പതിനഞ്ചുകാരിയുടെ പരാതി; മണ്ടേലയുടെ കൊച്ചുമകനെതിരെ ബലാത്സംഗക്കുറ്റം

By Anwar Sadath

Updated: Wednesday, August 19, 2015, 9:06 [IST]

ജോഹന്നസ്ബര്‍ഗ്: പതിനഞ്ചുകാരി പെണ്‍കുട്ടിയെ ബലാത്സംഗം ചെയ്യാന്‍ ശ്രമിച്ചെന്ന കുറ്റത്തിന് നെല്‍സണ്‍ മണ്ടേലയുടെ ചെറുമകനെ ജയിലിലടച്ചു. ആഗസ്ത് ഏഴിന് നടന്ന സംഭവത്തില്‍ ബലാത്സംഗക്കുറ്റം ചുമത്തി പോലീസ് ഇരുപതുകാരനായ യുവാവനെ അറസ്റ്റ് ചെയ്തിരുന്നു. കോടതിയില്‍ ഹാജരാക്കിയതിനുശേഷമായിരുന്നു ജയിലില്‍ റിമാന്‍ഡ് ചെയ്തത്.

യുവാവിനെ ജയിലില്‍ അടക്കുന്നതിനെതിരെ അഭിഭാഷകന്‍ വാദിച്ചെങ്കിലും ഗൗരവകരമായ കുറ്റമായതിനാല്‍ ജാമ്യം അനുവദിക്കാനാവില്ലെന്നായിരുന്നു ജഡ്ജിയുടെ നിലപാട്. പ്രതിയുടെ പേരോ പ്രായമോ വെളിപ്പെടുത്തിയിട്ടില്ല. ഒരു റെസ്റ്റൊറന്റ് ബാത്ത്‌റൂമില്‍വച്ച് യുവാവ് പെണ്‍കുട്ടിയെ യുവാവ് അക്രമിക്കുകയായിരുന്നെന്ന് പാര്‍ക്ക്‌വ്യൂ പോലീസ് വ്യക്തമാക്കി.

മണ്ടേലയുടെ ചെറുമകനായതിനാല്‍ തന്നെ വിശദമായ അന്വേഷണത്തിനൊടുവിലാണ് അറസ്റ്റ്. കേസ് അന്വേഷണം പൂര്‍ത്തിയായാല്‍ കുറ്റപത്രം സമര്‍പ്പിക്കുമെന്നും കോടതിയുടെ മേല്‍നോട്ടത്തിലായതിനാല്‍ കൂടുതല്‍ കാര്യങ്ങള്‍ വിശദമാക്കാന്‍ ബുദ്ധിമുട്ടുണ്ടെന്നും പോലീസ് വ്യക്തമാക്കി.

ചൈല്‍ഡ് പ്രൊട്ടക്ഷന്‍ ആക്ട് പ്രകാരവും ബലാത്സംഗത്തിനുമാണ് യുവാവിനെതിരെ കുറ്റം ചുമത്തിയതെന്നാണ് വിവരം. അതേസമയം, പ്രതിക്കുമേല്‍ ചുമത്തിയ കുറ്റം ശരിയല്ലെന്ന് ബന്ധുക്കള്‍ പറഞ്ഞു. പെണ്‍കുട്ടിക്കുണ്ടായ തെറ്റിദ്ധാരണ മൂലമോ മുന്‍വൈരാഗ്യം മൂലമോ ആകാം ഇത്തരമൊരു കേസ് നല്‍കാന്‍ ഇടയായതെന്നും ബന്ധുക്കള്‍ പ്രതികരിച്ചു.