'പരസ്പര നികുതി-ഇന്നാണ് ആ സുപ്രധാന ദിനം'; മോദിയുമായുള്ള കൂടിക്കാഴ്ചക്ക് മുൻപ് ട്രംപിന്റെ ട്വീറ്റ്, ആകാംക്ഷ

വാഷിങ്ടൺ: പ്രധാനമന്ത്രി നരേന്ദ്ര മോദിയുമായുള്ള കൂടിക്കാഴ്ചക്ക് തൊട്ട് മുൻപ് ട്വീറ്റുമായി യുഎസ് പ്രസിഡന്റ് ഡൊണാൾഡ് ട്രംപ്. പരസ്പര നികുതി സംബന്ധിച്ച് സുപ്രധാന പ്രഖ്യാപനങ്ങൾ ഉണ്ടായേക്കുമെന്ന സൂചന നൽകുന്നതാണ് ട്രംപിന്റെ കുറിപ്പ്. ഇന്നാണ് ആ വലിയ പ്രഖ്യാപനം എന്നും ട്രംപ് ട്വീറ്റിൽ പറയുന്നുണ്ട്.

'മൂന്ന് മികച്ച ആഴ്ചകൾ, ഒരുപക്ഷെ എക്കാലത്തേയും മികച്ചത്, എന്നാൽ ഇന്നാണ് ആ സുപ്രധാന ദിനം, പരസ്പര നികുതി,അമേരിക്കയെ വീണ്ടും മഹത്തരമാക്കൂ', ട്രംപ് ട്വീറ്റിൽ പറഞ്ഞു. തങ്ങൾക്ക് ഇറക്കുമതി തീരുവ ചുമത്തുന്ന രാജ്യങ്ങൾക്ക് പരസ്പര നികുതി ചുമത്തുമെന്ന് ട്രംപ് വ്യക്തമാക്കിയിരുന്നു. യുഎസിന് ഇറക്കുമതി തീരുവ ഏർപ്പെടുത്തിയ മോദി സർക്കാർ നടപടിയെ നേരത്തേ ട്രംപ് വിമർശിച്ചിരുന്നു. ചില ഉത്പന്നങ്ങൾക്ക് കനത്ത തീരുവയാണ് ഇന്ത്യ ചുമത്തിയതെന്നും അതിനാൽ അതേ രീതിയിവൽ തന്നെ തീരുവ ചുമത്താനാണ് യുഎസിന്റെ തീരുമാനം എന്നുമാണ് ട്രംപ് നേരത്തേ പറഞ്ഞത്.

'ഇനി പരസ്പര നികുതിയായിരിക്കും വരിക, നിങ്ങൾ ഈ വാക്ക് കേട്ടുകൊണ്ടിരിക്കുന്നുണ്ടാകും. ഞങ്ങൾക്ക് മേൽ നികുതി ചുമത്തിയാൽ ഞങ്ങളും ചുമത്തും, എല്ലാ രാജ്യങ്ങൾക്ക് മേലും ചുമത്തും', ട്രംപ് പറഞ്ഞു. ഇന്ത്യയും ബ്രസീലുമാണ് യുഎസ് ഉത്പന്നങ്ങൾക്ക് കൂടുതൽ ഇറക്കുമതി തീരുവ ചുമത്തുന്നത്. യുഎസ് ഭരണകുടം ഇക്കാര്യത്തിൽ ആവർത്തിച്ച് ആശങ്ക പ്രകടിപ്പിച്ചിരുന്നു. യുഎസിന്റെ ഇറക്കുമതിക്ക് ഇത് വലിയ തടസം സൃഷ്ടിക്കുകയാണെന്നും ന്യായമായ വ്യാപരത്തെ തടസപ്പെടുത്തുകയാണെന്നുമാണ് യുഎസ് വിമർശിച്ചത്.

മെക്‌സിക്കോയിൽ നിന്നും കാനഡയിൽ നിന്നും ഇറക്കുമതി ചെയ്യുന്ന ഉൽപ്പന്നങ്ങൾക്ക് 25 ശതമാനം തീരുവയും ചൈനയിൽ നിന്ന് ഇറക്കുമതി ചെയ്യുന്ന ഉൽപ്പന്നങ്ങൾക്ക് 10 ശതമാനം അധിക തീരുവയും നേരത്തേ ട്രംപ് ഭരണകുടം പ്രഖ്യാപിച്ചിരുന്നു. എന്നാൽ പിന്നീട് തീരുമാനത്തിൽ നിന്നും പിന്നോട്ട് പോയി. മാർച്ച് ഒന്ന് വരെ തീരുവ ചുമത്തില്ലെന്നായിരുന്നു അറിയിച്ചത്. യുഎസ് ഉയർത്തിയ കുടിയേറ്റ പ്രശ്നങ്ങളിലേയും മയക്കുമരുന്ന് കടത്ത് വിഷയങ്ങളിലേയും ആശങ്ക പരിഹരിക്കാൻ മെക്സിക്കോയും കാനഡയും സമ്മതിച്ചതിനെ തുടർന്നായിരുന്നു ഇത്.

മോദി ട്രംപ് കൂടിക്കാഴ്ച

വെള്ളിയാഴ്ച പുലർച്ചെ രണ്ടരയ്ക്കാണ് വൈറ്റ് ഹൗസിൽ വെച്ച് പ്രധാനമന്ത്രി നരേന്ദ്ര മോദിയും ഡൊണാൾഡ് ട്രംപും കൂടിക്കാഴ്ച നടത്തുക. തുടർന്ന് ഇരുനേതാക്കളും സംയുക്ത വാർത്താസമ്മേളനം നടത്തും. പ്രധാനമന്ത്രി ടെക് ഭീമന്‍ എലോണ്‍ മസ്‌ക്, ഇന്ത്യന്‍ അമേരിക്കന്‍ സംരംഭകനും രാഷ്ട്രീയക്കാരനുമായ വിവേക് രാമസ്വാമിയുമായും കൂടിക്കാഴ്ച നടത്തും.