ജോലി തീര്ത്തില്ലെങ്കില് പാറ്റയെ തീറ്റിക്കലും തല മുണ്ഡനം ചെയ്യിക്കലും: ശിക്ഷ മൂത്രം കുടിപ്പിക്കലും!
ബെയ്ജിങ്: ചൈനീസ് കമ്പനിക്കെതിരെ സോഷ്യല് മീഡിയയില് ഗുരുതര ആരോപണം. ഏല്പ്പിക്കുന്ന ജോലി കൃത്യമായി പൂര്ത്തിയാക്കാത്തവരെ മൂത്രം കുടിപ്പിക്കുകയും പാറ്റയെ തീറ്റിക്കുകയും ചെയ്യുന്നുവെന്നാണ് സോഷ്യല് മീഡിയ പോസ്റ്റുകള് ചൂണ്ടിക്കാണിക്കുന്നത്. ഇതിനെല്ലാം പുറമേ തൊഴിലാളികളെ ബെല്റ്റ് കൊണ്ട് അടിക്കുകയും തല മുണ്ഡനം ചെയ്യുകയും ചെയ്യുന്നുവെന്നാണ് ഉയര്ന്നിട്ടുള്ള മറ്റൊരു ആരോപണം. കമ്പനിയില് നിന്ന് പുറത്തുവന്ന ചൈനയിലെ ഗ്വിസൗ പ്രവിശ്യയില് നിന്നുള്ള തൊഴിലാളികളാണ് ഇക്കാര്യം വെളിപ്പെടുത്തിയിട്ടുള്ളത്.
കര്ണാടകത്തില് കനത്ത പരാജയം.. ബിജെപിയുടെ കണക്കുകള് പിഴച്ചത് ഇവിടെ
തൊഴിലാളികളുടെ ശമ്പളം പിടിച്ച് വെയ്ക്കുന്നതിനൊപ്പം ക്ലോസറ്റിലെ വെള്ളം കുടിപ്പിക്കുകയും ചെയ്യുന്നതായാണ് ചൈനീസ് സോഷ്യല് മീഡിയയില് പ്രചരിക്കുന്ന ഫോട്ടോകളും വീഡിയോകളും സൂചിപ്പിക്കുന്നത്. മറ്റ് തൊഴിലാളികളുടെ മുമ്പില് വെച്ച് പരസ്യമായാണ് തൊഴിലാളികളെ ശിക്ഷിക്കുന്നതെന്നും കമ്പനിയിലെ ജോലി ഉപേക്ഷിച്ച ജീവനക്കാരാണ് വെളിപ്പെടുത്തിയിട്ടുള്ളത്. ലെതര് ഷൂസ് ധരിക്കാന് മറക്കുന്ന ജീവനക്കാരില് നിന്ന് 50 യുവാനാണ് പിഴയായി കമ്പനി ഈടാക്കുന്നത്. ചൈനീസ് മാധ്യമങ്ങളും ഇക്കാര്യം റിപ്പോര്ട്ട് ചെയ്തിട്ടുണ്ട്.
തൊഴിലാളികളെ ഉപദ്രവിച്ചതുമായി ബന്ധപ്പെട്ട് കമ്പനിയിലെ മൂന്ന് മാനേജര്മാരാണ് പത്ത് ദിവസത്തിനിടെ അറസ്റ്റിലായിട്ടുള്ളത്. പബ്ലിക് സെക്യൂരിറ്റി ബ്യൂറോയുടെ സോഷ്യല് മീഡിയ പോസ്റ്റിലാണ് ഇക്കാര്യം വ്യക്തമാക്കുന്നത്. കുറഞ്ഞ വേതനത്തിന് കൂടുതല് സമയം ജോലി ചെയ്യിപ്പിക്കുന്ന രീതിയാണ് ചൈനയിലെ കമ്പനികളിലുമുള്ളതെന്നാണ് സാമൂഹിക പ്രവര്ത്തകര് സാക്ഷ്യപ്പെടുത്തുന്നത്