പലസ്തീൻ എന്ന ഒരു രാഷ്ട്രം ഉണ്ടാകില്ല; ആ വാഗ്ധാനം ഞങ്ങള്‍ നിറവേറ്റും: ബെഞ്ചമിന്‍ നെതന്യാഹു

പലസ്തീൻ രാഷ്ട്രം എന്നൊന്ന് ഉണ്ടാകില്ലെന്ന് വീണ്ടും ആവർത്തിച്ച് ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു. ജറുസലേമിന് സമീപമുള്ള മാലെ അഡുമിം എന്ന ഇസ്രായേൽ കുടിയേറ്റ കേന്ദ്രത്തിൽ നടന്ന ചടങ്ങില്‍ പങ്കെടുത്തുകൊണ്ട് സംസാരിക്കുകയായിരുന്നു അദ്ദേഹം. "പലസ്തീൻ രാഷ്ട്രം ഉണ്ടാകില്ലെന്ന ഞങ്ങളുടെ വാഗ്ദാനം ഞങ്ങൾ നിറവേറ്റും. ഈ സ്ഥലം ഞങ്ങളുടേതാണ്," നെതന്യാഹു ചടങ്ങിൽ പറഞ്ഞു. "ഞങ്ങളുടെ പൈതൃകം, ഭൂമി, സുരക്ഷ എന്നിവ ഞങ്ങൾ സംരക്ഷിക്കും... ഈ നഗരത്തിന്റെ ജനസംഖ്യ ഞങ്ങൾ ഇരട്ടിയാക്കും," അദ്ദേഹം വ്യക്തമാക്കി.

E1 എന്നറിയപ്പെടുന്ന 12 ചതുരശ്ര കിലോമീറ്റർ വിസ്തൃതിയുള്ള ഭൂമിയിൽ ഇസ്രായേൽ വർഷങ്ങളായി നിർമാണം നടത്താൻ ലക്ഷ്യമിട്ടുകൊണ്ടിരിക്കുകയാണ്. എന്നാൽ, അന്താരാഷ്ട്ര വിമർശനങ്ങളെ തുടർന്ന് പദ്ധതി വർഷങ്ങളായി മുടങ്ങിക്കിടക്കുകയാണ്. ജറുസലേമിനും മാലെ അഡുമിം കുടിയേറ്റ കേന്ദ്രത്തിനും ഇടയിൽ സ്ഥിതി ചെയ്യുന്ന ഈ പ്രദേശം, പലസ്തീൻ പ്രദേശത്തിന്റെ വടക്കും തെക്കും ബന്ധിപ്പിക്കുന്ന പാതകൾക്ക് സമീപമായാണ് സ്ഥിതി ചെയ്യുന്നത്.

കഴിഞ്ഞ മാസം, ഇസ്രായേലിന്റെ അതിവലതുപക്ഷ ധനമന്ത്രി ബെസലെൽ സ്മോട്രിച്ച്, E1-ൽ 3,400 വീടുകൾ നിർമിക്കാനുള്ള പദ്ധതികൾ പ്രഖ്യാപിച്ചിരുന്നു. ഈ പ്രഖ്യാപനം അന്താരാഷ്ട്ര തലത്തിൽ വിമർശനങ്ങൾക്ക് ഇടയാക്കി. ഐക്യരാഷ്ട്രസഭാ മേധാവി അന്റോണിയോ ഗുട്ടെറസ് കുടിയേറ്റം വെസ്റ്റ് ബാങ്കിനെ രണ്ടായി വിഭജിക്കുമെന്നും, ഒരു തുടർച്ചയായ പലസ്തീൻ രാഷ്ട്രത്തിന്റെ നിലനിൽപ്പിന് "നിർണായക ഭീഷണി" ഉയർത്തുമെന്നും പ്രതികരിച്ചു.

1967 മുതൽ ഇസ്രായേൽ അധിനിവേശം നടത്തുന്ന വെസ്റ്റ് ബാങ്കിലെ എല്ലാ ഇസ്രായേൽ കുടിയേറ്റങ്ങളും അന്താരാഷ്ട്ര നിയമപ്രകാരം നിയമവിരുദ്ധമാണ്. ബ്രിട്ടൻ, ഫ്രാൻസ് ഉൾപ്പെടെ പല പാശ്ചാത്യ രാജ്യങ്ങളും ഈ മാസം ഐക്യരാഷ്ട്രസഭയിൽ പലസ്തീൻ രാഷ്ട്രത്തെ അംഗീകരിക്കാൻ ഉദ്ദേശിക്കുന്നതായി പ്രഖ്യാപിച്ചിട്ടുണ്ട്. 2023 ഒക്ടോബറിൽ പലസ്തീൻ മിലിറ്റന്റ് ഗ്രൂപ്പായ ഹമാസിന്റെ ആക്രമണത്തെ തുടർന്ന് ഗാസയിൽ തുടങ്ങിയ വിനാശകരമായ യുദ്ധത്തിൽ ഇസ്രായേൽ വെടിനിർത്തലിന് സമ്മതിച്ചില്ലെങ്കിൽ ബ്രിട്ടൻ പലസ്തീനെ അംഗീകരിക്കുമെന്ന് വ്യക്തമാക്കിയിട്ടുണ്ട്.

ഇസ്രായേലിന്റെ അതിവലതുപക്ഷ മന്ത്രിമാർ സമീപ മാസങ്ങളിൽ വെസ്റ്റ് ബാങ്ക് പൂർണമായും കൂട്ടിച്ചേർക്കണമെന്ന് പരസ്യമായി ആവശ്യപ്പെട്ടിട്ടുണ്ട്. പീസ് നൗ എന്ന ഇസ്രായേൽ എൻജിഒ, വെസ്റ്റ് ബാങ്കിലെ കുടിയേറ്റ പ്രവർത്തനങ്ങൾ നിരീക്ഷിക്കുന്ന സംഘടന, E1-ലെ അടിസ്ഥാന സൗകര്യ പ്രവർത്തനങ്ങൾ ഏതാനും മാസങ്ങൾക്കുള്ളിൽ ആരംഭിക്കാമെന്നും, ഒരു വർഷത്തിനുള്ളിൽ വീടുകളുടെ നിർമാണം തുടങ്ങാമെന്നും കഴിഞ്ഞ ആഴ്ച പറഞ്ഞു. E1 പദ്ധതി "ഇസ്രായേലിന്റെ ഭാവിക്കും, സമാധാനപരമായ രണ്ട്-രാഷ്ട്ര പരിഹാരത്തിനുള്ള സാധ്യതകൾക്കും മാരകമാണ്" എന്ന് അവർ മുന്നറിയിപ്പ് നൽകി.

ഇസ്രായേൽ കൂട്ടിച്ചേർത്ത കിഴക്കൻ ജറുസലേം ഒഴിവാക്കിയാൽ, വെസ്റ്റ് ബാങ്കിൽ ഏകദേശം 30 ലക്ഷം പലസ്തീനികളും 5 ലക്ഷം ഇസ്രായേൽ കുടിയേറ്റക്കാരുമാണ് താമസിക്കുന്നത്.

English summary

No State of Palestine: Benjamin Netanyahu's Commitment to Promise