പാകിസ്താനില് പഞ്ചനക്ഷത്ര ഹോട്ടലിലേക്ക് കുതിച്ച് കയറി ഭീകരര്, വെടിവെപ്പ് തുടരുന്നു!!
ഇസ്ലാമാബാദ്: പാകിസ്താനിലെ ബലൂചിസ്താന് പ്രവിശ്യയിലെ പഞ്ചനക്ഷത്ര ഹോട്ടലില് ഭീകരാക്രമണം. തുറമുഖ നഗരമായ ഗ്വാദറിലെ പേള് കോണ്ടിനെന്റല് ഹോട്ടലിലാണ് ആക്രമണം ഉണ്ടായത്. ആയുധമേന്തിയ മൂന്ന് ഭീകരര് പഞ്ചനക്ഷത്ര ഹോട്ടലിലേക്ക് ഇരച്ചുകയറുകയായിരുന്നു. ഹോട്ടലില് വെടിവെപ്പ് തുടരുകയാണ്. ഭീകരരുമായി സൈന്യം പോരാട്ടത്തിലാണ്. അതേസമയം വെടിയൊച്ച കേട്ടതായി സമീപപ്രദേശത്തുള്ളവരും വ്യക്തമാക്കി.
അതേസമയം ഹോട്ടലിലെ താമസക്കാരെ മുഴുവന് സുരക്ഷിതമായി ഒഴിപ്പിച്ചിട്ടുണ്ട്. ഭീകരര് ആയുധങ്ങളുമായിട്ടാണ് ഇരച്ച് കയറിയതെന്ന് വാര്ത്താ ഏജന്സികള് റിപ്പോര്ട്ട് ചെയ്യുന്നു. ഭീകരാക്രമണത്തില് ആരെങ്കിലും കൊല്ലപ്പെട്ടോ എന്ന കാര്യം ഇതുവരെ സ്ഥിരീകരിച്ചിട്ടില്ല. സൈന്യത്തില് നിന്ന് കൂടുതല് വിവരങ്ങളും പുറത്തുവന്നിട്ടില്ല. പാക് മാധ്യമങ്ങള് ഹോട്ടലിലെ താമസക്കാരെ ഒഴിപ്പിച്ചെന്ന് റിപ്പോര്ട്ട് ചെയ്തിട്ടുണ്ട്.
ഹോട്ടലിലെ ഒരു നിലയില് ഭീകരര് നിലയുറപ്പിച്ചതായും, വൈകീട്ട് 5 മണിയോടെയാണ് ഇവര് ഹോട്ടലിലേക്ക് ഇരച്ചുകയറിയതെന്നും റിപ്പോര്ട്ടുകളുണ്ട്. അതേസമയം ചൈനയുടെ സഹായത്തോടെ പ്രവര്ത്തിക്കുന്ന ഗ്വാദര് തുറമുഖ മേഖലയിലാണ് ഭീകരാക്രമണം നടന്നിരിക്കുന്നത്. അതേസമയം ഭീകരര്ക്കെതിരെ സൈന്യം അതിശക്തമായി തിരിച്ചടി കൊണ്ടിരിക്കുകയാണ്.
ചൈന-പാകിസ്താന് സാമ്പത്തിക ഇടനാഴിയുടെ ഭാഗമാണ് ഗ്വാദര് തുറമുഖം. നേരത്തെ തന്നെ ഈ തുറമുഖത്തെ പറ്റി ചൈനയ്ക്ക് ആശങ്കകളുണ്ടായിരുന്നു. ഒന്നാം നിലയിലാണ് ഭീകരര് ഉള്ളതെന്ന് നാവിക സേന പറയുന്നു. അതേസമയം വിദേശികളെ മുഴുവന് ഹോട്ടലില് നിന്ന് സുരക്ഷിതമായി മാറ്റിയതായി പാകിസ്താന് അവകാശപ്പെട്ടു.
യുപിയില് 5 ഘട്ടത്തില് മുന്നിലെത്തി ബിജെപി.... 40 സീറ്റിലേക്ക് കുതിപ്പ്, രണ്ട് ഘട്ടം നിര്ണായകം