വിശ്വസുന്ദരിപ്പട്ടം മിസ് വെനസ്വേല ഗബ്രീല ഇസ്ലറിന്
മോസ്കോ: 2013 ലെ വിശ്വസുന്ദരിയെ തിരഞ്ഞെടുത്തു. മോസ്കോയില് നടന്ന മത്സരത്തില് വെനസ്വേലയിലെ സുന്ദരിയായ ഗബ്രീല ഇസ്ലാറാണ് വിശ്വസുന്ദരിയുടെ കരീടം ചൂടിയത്. 85 രാജ്യങ്ങളിലെ മത്സരാര്ത്ഥികളില് നിന്നാണ് ഗബ്രീല ഇസ്ലാര് വിശ്വസുന്ദരിയായി തിരഞ്ഞെടുക്കപ്പെട്ടത്.
സ്പെയിന് സുന്ദരിയായ പട്രീഷിയ യുറീന റോഡ്രിഗസാണ് ഒന്നാം റണ്ണറപ്പ്. ഇക്വഡോറിലെ സുന്ദരിയായ കോണ്സ്റ്റന്സ് ബെയ്സ് രണ്ടാം റണ്ണറപ്പായി തിരഞ്ഞെടുക്കപ്പെട്ടു. ഇന്ത്യന് സുന്ദരി മാനസി മൊഗെ അവാസന പത്ത് പേരില് ഇടം പിടിച്ചെങ്കിലും അവസാന അഞ്ചില് ഉള്പ്പെടാന് കഴിഞ്ഞില്ല.
വെനി വിഷ്വല് ടിവി നെറ്റ് വര്ക്കില് ജോലി ചെയ്യുകയാണ് ഇസ്ലര്. ജീവിതത്തിലെ ഏറ്റവും കടുപ്പമേറിയ ജോലി ഏതാണെന്ന് ചോദിച്ചാല് ഈ ഇരുപത്തിയഞ്ചുകാരി പറയും മാതൃത്വമാണെന്ന്. മിസ് എലഗന്സ് പുരസ്കാരത്തിനും അര്ഹയായത് ഗബ്രേല തന്നെ.
2012ലെ വിശ്വസുന്ദരിയായിരുന്ന മിസ് യുഎസ്എ ഒലിവിയ കള്പ്പോയ വിശ്വസുന്ദരിപ്പട്ടം ഗബ്രീല ഇസ്ലാറിനെ അണിയിച്ചു. കഴിഞ്ഞ വര്ഷം 88 രാജ്യങ്ങളില് നിന്നുള്ള സുന്ദരികളില് നിന്നായിരുന്നു ഒലിവിയ കള്പ്പോയെ തിരഞ്ഞെടുത്തത്. വെനസ്വലയിലേക്ക് വീണ്ടും വിശ്വ സുന്ദരിപ്പട്ടം എത്തിച്ചതിന് വെനസ്വേലന് പ്രസിഡന്റ് നിക്കോളാസ് മാഡോര് ട്വിറ്ററിലൂടെ ഇസ്ലറെ അഭിനന്ദിച്ചു.