സൗദിയെ മൂന്നാം സ്ഥാനത്തേക്ക് പിന്തള്ളി റഷ്യയും ഇറാഖും: എണ്ണ ഇറക്കുമതിയില് വീണ്ടും കളിമാറ്റി ഇന്ത്യ
ആഗസ്ത് മാസത്തിലെ ഇടിവിന് ശേഷം റഷ്യയില് നിന്നുള്ള ഇന്ത്യയുടെ എണ്ണ ഇറക്കുമതിയില് വീണ്ടും വർധനവ്. ഇറാഖില് നിന്നുള്ള ഇറക്കുമതിയും വർധിച്ചിട്ടുണ്ട്. എന്നാല് സൗദി അറേബ്യൻ ക്രൂഡ് ഓയിലിന്റെ ഇന്ത്യന് സംഭാവനയില് ഇടിവ് രേഖപ്പെടുത്തിയ മാസം കൂടിയാണ് കടന്നു പോവുന്നത്. സൗദിയേക്കാള് ലാഭകരം റഷ്യ, ഇറാഖ് എന്നിവിടങ്ങളില് നിന്നായതിനാലാണ് ഈ വർധനവെന്നാണ് റിപ്പോർട്ടുകള് വ്യക്തമാക്കുന്നത്.
റിഫൈനറി മെയിന്റനൻസ് അടച്ചുപൂട്ടൽ സീസൺ ആരംഭിച്ചതോടെ ഇന്ത്യയുടെ മൊത്തത്തിലുള്ള ക്രൂഡ് ഓയിൽ ഇറക്കുമതി ഈ വർഷത്തെ ഏറ്റവും താഴ്ന്ന നിലയിലേക്ക് താഴ്ന്നിരിക്കുമ്പോഴും റഷ്യ, ഇറാഖ് എന്നിവിടങ്ങളില് നിന്നുള്ള ഇറക്കുമതി വർധിച്ചുവെന്നതാണ് ശ്രദ്ധേയം. ഇന്ത്യയുടെ റഷ്യൻ എണ്ണ ഇറക്കുമതി ഓഗസ്റ്റിൽ ഏഴ് മാസത്തെ ഏറ്റവും താഴ്ന്ന നിരക്കായ 1.55 ദശലക്ഷം ബാരലായി (മില്യൺ ബിപിഡി) കുറഞ്ഞിരുന്നു.
എന്നാല് സെപ്റ്റംബറിൽ ഇത് തുടർച്ചയായി 18.3 ശതമാനം ഉയർന്ന് 1.83 ദശലക്ഷം ബിപിഡിയിലെത്തി. ഇറാഖിൽ നിന്നുള്ള ഇന്ത്യയുടെ എണ്ണ ഇറക്കുമതി ഓഗസ്റ്റിനെ അപേക്ഷിച്ച് 7.4 ശതമാനം ഉയർന്ന് 916690 ബിപിഡിയിലുമെത്തി. ഇന്ത്യയുടെ സെപ്റ്റംബറിലെ എണ്ണ ഇറക്കുമതിയിൽ റഷ്യയുടെയും ഇറാഖിന്റെയും പങ്ക് യഥാക്രമം 43 ശതമാനവും 22 ശതമാനവുമാണ്. ഓഗസ്റ്റിൽ റഷ്യയുടെ വിഹിതം 35.4 ശതമാനവും ഇറാഖിന്റെ വിഹിതം 19.5 ശതമാനവുമായിരുന്നു.
സൗദി അറേബ്യയില് നിന്നുള്ള ഇറക്കുമതി ഓഗസ്റ്റിലെ 19 ശതമാനത്തിൽ നിന്ന് സെപ്റ്റംബറിൽ ഏകദേശം 13 ശതമാനമായി മാർക്കറ്റ് ഷെയർ കുറഞ്ഞു. സെപ്തംബറിൽ റിയാദിൽ നിന്നുള്ള ഇന്ത്യയുടെ എണ്ണ ഇറക്കുമതി 556,185 ബിപിഡി ആയിരുന്നു. ഓഗസ്റ്റിൽ ഇത് മൂന്നിലൊന്നായി കുറയുന്നതാണ് കണ്ടത്. 2022 ജനുവരിക്കും 2023 ഓഗസ്റ്റിനും ഇടയിൽ, ഇറക്കുമതി അളവ് ശരാശരി 750,000 ബിപിഡിയിൽ കൂടുതലുമായിരുന്നു.
വിതരണത്തില് കുറവുണ്ടായെങ്കിലും സൗദി അറേബ്യ ഇന്ത്യയിലേക്കുള്ള ക്രൂഡ് ഓയിൽ വിതരണക്കാരിൽ മൂന്നാമത്തെ വലിയ രാജ്യമാണ്. റഷ്യയാണ് ഒന്നാമത്. രണ്ടാമത് ഇറാഖും. പരമ്പരാഗതമായി ഇറാഖിന് ശേഷം ഇന്ത്യയുടെ രണ്ടാമത്തെ വലിയ ക്രൂഡ് ഓയില് സ്രോതസ്സായിരുന്നു റിയാദ്. എന്നാൽ ഉക്രെയ്നിലെ യുദ്ധം പൊട്ടിപ്പുറപ്പെട്ടതിനുശേഷം, വിലയില് ആഴത്തിലുള്ള കിഴിവ് വാഗ്ദാനം ചെയ്തുകൊണ്ട് റഷ്യ ഇറാഖിനെയും സൗദി അറേബ്യയെയും മറികടന്ന് ഇന്ത്യയുടെ ഏറ്റവും വലിയ എണ്ണ വിതരണക്കാരായി മാറി.
യുക്രൈന് യുദ്ധത്തിന് മുമ്പ് ഇന്ത്യയുടെ എണ്ണ വ്യാപാരത്തിൽ റഷ്യ ഒരു നാമമാത്ര പങ്കാളി മാത്രമായിരുന്നു എന്നുള്ളതാണ് ശ്രദ്ധയം.വില മത്സരക്ഷമത റഷ്യൻ ക്രൂഡിന് അനുകൂലമാണെന്നാണ് ക്രൂഡ് അനലിസ്റ്റ് വിക്ടർ കറ്റോണ വ്യക്തമാക്കുന്നത്. മിഡിൽ ഈസ്റ്റിൽ നിന്ന് ഇറക്കുമതി ചെയ്യാനാണ് കൂടുതല് ഇഷ്ടപ്പെടുന്നതെങ്കില് സൗദി അറേബ്യൻ ഓയിലിനേക്കാള് രണ്ട് ഡോളർ ലാഭം നല്കുന്ന ഇറാഖില് നിന്നുള്ള ഇറക്കുമതിയാണെന്നും വിക്ടർ കറ്റോണ പറയുന്നു.
ഇന്ത്യൻ റിഫൈനർമാർ കൂടുതലും റഷ്യൻ ക്രൂഡ് വാങ്ങുന്നത് സ്പോട്ട് മാർക്കറ്റിൽ നിന്നാണ്, അതേസമയം പശ്ചിമേഷ്യൻ എണ്ണ പ്രധാനമായും ടേം കരാറുകളിലൂടെയാണ് വാങ്ങുന്നത്. ഓഗസ്റ്റിൽ മോസ്കോയിൽ നിന്നുള്ള ഇന്ത്യയുടെ എണ്ണ ഇറക്കുമതി കുറയാനുള്ള പ്രധാന കാരണങ്ങളിലൊന്നായി റഷ്യൻ ക്രൂഡിന് ലഭ്യമായിരുന്ന കിഴിവ് കുറഞ്ഞതാണ്. ഇന്ത്യൻ റിഫൈനർമാർ റഷ്യൻ എണ്ണയുടെ വാങ്ങലുകൾ കുറച്ചതിനെത്തുടർന്ന് കിഴിവുകൾ വീണ്ടും വിപുലീകരിക്കാൻ തുടങ്ങി. ഇതാണ് സെപ്തംബറിലെ വർധനവിനെ കാരണം.
മിഡില് ഈസ്റ്റ് മേഖലയിൽ നിന്നുള്ള ഒമാൻ, ദുബായ്, ബസ്റ മീഡിയം തുടങ്ങിയ ഇടത്തരം ഗ്രേഡുകളുമായി താരതമ്യപ്പെടുത്തുമ്പോൾ അറബ് ലൈറ്റ്, അറബ് മീഡിയം തുടങ്ങിയ സൗദി അറേബ്യൻ ക്രൂഡിന്റെ സമീപകാല വില വർധനവും ഇറക്കുമതിയെ സ്വാധീനിച്ചിട്ടുണ്ട്. ഇന്ത്യയുടെ റഷ്യൻ എണ്ണ ഇറക്കുമതിയുടെ സിംഹഭാഗവും വഹിക്കുന്ന റഷ്യയുടെ മുൻനിര ഗ്രേഡ് യുറൽസാണ് ഡീസല് വിഹിതം കാര്യമായി നല്കുന്നതും.
Click it and Unblock the Notifications
Sign in with Google