Oscar 2025 Live: മികച്ച സിനിമ അനോറ, നടൻ ആഡ്രിയൻ ബ്രോഡി, നടി മൈകി മാഡിസൺ

ഈ വര്‍ഷത്തെ ഓസ്‌കര്‍ പുരസ്‌കാര പ്രഖ്യാപനം ആരംഭിച്ചു. കീരൺ കൾക്കിനും സോയി സൽദാനയും മികച്ച സഹതാരങ്ങൾക്കുള്ള ഓസ്കർ പുരസ്കാരം നേടി. അതേ സമയം ഓസ്കറിൽ ഇന്ത്യയ്ക്ക് നിരാശ, പ്രതീക്ഷയോടെ ഉറ്റുനോക്കിയ അനുജക്ക് ഓസ്കർ ഇല്ല. ഗുനീത് മോംഗയും പ്രിയങ്ക ചോപ്രയും ചേര്‍ന്ന് നിര്‍മിച്ച 'അനുജ' മികച്ച ലൈവ് ആക്ഷന്‍ ഷോര്‍ട്ട് ഫിലിം വിഭാഗത്തിലാണ് മത്സരിച്ചത്. ഓസ്കർ പ്രഖ്യാപനം തുടരുകയാണ്.

ലോസാഞ്ചലസിലെ ഡോള്‍ബി തിയേറ്ററിലാണ് പുരസ്‌കാര വിതരണം നടക്കുന്നത്. ഓസ്‌കറിന്റെ 97-ാം പതിപ്പാണ്. സ്റ്റാര്‍ മൂവീസിലും ജിയോ ഹോട്ട്സ്റ്റാറിലും പുരസ്‌കാര പ്രഖ്യാപന ചടങ്ങ് തത്സമയം കാണാം. എമ്മി അവാര്‍ഡ് ജേതാവ് കോനന്‍ ഒബ്രിയാനാണ് ഓസ്‌കര്‍ അവതാരകൻ.

മുന്‍ അവാര്‍ഡ് ജേതാക്കള്‍ ഉള്‍പ്പടെ പ്രമുഖരുടെ നീണ്ട നിരയാണ് ലോകത്തിലെ ഏറ്റവും വലിയ ചലച്ചിത്ര പുരസ്‌കാര ദാന ചടങ്ങിന് സാക്ഷിയാകാന്‍ എത്തിയിരിക്കുന്നത്. മികച്ച ചിത്രത്തിനുള്ള പട്ടികയില്‍ അനോറയും എമീലിസ് പെരസും തമ്മിലാണ് കടുത്ത മത്സരം.

ഒബ്രിയാനെ കൂടാതെ ഓപ്ര വിന്‍ഫ്രി, എമ്മ സ്റ്റോണ്‍, സ്‌കാര്‍ലറ്റ് ജോഹാന്‍സണ്‍, റോബര്‍ട്ട് ഡൗണി ജൂനിയര്‍, സോ സാല്‍ഡാന എന്നിവരും ചടങ്ങില്‍ അവതാരകരായി എത്തും. ഇതാദ്യമായാണ് കോനന്‍ ഒബ്രിയാന്‍ ഓസ്‌കര്‍ പുരസ്‌കാര പ്രഖ്യാപനത്തില്‍ അവതാരകനാകുന്നത്.