മിസ് സൗത്ത് ആഫ്രിക്ക ലോക സുന്ദരി
ലണ്ടന്: 2014ലെ മിസ് വേള്ഡായി മിസ് ദക്ഷിണാഫ്രിക്ക റോളിന് സ്ട്രോസ്(22) തെരഞ്ഞെടുക്കപ്പെട്ടു. ലണ്ടനില് നടന്ന മത്സരത്തില് വിവിധ രാജ്യങ്ങളില്നിന്നായെത്തിയ 120 മത്സരാര്ത്ഥികളെ പിന്തള്ളിയാണ് റോളിന് ലോകസുന്ദരിപ്പട്ടം കരസ്ഥമാക്കിയത്. മിസ് ഹംഗറി എഡീന കുള്സാര് രണ്ടാം സ്ഥാനം നേടിയപ്പോള് മിസ് അമേരിക്ക എലിസബത്ത് സാഫ്രിത് മൂന്നാം സ്ഥാനം നേടി.
അമേരിക്ക, ഇംഗ്ലണ്ട്, ഹംഗറി, ഓസ്ട്രേലിയ, ദക്ഷിണാഫ്രിക്ക, എന്നിവിടങ്ങളില്നിന്നുള്ള സുന്ദരിമാരാണ് അവസാനഘട്ടത്തിലെത്തിയത്. ഇന്ത്യയില് നിന്നുള്ള ജയ്പുര് സുന്ദരി കോയല് റാണ അവസാന ഘട്ടത്തിന് തൊട്ടു മുന്പ് പിന്തള്ളപ്പെട്ടു. മെഡിക്കല് വിദ്യാര്ത്ഥിനിയാണ് കോയല്. 2.13ലെ ലോകസുന്ദരി മേഗന് യങ് പുതിയ സുന്ദരിയെ കിരീടം അണിയിച്ചു.
ലോക സൗന്ദര്യ മത്സരത്തില് പങ്കെടുക്കേണ്ടിയിരുന്ന മിസ് ഹോണ്ടൂറാസ് മരിയ ജോസ് അല്വറാഡോ(19) രണ്ടാഴ്ച മുന്പ് കൊല്ലപ്പെട്ടതിനെ തുടര്ന്ന് പരിപാടിയുടെ പൊലിമ കുറച്ചിരുന്നു. സഹോദരി സോഫിയയുടെ കാമുകന് ആണ് മരിയയെയും സഹോദരിയെയും കൊലപ്പെടുത്തിയത്.
ഒരു പിറന്നാള് ആഘോഷത്തിനിടെ സഹോദരി സോഫിയ മറ്റൊരാള്ക്കൊപ്പം നൃത്തം ചെയ്തതിനെ തുടര്ന്നായിരുന്നു കൊലപാതകം. കൊലയ്ക്കുശേഷം പ്രതിയെ പോലീസ് പിടികൂടിയിരുന്നു. അസൂയമൂലമാണ് കൊല നടത്തിയതെന്നായിരുന്നു ഇയാളുടെ കുറ്റസമ്മതം. മദ്യ ലഹരിയില് അക്രമിയുടെ തോക്കിനിരയായ മരിയയ്ക്ക് ലോക സൗന്ദര്യ മത്സരത്തില് ഏറെ സാധ്യത കല്പ്പിക്കപ്പെട്ടിരുന്നു.