മുസ്ലിം യുവതിയെ പന്നിയിറച്ചി തീറ്റിച്ചു, 4 ലക്ഷം രൂപ പിഴ!
കോപ്പന്ഹേഗന്: 24 കാരിയായ മുസ്ലിം വിദ്യാര്ഥിനിയെക്കൊണ്ട് നിര്ബന്ധിച്ച് പന്നിയിറച്ചി കഴിപ്പിച്ച വിദ്യാഭ്യാസ സ്ഥാപനത്തിന് പിഴ. ആറായിരം ഡോളര് (ഏകദേശം നാല് ലക്ഷത്തോളം രൂപ) പിഴയടക്കാനാണ് കോടതി വിധിച്ചിരിക്കുന്നത്. ഡെന്മാര്ക്കിലാണ് സംഭവം. തുര്ക്കിയിലെ ഒരു വാര്ത്താ ഏജന്സി തിങ്കളാഴ്ചയാണ് ഇത് റിപ്പോര്ട്ട് ചെയ്തത്.
പാചകസംബന്ധമായ കോഴ്സ് ചെയ്യുന്ന മുസ്ലിം യുവതിക്കാണ് കോഴ്സിന്റെ ഭാഗമായി പന്നിയിറച്ചി കഴിക്കേണ്ടി വന്നത്. സ്കൂളില് വെച്ച് താന് തന്നെ പാചകം ചെയ്ത ഭക്ഷണം അവര്ക്ക് രുചിച്ചുനോക്കേണ്ടി വരികയായിരുന്നു. എന്നാല് ഭക്ഷണത്തില് പന്നിയിറച്ചി ഉള്ളതുകൊണ്ട് യുവതി അത് കഴിക്കാന് കൂട്ടാക്കിയില്ല. മുസ്ലിങ്ങള്ക്ക് പന്നിയിറച്ചി നിഷിദ്ധമാണ് എന്ന് പറഞ്ഞെങ്കിലും സ്കൂള് അധികൃതര് സമ്മതിച്ചില്ല.
യുവതിയുടെ വായിലേക്ക് പന്നിയിറച്ചി നിര്ബദ്ധപൂര്വ്വം തള്ളിക്കയറ്റുകയായിരുന്നത്രെ. ഈ വിദ്യാര്ഥിനി പിന്നീട് പരാതിയുമായി കോടതിയെ സമീപിച്ചു. മതവികാരം വ്രണപ്പെടുത്തിയതിന് സ്കൂള് അധികൃതരോട് ആറായിരം ഡോളര് പിഴയടക്കാന് കോടതി നിര്ദേശിക്കുകയായിരുന്നു. വിദ്യാര്ഥിനിയുടെയോ സ്കൂളിന്റെയൊ പേര് പുറത്തുവിട്ടിട്ടില്ല.
ലിബിയയില് നിന്നും വളരെ ചെറുപ്പത്തില് ഡെന്മാര്ക്കിലേക്ക് കുടിയേറിയതാണ് പെണ്കുട്ടിയുടെ കുടുംബം. പാചകം ചെയ്യുന്ന ഭക്ഷണത്തില് പന്നിയിറച്ചിയും വൈനും ഉണ്ടാകുമെന്ന് പെണ്കുട്ടിയെ നേരത്തെ അറിയിച്ചിരുന്നത്രെ. എന്നാല് അത് കഴിച്ചുനോക്കേണ്ടി വരും എന്ന കാര്യം പറഞ്ഞിരുന്നില്ല.