പര്ദ്ദ ധരിക്കാത്തതിന് യുവതിയെ കൊന്നു
ഹോസിങ്കോ(സൊമാലിയ): പര്ദ്ദ ധരിക്കാത്തതിന് യുവതിയെ ഇസ്ലാമിക തീവ്രവാദികള് വെടിവച്ച് കൊന്നു. തെക്കന് സോമാലിയയിലെ ഹോസിങ്കോയിലാണ് സംഭവം. വധത്തിന് പിന്നില് അല് ഷബാബ് തീവ്രവാദ സംഘമാണെന്ന് യുവതിയുടെ ബന്ധുക്കള് ആരോപിക്കുന്നു.
റുഖിയ ഫറാ യാരോ എന്ന സ്ത്രീയാണ് കൊല്ലപ്പെട്ടത്. പര്ദ്ദ ധരിക്കാന് തീവ്രവാദികള് ഇവരോട് ആവശ്യപ്പെട്ടിരുന്നു. എന്നാല് റുഖിയ അതിന് തയ്യാറായില്ല. പിന്നീട് തിരിച്ചെത്തിയ തീവ്രവാദികള് ഇവരെ വീട്ടിന് പുറത്തേക്ക് പിടിച്ചുകൊണ്ടുവന്ന് വെടിവച്ച് കൊല്ലുകയായിരുന്നത്രെ.
എന്നാല് അല് ഷബാബ് താവ്രവാദികള് ഇക്കാര്യം നിഷേധിച്ചിട്ടുണ്ട്. തെക്കന് സൊമലിയയില് തങ്ങള്ക്ക് സ്വാധീനമുള്ള മേഖലയില് അല്ല യുവതി താമസിച്ചിരുന്നത് എന്നാണ് തീവ്രവാദികള് നല്കുന്ന വിശദീകരണം.
ബിബിസിയാണ് ഈ വാര്ത്ത റിപ്പോര്ട്ട് ചെയ്തിരിക്കുന്നത്. പേര് വെളിപ്പെടുത്തില്ലെന്ന് ഉറപ്പില് മാത്രമാണത്രെ ചില ബന്ധുക്കള് ഇക്കാര്യം വെളിപ്പെടുത്തിയത്.
സൊമാലിയയില് അല് ഷബാബ് തീവ്രവാദ സംഘം മതപരമായ കടുത്ത നിര്ദ്ദേശങ്ങളാണ് നല്കിയിരിക്കുന്നത്. സ്ത്രീകള്ക്കും പുരുഷന്മാര്ക്കും വസ്തിരധാരണത്തിന് മാര്ഗ്ഗ നിര്ദ്ദേശങ്ങളുണ്ട്. ഇത് ലംഘിക്കുന്നവര്ക്ക് കടുത്ത ശിക്ഷയും നല്കും.
അല് ഷബാബ് ഗ്രൂപ്പില് തന്നെ ഭിന്നിപ്പുണ്ടെന്നാണ് ബിബിസി റിപ്പോര്ട്ട് ചെയ്യുന്നത്. സംഘടനിയെല ഒരു വിഭാഗമാണ് കൊലക്ക് പിന്നിലെന്ന് സംശയിക്കുന്നതായും ബിബിസി റിപ്പോര്ട്ട് ചെയ്യുന്നു.