ഭാഗ്യം വരുന്ന വഴിയേ: ജോലി നഷ്ടമായ പ്രവാസി മലയാളിക്കും സുഹൃത്തുക്കള്‍ക്കും ലഭിച്ചത് കോടികള്‍

Updated: Monday, April 4, 2022, 14:13 [IST]

അബുദാബി: ജോലിയിലാതെയിരിക്കുന്ന സമയം കോടികള്‍ കൈയ്യിലെത്തിയാലോ? ഇത്തരത്തില്‍ അപ്രതീക്ഷിതമായി വന്നു ചേര്‍ന്ന സൗഭാഗ്യത്തിന്റെ ഞെട്ടലിലാണ് ഈ കുടുംബങ്ങള്‍. കുവൈത്തില്‍ ജോലി ചെയ്യുന്ന രതീഷ് രഘുനാഥനും സുഹൃത്തുക്കളും ഞെട്ടലില്‍ നിന്ന് മുക്തമാകുന്നതേയുള്ളു. അബുദാബി ബിഗ് ടിക്കറ്റിന്റെ 238-ാം സീരിസ് നറുക്കെടുപ്പാണ് രതീഷിന്റെയും സുഹൃത്തുക്കളുടെയും ജീവിതം അക്ഷരാര്‍ത്ഥത്തില്‍ തന്നെ മാറ്റിമറിച്ചത്. ഞായറാഴ്ചയായിരുന്നു നറുക്കെടുപ്പ് നടന്നത്.

കുവൈത്തില്‍ ഓയില്‍ ആന്റ് ഗ്യാസ് കമ്പനിയില്‍ ജോലി ചെയ്യുകയായിരുന്നു രതീഷും സുഹൃത്തുക്കളും. എന്നാല്‍ ഇവര്‍ക്ക് ഈ മാസത്തോടെ ഇവിടുത്തെ ജോലി അവസാനിപ്പിക്കേണ്ടി വരും. എന്ത് ചെയ്യണമെന്ന് അറിയാതെ വിഷമിക്കുന്ന ഇവര്‍ക്ക് പുതിയ വാതില്‍ തുറന്ന ദിവസമായിരുന്നു ഞായറാഴ്ച. ബിഗ് ടിക്കറ്റിലെ അവതാരകന്‍ റിച്ചാര്‍ഡിന്റെ ഫോണ്‍ കോള്‍ എത്തുകയായിരുന്നു.

കേരളത്തിലുണ്ടായ പ്രളയത്തിന്റെ കെടുതികളും അനുഭവിക്കേണ്ടിവന്നയാളാണ് രതീഷ്. ഈ ബുദ്ധിമുട്ടുകളില്‍ നിന്ന് കരയറുന്നതിനിടെയാണ് കുവൈത്തിലെ ജോലി നഷ്ടമായത്. കൃത്യസമയത്താണ് പണം കിട്ടുന്നതെന്നായിരുന്നു രതീഷിന്റെ പ്രതികരണം. 'പ്രതീക്ഷയാണ് ബിഗ് ടിക്കറ്റ്, നിര്‍ണായകമായൊരു സമയത്ത് ബിഗ് ടിക്കറ്റാണ് രക്ഷക്കെത്തിയത്. ഒന്നര കോടി ദിര്‍ഹമാണ് ലഭിച്ചിരിക്കുന്നത്. ഞാനും സുഹൃത്തുക്കളും ഈ പണത്തിന് ബിഗ് ടിക്കറ്റിനോട് കടപ്പെട്ടിരിക്കുന്നു' - രതീഷ് പറഞ്ഞു.