ഇന്ത്യയിൽ നിന്ന് വാക്സിൻ എടുത്തവർക്ക് നേരിട്ട് മടങ്ങാനാവില്ല: നിലപാട് വ്യക്തമാക്കി യുഎഇ

Updated: Sunday, August 8, 2021, 20:20 [IST]

ദുബായ്: യുഎഇയിലേക്ക് പോകുന്നതിന് പ്രവാസികൾക്ക് ഉണ്ടായിരുന്ന യാത്രാ തടസ്സത്തിന് താൽക്കാലിക പരിഹാരമായെങ്കിലും വിലക്ക് പൂർണ്ണമായി നീങ്ങിയിട്ടില്ല. യുഎഇ അംഗീകരിച്ച കൊവിഡ് വാക്സിന്റെ രണ്ട് ഡോസുകളും സ്വീകരിച്ചവർക്ക് ഇന്ത്യയടക്കമുള്ള രാജ്യങ്ങളിൽ നിന്നുള്ള താമസവിസയുണ്ടെങ്കിൽ യുഎഇയിലേക്ക് മടങ്ങിയെത്താമെന്നായിരുന്നു യുഎഇ കഴിഞ്ഞ കഴിഞ്ഞ ദിവസം പുറത്തിറക്കിയ അറിയിപ്പ്. എന്നാൽ യുഎഇയിൽ വെച്ച് കൊവിഡ് വാക്സിന്റെ രണ്ട് ഡോസും സ്വീകരിച്ചവർക്ക് മാത്രമാണ് ഇപ്പോൾ തിരിച്ചുപോകാൻ അനുമതി ലഭിച്ചിട്ടുള്ളത്.

യുഎഇ അംഗീകരിച്ചിട്ടുള്ള വാക്സിൻ ഇന്ത്യയിൽ നിന്ന് സ്വീകരിച്ചിട്ടുള്ളവരെ അടുത്ത ഘട്ടത്തിൽ മാത്രമാണ് പരിഗണിക്കുകയുള്ളൂ എന്നാണ് പുറത്തുവരുന്ന വിവരം. യുഎഇ ദുരന്ത നിവാരണ സമിതി പുറത്തിറക്കിയ ഉത്തരവിൽ ഇത് സംബന്ധിച്ച അവ്യക്തത ഉണ്ടായിരുന്നു. എന്നാൽ വിമാന കമ്പനികൾക്ക് നൽകിയ നിർദേശത്തിലാണ് യുഎഇ അധികൃതർ ഇക്കാര്യം കൂടുതൽ വിശദീകരിച്ചിട്ടുള്ളത്. ഇതോടെ യുഎഇയിൽ നിന്ന് കൊവിഡ് വാക്സിന്റെ രണ്ട് ഡോസും സ്വീകരിച്ച യുഎഇ താമസ വിസയുള്ളവർക്കാണ് രാജ്യത്തേക്ക് മടങ്ങിപ്പോകാൻ കഴിയുകയെന്ന് വ്യക്തമായിട്ടുണ്ട്. ആഗസ്റ്റ് അഞ്ച് മുതൽ ഈ മാനദണ്ഡങ്ങൾ പാലിക്കുന്നവർക്ക് യുഎഇയിലേക്ക് മടങ്ങിപ്പോകാൻ സാധിക്കും. രണ്ടാത്തെ ഡോസ് വാക്സിൻ സ്വീകരിച്ച് 14 ദിവസം പിന്നിട്ടവരായിരിക്കണമെന്നും നിർദേശമുണ്ട്.

അങ്കമാലി ഡയറീസിലെ പെപ്പേ വിവാഹിതനാകുന്നു; നടന്‍ ആന്റണി വര്‍ഗീസിന്റെ വിവാഹ നിശ്ചയ ചിത്രങ്ങള്‍ കാണാം

നിലവിൽ യുഎഇയിൽ ജോലി ചെയ്യുന്ന ഡോക്ടർമാർ, നഴ്സുമാർ, ടെക്നീഷ്യൻമാർ എന്നിവരടക്കമുള്ള ആരോഗ്യപ്രവർത്തകർക്കും സർവ്വകലാശാലകൾ, രാജ്യത്തെ കോളേജുകൾ, മറ്റ് വിദ്യാഭ്യാസ സ്ഥാപനങ്ങൾ, എന്നിവിടങ്ങളിൽ ജോലിയുള്ളവർ, വിദ്യാർത്ഥികൾ, മാനുഷിക പരിഗണന ലഭിക്കേണ്ട സാധുവായ വിസയുള്ളവർ എന്നീ വിഭാഗങ്ങളിൽപ്പെട്ടവർക്കും ഈ മാസം അഞ്ച് മുതൽ യുഎഇയിലേക്ക് മടങ്ങിയെത്താം. ഡോക്ടർമാർ, നഴ്സുമാർ, അധ്യാപകർ എന്നിവർക്ക് വാക്സിനേഷൻ സംബന്ധിച്ച ചട്ടം നിർബന്ധമല്ലെന്നും യുഎഇ അധികൃതർ വ്യക്തമാക്കിയിട്ടുണ്ട്.

യാത്രാ വിലക്കിൽ ഇളവ് നൽകിയതോടെ യുഎഇയിയിലെ പ്രമുഖ വിമാന കമമ്പനികളായ ഇത്തിഹാദും എമിറേറ്റ്സും ടിക്കറ്റ് ബുക്കിംഗ് ആരംഭിച്ചിട്ടുണ്ട്. എയർ ഇന്ത്യയുടെ ടിക്കറ്റ് ബുക്കിംഗ് സംബന്ധിച്ച് ആഗസ്റ്റ് നാലിന് രാത്രിയോടെ വ്യക്തത കൈവരുമെന്നാണ് വിവരം. എന്നാൽ ഇന്ത്യയിലെ മറ്റ് സ്വകാര്യ വിമാന കമ്പനികളിൽ നിന്നുള്ള വിവരങ്ങൾ ലഭ്യമായിട്ടില്ല. ഇന്ത്യയ്ക്ക് പുറമേ, നേപ്പാൾ, ശ്രീലങ്ക, പാകിസ്താൻ, നെജീരിയ, ഉഗാണ്ട എന്നീ രാജ്യങ്ങളിൽ നിന്നുള്ളവർക്കുള്ള വിലക്കാണ് യുഎഇ കഴിഞ്ഞ ദിവസം നീക്കിയത്.