മാളിലെ എസ്കലേറ്ററില് പര്ദ്ദ കുരുങ്ങി;അമ്മയുടെ കൈയിലുണ്ടായിരുന്ന കുഞ്ഞ് താഴെ വീണ് മരിച്ചു,വീഡിയോ
കുഞ്ഞിനെയും എടുത്ത് എസ്കലേറ്ററിലൂടെ താഴേക്ക് ഇറങ്ങുന്നതിനിടെയായിരുന്നു അപകടം.
താഷ്ക്കന്റെ: ഷോപ്പിംഗ് മാളിലെ എസ്കലേറ്ററില് പര്ദ്ദ കുരുങ്ങി വഴുതി വീണ യുവതിയുടെ കൈയിലുണ്ടായിരുന്ന കുഞ്ഞ് താഴെ വീണ് മരിച്ചു. ഉസ്ബെക്കിസ്ഥാനിലെ അന്ദിജാന് നഗരത്തിലെ ഓസ്ബെഗിം ഷോപ്പിംഗ് സെന്ററിലാണ് ദാരുണമായ സംഭവമുണ്ടായത്.
കുഞ്ഞിനെയും എടുത്ത് എസ്കലേറ്ററിലൂടെ താഴേക്ക് ഇറങ്ങുന്നതിനിടെയായിരുന്നു അപകടം.വലതുകൈ കൊണ്ടായിരുന്നു അമ്മ കുഞ്ഞിനെ എടുത്തിരുന്നത്. എസ്കലേറ്ററിലൂടെ താഴോട്ട് ഇറങ്ങുന്നതിനിടയിലാണ് സ്ത്രീ ധരിച്ചിരുന്ന പര്ദ്ദ എസ്കലേറ്ററില് കുടുങ്ങിയത്.
തുടര്ന്ന് വഴുതിവീണ സ്ത്രീയുടെ കൈയിലുണ്ടായിരുന്ന കുഞ്ഞ് 40 അടിയോളം താഴോട്ട് വീഴുകയായിരുന്നു.താഴെ വീണ കുഞ്ഞിനെ ഷോപ്പിംഗ് മാളിലെ ഉദ്യോഗസ്ഥര് ഉടന് ആശുപത്രിയിലെത്തിച്ചെങ്കിലും രക്ഷിക്കാനായില്ല. ഷോപ്പിംഗ് സെന്ററിലെ സിസിടിവി ക്യാമറയില് പതിഞ്ഞ ദൃശ്യങ്ങളാണ് ഇപ്പോള് സമൂഹമാധ്യമങ്ങളില് പ്രചരിക്കുന്നത്.