പെണ്കുഞ്ഞിനെ ഇബേയില് വില്ക്കാന് ശ്രമം, ദമ്പതികള്ക്ക് പിന്നീട് സംഭവിച്ചത്...
ബെര്ലിന്: നാല്പ്പത് ദിവസം പ്രായമുള്ള കുഞ്ഞിനെ മാതാപിതാക്കള് ഇബേയില് വില്ക്കാന് ശ്രമിച്ചു. ഏകദേശം മൂന്ന് ലക്ഷം രൂപയാണ് കുഞ്ഞിന് വിലയിട്ടത്. സംഭവം ശ്രദ്ധയില്പ്പട്ടതിനെ തുടര്ന്ന് പശ്ചിമ ജര്മ്മനിയിലെ പൊലീസ് കുഞ്ഞിന്റെ രക്ഷിതാക്കളെ കണ്ടെത്താനുള്ള ശ്രമം ആരംഭിച്ചിരുന്നു.
ജര്മന് നഗരമായ ഡൂയിസ്ബര്ഗിലാണ് ഈ അസാധാരണ സംഭവം. വ്യാഴാഴ്ചയാണ് ഇബേയില് കുഞ്ഞിനെ വില്പ്പനയ്ക്ക് വെച്ചതായി ശ്രദ്ധയില്പ്പെട്ടതെന്നാണ് പൊലീസ് നല്കുന്ന വിവരം. 5000 യൂറോയായിരുന്നു കുഞ്ഞിന്റെ വിലയായി നല്കിയിരുന്നത്.
കുട്ടിയുടെ മാതാപിതാക്കളുടെ ഫ്ളാറ്റില് നടത്തിയ റെയ്ഡില് പൊലീസ് തെളിവുകള് കണ്ടെത്തിയിരുന്നു. അഭയാര്ത്ഥികളായി ജര്മനിയിലെത്തിയ ബന്ധുക്കളെക്കുറിച്ച് കൂടുതല് വിവരങ്ങള് ശേഖരിക്കുന്ന പൊലീസ് മനുഷ്യക്കടത്തിനുള്ള സാധ്യതകളും അന്വേഷിച്ചുവരുന്നുണ്ട്. കൂടുതല് ചോദ്യം ചെയ്യുന്നതിനായി ഇവരെ കസ്റ്റഡിയിലെടുത്തിട്ടുണ്ട്.