പിറക്കാനിരിക്കുന്ന കുഞ്ഞിന് വംശീയാധിക്ഷേപം; ടെന്നീസ് താരത്തില്‍ സെറീനയുടെ മറുപടി

ന്യൂയോര്‍ക്ക്: ടെന്നീസ് താരം സെറീന വില്യംസ് ഗര്‍ഭിണിയാണെന്നും കളിക്കളത്തില്‍ നിന്നും തത്കാലം മാറിനില്‍ക്കുകയാണെന്നുമുള്ള വാര്‍ത്ത കഴിഞ്ഞദിവസമാണ് പുറത്തുവന്നത്. ഇതിന് പിന്നാലെ സോഷ്യല്‍ മീഡിയയില്‍ സെറീനയ്ക്ക് ആശംസയുമായി ഒട്ടേറെ പേര്‍ രംഗത്തെത്തി. അതേസമയം, സെറീനയുടെ പിറക്കാനിരിക്കുന്ന കുഞ്ഞിനെ വംശീയമായി അധിക്ഷേപിച്ചാണ് മുന്‍ റൊമാനിയന്‍ ടെന്നീസ് താരം ഇല്ലിയ നസ്താസെ ഇതിനോട് പ്രതികരിച്ചത്.

ചോക്ക്‌ളേറ്റ് പാലുമായി ചേര്‍ന്ന രീതിയിലുള്ള എന്ത് നിറമാണ് കുട്ടിയുടേതെന്ന് നമുക്ക് കാത്തിരുന്ന് കാണാമെന്നായിരുന്നു ഇല്ലിയ നസ്താസെയുടെ പ്രസ്താവന. ഇല്ലിയയുടെ പരാമര്‍ശത്തിനെതിരെ സോഷ്യല്‍ മീഡിയയില്‍ വന്‍ പ്രതിഷേധം ഉയരവെ സെറീന തന്നെ നേടിട്ട് ചുട്ട മറുപടിയുമായി രംഗത്തെത്തി.

ജനിക്കാന്‍ പോകുന്ന കുഞ്ഞിനു നേരെ പോലും വംശീയ അധിക്ഷേപം നടത്തുന്ന നസ്താസെയെപ്പോലുള്ളവരുള്ള സമൂഹത്തിലാണ് നമ്മള്‍ ജീവിക്കുന്നതെന്ന യാഥാര്‍ഥ്യം എന്നെ നിരാശപ്പെടുത്തുവെന്ന് സെറീന ഇന്‍സ്റ്റാഗ്രാമില്‍ പറയുന്നു. ഒരുപാട് പ്രതിബന്ധങ്ങള്‍ നമ്മള്‍ മറികടന്നിട്ടുണ്ടെങ്കിലും ഇനിയുമൊരുപാടുണ്ടെന്ന് ഇത് തെളിയിക്കുന്നതായി സെറീന പറഞ്ഞു.

മായ ഏഞ്ചലോയുടെ കവിതയിലെ 'നിങ്ങള്‍ നിങ്ങളുടെ വാക്ക് കൊണ്ട് എനിക്ക് നേരെ വെടിയുതിര്‍ക്കും, നിങ്ങള്‍ നിങ്ങളുടെ വെറുപ്പ് കൊണ്ട് എന്നെ കൊല്ലാന്‍ നോക്കും പക്ഷെ കാറ്റിനെ പോലെ വീണ്ടും ഞാന്‍ ഉയിര്‍ത്തെഴുനേല്‍ക്കു'മെന്ന വരികള്‍ കടമെടുത്ത് കൊണ്ടാണ് സെറീന തന്റെ പ്രതിഷേധക്കുറിപ്പ് അവസാനിപ്പിക്കുന്നത്.

English summary

Serena Williams calls Ilie Nastase comments 'racist' and backs investigation