ഹെലികോപ്ടര് അടിച്ചുമാറ്റി സാന്താ ക്ളോസ് പറന്നു, പൊലീസ് നെട്ടോട്ടത്തില്
സാവോ പോളോ: വാടകയ്ക്കെടുത്ത ഹെലികോപ്ടറുമായി സാന്താ ക്ളോസ് മുങ്ങി, പൊലീസ് നെട്ടോട്ടത്തില്. വെള്ളിയാഴ്ച സര്പ്രൈസ് കൊടുക്കാനിറങ്ങിയ സാന്തയാണ് പൊലീസിന് ഒട്ടും പ്രതീക്ഷിയ്ക്കാത്ത സര്പ്രൈസ് നല്കി മുങ്ങിയത്. സാന്തയേയും ഹെലികോപ്ടറിനേയും ഇതുവരേയും കണ്ടെത്താനായിട്ടില്ല.
കാംപോ മാര്ട്ടേ എയര്പോര്ട്ടിന് സമീപമുള്ള ഒരു എയര് ടാക്സി ഓഫീസില് നിന്നും വെള്ളിയാഴ്ച രാത്രിയോടെയാണ് ഹെലികോപ്ടര് വാടകയ്ക്ക് എടുത്തത്. ഹെലികോപ്ടറില് യാത്ര ചെയ്യവേഒരു ചെറിയ ഫാം ഹൗസിന് പുറത്ത് ഹെലികോപ്ടര് ലാന്ഡ് ചെയ്യിക്കാന് സാന്താ ക്ളോസ് പൈലറ്റിനെ നിര്ബന്ധിച്ചു.
ഫാം ഹൗസില് നിന്നും മറ്റൊരാള് കൂടി സാന്തായ്ക്കൊപ്പം ചേര്ന്നു. തുടര്ന്ന് പൈലറ്റിനെ കെട്ടിയിട്ട ശേഷം ഹെലികോപ്ടറുമായി സാന്തായും അഞ്ജാതനും പോവുകയായിരുന്നു. മണിയ്ക്കൂറുകള്ക്ക് ശേഷമാണ് ഫാം ഹൗസില് നിന്നും പൈലറ്റിന് രക്ഷപ്പെടാനായത്. രക്ഷപ്പെട്ട പൈലറ്റ് വിവരങ്ങള് പൊലീസിനെ അറിയിച്ചു. ഹെലികോപ്ടര് ഇതുവരേയും കണ്ടെത്താനായിട്ടില്ല.