നൈജറില്‍ ഭീകരാക്രമണം: രണ്ട് ഇന്ത്യക്കാർ കൊല്ലപ്പെട്ടു; ഒരാളെ തട്ടിക്കൊണ്ടുപോയി

നൈജറില്‍ ഭീകരാക്രമണത്തില്‍ രണ്ട് ഇന്ത്യക്കാർ കൊല്ലപ്പെട്ടു. ഒരാളെ ഭീകരപ്രവർത്തകർ തട്ടിക്കൊണ്ടുപോയതായും ഇന്ത്യൻ എംബസി അധികൃതർ അറിയിച്ചു. ഹീനമായ ആക്രമണമാണ് ഇന്ത്യക്കാർക്കെതിരെ നടന്നതെന്നും ആക്രമണത്തിൽ കൊല്ലപ്പെട്ടവരുടെ മൃതദേഹങ്ങൾ നാട്ടിലേക്ക് കൊണ്ടുവരുന്നതിനും തട്ടിക്കൊണ്ടുപോകപ്പെട്ട ഇന്ത്യക്കാരന്റെ സുരക്ഷിതമായ മോചനം ഉറപ്പാക്കുന്നതിനും പ്രാദേശിക അധികൃതരുമായി ബന്ധപ്പെട്ടിരിക്കുകയാണെന്നും ഇന്ത്യന്‍ എംബസി അറിയിച്ചു.

നൈജറിലെ എല്ലാ ഇന്ത്യക്കാർക്കും ജാഗ്രത പാലിക്കണമെന്ന് എംബസി മുന്നറിയിപ്പ് നൽകി. "ജൂലൈ 15-ന് നൈജറിലെ ഡോസോ മേഖലയിൽ നടന്ന ഹീനമായ ഭീകരാക്രമണത്തിൽ രണ്ട് ഇന്ത്യൻ പൗരന്മാർ ദാരുണമായി കൊല്ലപ്പെട്ടു, ഒരാൾ തട്ടിക്കൊണ്ടുപോകപ്പെട്ടു. ദുഃഖിതരായ കുടുംബങ്ങളോട് ഞങ്ങളുടെ ഹൃദയംഗമമായ അനുശോചനം അറിയിക്കുന്നു. നിയാമിയിലെ എംബസി മൃതദേഹങ്ങൾ നാട്ടിലേക്ക് കൊണ്ടുവരുന്നതിനും തട്ടിക്കൊണ്ടുപോകപ്പെട്ട ഇന്ത്യക്കാരന്റെ സുരക്ഷിത മോചനം ഉറപ്പാക്കുന്നതിനും പ്രാദേശിക അധികൃതരുമായി ബന്ധപ്പെട്ടിരിക്കുന്നു. നൈജറിലെ എല്ലാ ഇന്ത്യക്കാർക്കും ജാഗ്രത പാലിക്കണമെന്ന് അഭ്യർത്ഥിക്കുന്നു." എക്സിൽ പോസ്റ്റ് ചെയ്ത പ്രസ്താവനയിൽ എംബസി പറയുന്നു.

നൈജറിൽ വിദേശികൾക്കെതിരെ ആയുധധാരികളായ സംഘങ്ങൾ നടത്തുന്ന ആക്രമണങ്ങൾ അടുത്തിടെയായി വർധിച്ചുവരികയാണ്. ഈ സംഭവം വിദേശികളെ ലക്ഷ്യമിട്ട് നൈജറിന്റെ സംഘർഷബാധിത പ്രദേശങ്ങളിൽ നടക്കുന്ന ഏറ്റവും പുതിയ ആക്രമണവുമാണ്. ഈ വർഷം, 20 വർഷത്തിലധികം നൈജറിൽ സാമൂഹ്യ പ്രവർത്തനങ്ങളിൽ ഏർപ്പെട്ടിരുന്ന ഒരു ഓസ്ട്രിയൻ വനിത, ഏപ്രിലിൽ ഒരു സ്വിസ് വനിത, ഏപ്രിലിൽ തന്നെ അഞ്ച് ഇന്ത്യൻ തൊഴിലാളികൾ എന്നിവർ ഉൾപ്പെടെ നിരവധി പേർ തട്ടിക്കൊണ്ടുപോകപ്പെട്ടിട്ടുണ്ട്.

2023 ജൂലൈയിൽ സൈന്യം സർക്കാരിനെ അട്ടിമറിച്ചതിനുശേഷമാണ് നൈജറിലെ സുരക്ഷാ പ്രതിസന്ധി രൂക്ഷമായത്. അൽ-ക്വയ്ദ, ഇസ്ലാമിക് സ്റ്റേറ്റ് ഗ്രൂപ്പുകളുമായി ബന്ധപ്പെട്ട ജിഹാദി വിമത പ്രവർത്തനങ്ങളും നൈജർ നേരിടുന്നുണ്ട്. ആർമ്ഡ് കോൺഫ്ലിക്ട് ലൊക്കേഷൻ ആൻഡ് ഇവന്റ് ഡാറ്റാ പ്രോജക്ടിന്റെ കണക്കനുസരിച്ച്, ജൂൺ മാസം നൈജറിന്റെ ചരിത്രത്തിലെ ഏറ്റവും മോശം മാസങ്ങളിലൊന്നായിരുന്നു. ഐഎസ് പിന്തുണയുള്ള പോരാളികൾ ടില്ലബേരി, ഡോസോ മേഖലകളിൽ വൻതോതിലുള്ള ആക്രമണം നടത്തി, 100-ലധികം സാധാരണക്കാരെ കൊലപ്പെടുത്തി. ഗ്രാമപ്രദേശങ്ങളിൽ വൻതോതിലുള്ള ക്രൂരതകൾ വീണ്ടും ആരംഭിച്ചതിന്റെ സൂചനയായിരുന്നു ഈ ആക്രമണം.

English summary

Niger Terror Attack Resulting in Deaths of Two Indian Nationals and One Abduction