എല്ലാ ബുധനാഴ്ചയും ഹോളിഡെ, സ്കൂള് അവധി; എണ്ണ കിട്ടാക്കനി, കടുത്ത നടപടിയുമായി ശ്രീലങ്ക
പശ്ചിമേഷ്യയിലെ സംഘര്ഷം കാരണം ഇന്ധന പ്രതിസന്ധി രൂക്ഷമായ ശ്രീലങ്കയില് കടുത്ത നടപടികളുമായി സര്ക്കാര്. പ്രതിവാര അവധി മൂന്ന് ദിവസമാക്കി വര്ധിപ്പിച്ചു. നിലവില് ശ്രീലങ്കയില് അഞ്ച് ദിവസമാണ് പ്രവൃത്തി ദിനം. ഇനി മുതല് ബുധനാഴ്ചയും പൊതു അവധിയാക്കാനാണ് തീരുമാനം. ഇതോടെ ആഴ്ചയിലെ അവധി ദിനങ്ങള് മൂന്ന് ദിവസമായി.
മാര്ച്ച് 18 മുതല് പുതിയ തീരുമാനം നിലവില് വരുമെന്ന് അവശ്യ സേവന സര്വീസിലെ കമ്മീഷണര് പ്രഭാത് ചന്ദ്രകീര്ത്തി പറഞ്ഞു. സര്ക്കാര് സ്കൂളുകളും കോളജുകളും യൂണിവേഴ്സിറ്റികളും ഇനി ആഴ്ചയില് മൂന്ന് ദിവസമാകും പ്രവര്ത്തിക്കുക എന്നും അദ്ദേഹം പറഞ്ഞു. ഇന്ധന ചെലവ് കുറയ്ക്കുക എന്ന ലക്ഷ്യത്തോടെയാണ് നടപടി.
അതേസമയം, തുറമുഖം, ആരോഗ്യ മേഖല, ജലവിതരണം, കസ്റ്റംസ് എന്നീ വകുപ്പുകളിലെ ഉദ്യോഗസ്ഥര്ക്ക് പുതിയ ഇളവ് ലഭ്യമാകില്ല. ഇവര് ജോലി സമയം ക്രമീകരിച്ച് സര്വീസിലുണ്ടാകണം എന്നാണ് നിര്ദേശം. കോടതികളുടെ പ്രവൃത്തി ദിനവും നാല് ദിവസമാക്കി ചുരുക്കിയിട്ടുണ്ട്. സ്വകാര്യ സ്കൂളുകള് സര്ക്കാര് തീരമാനം അംഗീകരിക്കുമെന്നാണ് പ്രതീക്ഷ എന്നും പ്രഭാത് ചന്ദ്രകീര്ത്തി പറഞ്ഞു.
കടുത്ത ഇന്ധന ക്ഷാമമാണ് ശ്രീലങ്ക നേരിടുന്നത്. ഇന്ത്യയോടും റഷ്യയോടും ഇക്കാര്യത്തില് സഹായം അഭ്യര്ഥിച്ചിട്ടുണ്ട്. ഇന്ത്യ അടുത്തിടെ ബംഗ്ലാദേശിനെ സഹായിച്ചിരുന്നു. ഇക്കാര്യം കൂടി കണക്കിലെടുത്താണ് ശ്രീലങ്ക ഇന്ത്യയുടെ സഹായം തേടിയിരിക്കുന്നത്. മതിയായ ഇന്ധനം എത്തിയില്ലെങ്കില് സര്ക്കാരിന്റെ പ്രവര്ത്തനം താളംതെറ്റുമെന്നാണ് ശ്രീലങ്കയിലെ ആശങ്ക.
രണ്ടാഴ്ചത്തേക്ക് സ്കൂള് അടച്ചിട്ട് പാകിസ്താന്
ഒരാഴ്ച മുമ്പ് പാകിസ്താന് സമാനമായ കടുത്ത നടപടികള് സ്വീകരിച്ചിരുന്നു. രണ്ടാഴ്ചത്തേക്ക് സര്ക്കാര് ഓഫീസുകളും സ്കൂളുകളും അടച്ചിടാനാണ് പാകിസ്താന് തീരുമാനിച്ചത്. ഓഫീസുകളുടെ പ്രവര്ത്തനം വര്ക്ക് ഫ്രം ഹോം നിലയിലേക്ക് മാറ്റി. ഇന്ധന ചെലവ് കുറയ്ക്കാനാണ് ഈ നടപടികള് എന്ന് പ്രധാനമന്ത്രി ഷഹ്ബാസ് ഷരീഫ് പ്രഖ്യാപിച്ചിരുന്നു.
ഹോര്മുസ് വഴിയാണ് ഈ രാജ്യങ്ങളിലേക്ക് എണ്ണയും വാതകവും എത്തിയിരുന്നത്. ഇറാന് ഈ പാത അടച്ചതിനാല് ഇന്ധനം വരുന്നില്ല. ഇന്ത്യ ഇറാനുമായി ചര്ച്ച നടത്തി ചില ടാങ്കറുകള് എത്തിക്കുന്നുണ്ട്. ഈ സാഹചര്യത്തിലാണ് ബംഗ്ലാദേശും ശ്രീലങ്കയും ഇന്ത്യയുടെ സഹായം അഭ്യര്ഥിച്ചത്. പാകിസ്താന് ഇറാനുമായി ചര്ച്ച നടത്തുന്നുണ്ടെന്ന വിവരവും വന്നിട്ടുണ്ട്.
പശ്ചിമേഷ്യയില് യുദ്ധം വേഗത്തില് തീരാന് സാധ്യത കാണുന്നില്ല. ഇപ്പോഴും പരസ്പരം ആക്രമണം തുടരുകയാണ്. ഹൂത്തികള് ചെങ്കടല് പാത കൂടി അടച്ചാല് ഏഷ്യയിലേക്ക് ഇന്ധനം തീരെ വരാതാകും. ഈ സാഹചര്യം ഒഴിവാക്കാന് ചൈന ശ്രമിക്കുന്നുണ്ട്. ഹോര്മുസ് നിയന്ത്രണത്തിലാക്കാനാണ് അമേരിക്കയുടെ നീക്കം. എന്നാല് ഇതിനോട് ഇന്ത്യ ഉള്പ്പെടെയുള്ള രാജ്യങ്ങള് അനുകൂലമായി പ്രതികരിച്ചിട്ടില്ല.
Click it and Unblock the Notifications
Sign in with Google