സൗത്ത് കരോളിനയിലെ കറുത്തവര്‍ഗ്ഗക്കാരുടെ പള്ളിയില്‍ വെടിവപ്പ്; 9 മരണം

ചാള്‍സ്റ്റണ്‍: സൗത്ത് കരോളിനയിലെ ചരിത്ര പ്രസിദ്ധമായ ക്രിസ്ത്യന്‍ പള്ളിയില്‍ വെടിവപ്പ്. ഒമ്പത് പേര്‍ കൊല്ലപ്പെട്ടതായാണ് റിപ്പോര്‍ട്ടുകള്‍. ഒരാള്‍ക്ക് പരിക്കേറ്റിട്ടുണ്ട്.

ഇമ്മാന്വല്‍ ആഫ്രിക്കന്‍ മെത്തേഡിസ്റ്റ് എപിസ്‌കോപ്പല്‍ പള്ളിയിലാണ് വെടിവപ്പ് നടന്നത്. ആഫ്രോ-അമേരിക്കന്‍ പള്ളിയാണ് ഇത്. ചാള്‍സ്റ്റണിലാണ് പള്ളി സ്ഥിതി ചെയ്യുന്നത്. പ്രദേശത്തെ ഏറ്റവും പഴക്കമേറിയ കറുത്ത വര്‍ഗ്ഗക്കാരുടെ പള്ളികളില്‍ ഒന്നാണിത്. ഒടുവില്‍ വിവരം ലഭിയ്ക്കുന്നതുവരേയും വെടിവപ്പ് നടത്തിയ ആളെ പിടികൂടാന്‍ കഴിഞ്ഞിട്ടില്ല.

പള്ളിയില്‍ പ്രാര്‍ത്ഥന നടന്നുകൊണ്ടിരിയ്‌ക്കെ അക്രമി കടന്നുവെന്ന് പെട്ടെന്ന് വെടിയുതിര്‍ക്കുകയായിരുന്നുവെന്ന് ദൃക്‌സാക്ഷികള്‍ പറയുന്നു. വെള്ളക്കാരനായ, 20 വയസ്സുള്ള ഒരു ചെറുപ്പക്കാരനാണ് വെടിവപ്പിന് പിന്നിലെന്ന് വ്യക്തമായിട്ടുണ്ട്. ഇയാള്‍ക്ക് വേണ്ടി തിരച്ചില്‍ തുടരുകയാണെന്നാണ് പോലീസ് പറയുന്നത്.

അമേരിക്കയില്‍ അടുത്തിടെ കടുത്ത വര്‍ഗ്ഗക്കാര്‍ക്ക് നേര്‍ക്കുള്ള അതിക്രമങ്ങള്‍ പതിവ് സംഭവം ആയിക്കൊണ്ടിരിയ്ക്കുകയാണ്. ഇതിന്റെ വെളിച്ചത്തിലാണ് സൗത്ത് കരോളിന സംഭവം നിരീക്ഷിയ്ക്കപ്പെടുന്നത്.

English summary

At least nine people were killed in a shooting at an historic African-American church in Charleston, South Carolina, according to Police Chief Greg Mullen.