ട്രംപിന് കനത്ത നിരാശ; മരിയ കൊറിന മച്ചാഡോയ്ക്ക് സമാധാനത്തിനുള്ള നൊബേൽ

സമാധാനത്തിനുള്ള നോബൽ സമ്മാനം മരിയ കൊറിന മച്ചാഡോയ്ക്കിന്. നോർവീജിയൻ നോബൽ കമ്മിറ്റി ചെയർമാൻ യോർഗൻ വാറ്റ്ൻ ഫ്രൈഡ്നെസ് ആണ് പുരസ്കാര പ്രഖ്യാപനം നടത്തിയത്. വെനസ്വേലയിലെ ജനാധിപത്യ പ്രക്ഷോഭങ്ങളുടെ മുന്നണി പോരാളിയാണ് മരിയ. വെനസ്വേലൻ സമൂഹത്തെ സൈനികവൽക്കരിക്കാനുള്ള നീക്കത്തെ അവർ ശക്തമായി എതിർത്തുവെന്നും ജനാധിപത്യത്തിലേക്കുള്ള സമാധാനപരമായ മാറ്റങ്ങളെ നിരന്തരം പിന്തുണച്ചുവെന്നും അക്കാദമി അഭിപ്രായപ്പെട്ടു.

രാജ്യത്തെ പ്രതിപക്ഷത്തെ ഒന്നിപ്പിക്കുന്നതിൽ അവർ നിർണായക പങ്കുവഹിച്ചു. കഴിഞ്ഞ ഒരു വർഷമായി ഒളിവിൽ കഴിയേണ്ടി വന്നിട്ടും മഷാഡോ വെനസ്വേലയിൽ തന്നെ തുടരാൻ തീരുമാനിച്ചത് ദശലക്ഷക്കണക്കിന് ആളുകൾക്ക് പ്രചോദനമായി. മച്ചാഡോ വെനസ്വേലയിലെ പ്രതിപക്ഷത്തെ ഒന്നിപ്പിച്ചു. വെനസ്വേലൻ സമൂഹത്തിൻ്റെ സൈനികവൽക്കരണത്തെ ചെറുക്കുന്നതിൽ അവർ ഒരിക്കലും പിന്നോട്ട് പോയില്ല. ജനാധിപത്യത്തിലേക്കുള്ള സമാധാനപരമായ മാറ്റത്തെ അവർ ഉറച്ചു പിന്തുണച്ചു', അക്കാദമി വ്യക്തമാക്കി. സമാധാന നൊബേൽ സ്വപ്നം കണ്ടിരുന്ന യുഎസ് പ്രസിഡന്റ് ഡൊണാൾഡ് ട്രംപിനെ സംബന്ധിച്ച് കടുത്ത തിരിച്ചടിയായിരിക്കുകയാണ് പ്രഖ്യാപനം.

വെനസ്വേലൻ പ്രതിപക്ഷ നേതാവും ദേശീയ അസംബ്ലി അംഗവുമായ മരിയ കൊറീന മചാഡോ 2002ലാണ് രാഷ്ട്രീയത്തിൽ പ്രവേശിക്കുന്നത്.പിന്നീട് വെന്റെ വെനസ്വേല പാർട്ടിയുടെ ദേശീയ കോർഡിനേറ്ററായി. 2012 ൽ പ്രസിഡന്റ് തിരഞ്ഞെടുപ്പിൽ മത്സരിച്ചെങ്കിലും പരാജയം രുചിച്ചു. 2014 ൽ മഡുറോ സർക്കാരിനെതിരായ പ്രക്ഷോഭങ്ങളിൽ മചാഡോ മുൻനിരപ്പോരാളിയായി.

മച്ചാഡോയുടെ നേതൃത്വം വെനസ്വേലയിലെ ഭിന്നിച്ചുനിന്ന പ്രതിപക്ഷത്തെ ഒരു ഏകീകൃത ശക്തിയായി മാറ്റുന്നതിൽ നിർണായക പങ്കുവഹിച്ചു. 2024-ലെ പ്രസിഡൻ്റ് സ്ഥാനാർത്ഥിത്വത്തിൽ നിന്ന് ഭരണകൂടം അവരെ തടഞ്ഞെങ്കിലും, തന്ത്രപരമായ സമീപനത്തിലൂടെ അവർ പ്രതികരിച്ചു. എഡ്മുണ്ടോ ഗോൺസാലസ് ഉറൂട്ടിയയ്ക്ക് പിന്തുണ പ്രഖ്യാപിക്കുകയും, വോട്ടെടുപ്പിൻ്റെ സുതാര്യത ഉറപ്പാക്കാൻ ലക്ഷക്കണക്കിന് സന്നദ്ധപ്രവർത്തകരെ അണിനിരത്തുകയും ചെയ്തു.അക്രമ ഭീഷണികൾ നിലനിന്നിട്ടും, വോട്ടെടുപ്പ് ഫലങ്ങളിൽ കൃത്രിമം നടത്തുന്നതിന് മുൻപായി, പൗരന്മാർ പോളിംഗ് സ്റ്റേഷനുകളിൽ കാവൽനിൽക്കുകയും ഫലങ്ങൾ രേഖപ്പെടുത്തുകയും ചെയ്തു. ഇത് മച്ചാഡോയുടെ നേതൃത്വത്തിൻ്റെ വിജയമായി കണക്കാക്കപ്പെടുന്നു.

വെനസ്വേലയിലെ സ്വേച്ഛാധിപത്യ ഭരണം ദശലക്ഷക്കണക്കിന് ആളുകളെ ദാരിദ്ര്യത്തിലേക്ക് തള്ളിവിടുകയും ഏകദേശം 8 ദശലക്ഷം പൗരന്മാരെ പലായനം ചെയ്യാൻ നിർബന്ധിക്കുകയും ചെയ്തു. എന്നിരുന്നാലും, മച്ചാഡോ രാജ്യത്ത് തുടർന്നു, പലപ്പോഴും ഒളിവിൽ കഴിയേണ്ടി വന്നിട്ടുപോലും. ജീവന് ഭീഷണിയുണ്ടായിട്ടും രാജ്യത്ത് തുടരാനുള്ള അവരുടെ തീരുമാനം ഒരു രാഷ്ട്രത്തെ പ്രചോദിപ്പിക്കുകയും ലോകമെമ്പാടുമുള്ള പ്രശംസ പിടിച്ചുപറ്റുകയും ചെയ്തു. സമാധാനപരമായ ചെറുത്തുനിൽപ്പിൻ്റെ ശക്തിയുടെ ജീവിക്കുന്ന ഉദാഹരണമായി അവർ മാറി.

ലാറ്റിൻ അമേരിക്കയിൽ സിവിലിയൻ ധീരതയുടെ അസാധാരണമായ ഉദാഹരണങ്ങളിലൊന്നായി മച്ചാഡോയെ നോബൽ സമാധാന സമ്മാന സമിതി അംഗീകരിച്ചു. രാജ്യങ്ങൾക്കിടയിൽ സൗഹൃദം വളർത്തുക, സമാധാനം മുന്നോട്ട് കൊണ്ടുപോകുക, ജനാധിപത്യ ആശയങ്ങൾ പ്രചരിപ്പിക്കുക തുടങ്ങിയ ആൽഫ്രഡ് നോബൽ വിഭാവനം ചെയ്ത തത്വങ്ങളെ അവരുടെ പ്രവർത്തനം ഉൾക്കൊള്ളുന്നുവെന്ന് സമിതി പറഞ്ഞു.