ണായകമാണ്. അല്ലെങ്കില് മിസ് ഇറാഖിന്റെ കുടുംബത്തിന്റെ ഗതി വരും.
മിസ് ഇസ്രായേല് ആയ അദാര് ഗാന്ഡെല്സ്മാനൊപ്പം ഒരു സെല്ഫിക്ക് പോസ് ചെയ്തതാണ് മിസ് ഇറാഖ് സാറ ഇദാന്. എന്നാല് ഇത് ഇറാഖില് വന് വിവാദത്തിനാണ് തിരി കൊളുത്തിയത്. വിശ്വ സുന്ദരി മത്സരത്തിന് എത്തിയപ്പോള് ആയിരുന്നു രണ്ട് പേരും ചേര്ന്ന് ഒരു സെല്ഫി എടുത്തത്.
സാറ ഇദാന് ഇത് തന്റെ ഇന്സ്റ്റാഗ്രാമില് പോസ്റ്റ് ചെയ്യുകയും ചെയ്തു. സ്നഹേവും സമാധാനവും എന്ന കുറിപ്പോടെ ആയിരുന്നു ഇത്. എന്നാല് ഇതിനെ അംഗീകരിക്കാന് പല ഇറാഖികള്ക്കും കഴിഞ്ഞില്ല. പിന്നീട് സോഷ്യല് മീഡിയയില് ഇത് വലിയ ചര്ച്ചകള്ക്കും വഴിവച്ചു.
ഇദാനെ കൊന്നുകളയും എന്ന് വരെ ഭീഷണി ഉയര്ന്നു എന്നാണ് പറയുന്നത്. മിസ് ഇസ്രായേല് തന്നെയാണ് ഇക്കാര്യം വെളിപ്പെടുത്തിയത്. ഭീഷണികളെ തുടര്ന്ന് ഇദാന്റെ കുടുംബം രാജ്യവിട്ട് ഓടിപ്പോകേണ്ട സ്ഥിതിയുണ്ടായി എന്നും ഇവര് ഒരു ഇസ്രായേല് മാധ്യമത്തോട് പറഞ്ഞു. ചിത്രം പിന്വലിച്ചില്ലെങ്കില് മിസ് ഇറാഖ് പട്ടം എടുത്ത് കളയും എന്നും ഭീഷണിപ്പെടുത്തിയത്രെ.
അങ്ങനെ ഒരു ചിത്രം എടുത്തതുകൊണ്ട് താന് ഇസ്രായേലിനെ പിന്തുണക്കുന്നു എന്ന് അര്ത്ഥമില്ലെന്നാണ് സാറ ഇദാന് പ്രതികരിച്ചത്. അറബ് രാജ്യങ്ങളോടുള്ള ഇസ്രായേല് നിലപാടിനേയും താന് പിന്തുണക്കുന്നില്ലെന്ന് ഇദാന് വ്യക്തമാക്കിയിട്ടുണ്ട്. ആ ചിത്രം പലസ്തീന് വിഷയത്തെ അപമാനിക്കുന്നതായി ആര്ക്കെങ്കിലും തോന്നിയിട്ടുണ്ടെങ്കില് താന് മാപ്പ് ചോദിക്കുന്നതായും ഇദാന് വ്യക്തമാക്കിയിട്ടുണ്ട്.