ഗര്ഭിണിയായ ഭാര്യയെ കൊന്നു തിന്ന മുതലയെ കൊന്ന് ഭര്ത്താവ് പകവീട്ടി
കംപാല: ഭാര്യയുടെ ഘാതകനായ മുതലയെ ഭര്ത്താവ് കൊന്നു. ഗര്ഭിണിയായിരുന്ന ഭാര്യയെ ജീവനോടെ തിന്ന മുതലയെയാണ് ഭര്ത്താവ് കൊന്നത്. ഉഗാണ്ടയിലെ നവായികോകെ തീരത്താണ് സംഭവം. മത്സ്യബന്ധന തൊഴിലാളിയായ 56കാരാനാണ് തന്റെ ഭാര്യയുടെ ഘാതകനായ മുതലയെ കൊന്നത്. ആയിരം കിലോയോളം ഭാരമുള്ള മുതല മുന്പ് ആറ് സ്ത്രീകളെ കൊലപ്പെടുത്തിയിരുന്നു.
ഒരു മാസത്തിനപ്പുറം തങ്ങള്ക്ക് പിറക്കാന് പോകുന്ന കുഞ്ഞിനെപ്പറ്റിയുള്ള മധുര പ്രതീക്ഷകളില് കഴിയുകയായിരുന്ന ദമ്പതികളുടെ ജീവിത്തിലേയ്ക്കാണ് മുതല പേടി സ്വപ്നമായി എത്തിയത്. ദമേതേരീയ നാബ്രി (56)യും ഭാര്യയും ക്യോഗ തടാകത്തിന് സമീപമാണ് താമസിയ്ക്കുന്നത്. കാട്ടിലേയ്ക്ക് വിറക് ശേഖരിയ്ക്കാന് പോയ നാബ്രിയുടെ ഭാര്യ പിന്നീട് തിരിച്ച് വന്നതേയില്ല. ഗര്ഭിണിയെ തിരഞ്ഞെത്തിയ നാട്ടുകാര്ക്ക് തടാകക്കരയില് നിന്നും ലഭിച്ചത് അവരുടെ രക്തം പുരണ്ട വിരലുകളും മൊബൈല് ഫോണും മാത്രമായിരുന്നു.
തടാകക്കരയില് വച്ച് മുന്പും സ്ത്രീകളെ കൊന്ന് തിന്ന മുതല തന്നെ യുവതിയെ കൊന്നുവെന്ന് നാട്ടുകാര് ഉറപ്പിച്ചു. ഭാര്യയെയും പിറക്കാന് പോകുന്ന കുഞ്ഞിനെയും കൊന്ന ക്രൂരനായ മുതലയോടുള്ള നാബ്രിയുടെ പക ഇരട്ടിച്ചു. ആയുധങ്ങളും കരുതി ഭാര്യയുടെ ഘാതകനെ തിരഞ്ഞ് നാബ്രി തടാകത്തിലെത്തി. ഒടുവില് അതിസാഹസികമായി മുതലയെ കൊന്നു. ഒരു ഹീറോയെപ്പോലെയാണ് ഗ്രാമീണര് നാബ്രിയെ വാഴ്ത്തുന്നത്.
7.75 മീറ്റര് നീളവും ആയിരം കിലോ ഭാരവുമുണ്ട് മുതലയ്ക്ക്. നാബ്രിയുടെ ഭാര്യയെ കൊന്ന മുതല ഇത് തന്നെയാണെന്ന് വൈല്ഡ് ലൈഫ് അധികൃതര് പറഞ്ഞു. മുന്പ് അതേ മുതല കാട്ടിലേയ്ക്ക് വിറക് ശേഖരിയ്ക്കാന് പോയ ആറ് സ്ത്രീകളേയും കുട്ടികളേയും കൊന്നുവെന്ന് ഗ്രാമീണര് പറയുന്നു.