'ഞങ്ങളാണ് ഇൻസ്റ്റാഗ്രാമിലെ ഏറ്റവും പ്രശസ്തരായ ജോഡി'; ജി7 വേദിയിൽ വീണ്ടും 'മെലോഡി' തരംഗം

ആഗോള രാഷ്ട്രീയ വേദിയിലെ ഏറ്റവും ജനപ്രിയമായ ഒരു സൗഹൃദം വീണ്ടും സോഷ്യൽ മീഡിയയെ ഇളക്കി മറിക്കുകയാണ്. ഫ്രാൻസിലെ എവിയാൻ-ലെ-ബെയ്ൻസിൽ നടക്കുന്ന ജി7 ഉച്ചകോടിയുടെ വേദിയിൽ ഇന്ത്യൻ പ്രധാനമന്ത്രി നരേന്ദ്ര മോദിയും ഇറ്റാലിയൻ പ്രധാനമന്ത്രി ജോർജിയ മെലോണിയും തമ്മിൽ നടന്ന രസകരമായ ഒരു സംഭാഷണമാണ് ഇപ്പോൾ നവമാധ്യമങ്ങളിൽ വീണ്ടും 'മെലോഡി' തരംഗം സൃഷ്ടിക്കുന്നത്. ലോക നേതാക്കൾ ഒത്തുകൂടിയ വേദിയിൽ പരസ്പരം കൈകൊടുത്തു അഭിവാദ്യം ചെയ്യുന്നതിനിടയിലാണ് ഇരുവരും തമ്മിൽ സോഷ്യൽ മീഡിയയിലെ തങ്ങളുടെ പ്രശസ്തിയെക്കുറിച്ച് സംസാരിച്ചത്.

ദൃശ്യങ്ങളിലെ ഓഡിയോ പൂർണ്ണമായി വ്യക്തമല്ലെങ്കിലും, തങ്ങൾ സോഷ്യൽ മീഡിയയിൽ ഉണ്ടാക്കുന്ന തരംഗത്തെക്കുറിച്ച് നരേന്ദ്ര മോദി മെലോണിയോട് സംസാരിക്കുന്നത് കാണാം. ഇതിന് മറുപടിയായി ചിരിച്ചുകൊണ്ട് മെലോണി പറഞ്ഞ വരികളാണ് ഇപ്പോൾ നെറ്റിസൺസ് ഏറ്റെടുത്തിരിക്കുന്നത്. "അതെ, നമ്മളാണ് ഇപ്പോൾ ഇൻസ്റ്റാഗ്രാമിലെ ഏറ്റവും പ്രശസ്തമായ ജോഡി" എന്നായിരുന്നു മെലോണിയുടെ മറുപടി. യുഎസ് പ്രസിഡന്റ് ഡൊണാൾഡ് ട്രംപ് അടക്കമുള്ള ലോക നേതാക്കൾക്കൊപ്പം പരമ്പരാഗത ഗ്രൂപ്പ് ഫോട്ടോ എടുക്കുന്നതിന് തൊട്ടുമുൻപായിരുന്നു ഈ രസകരമായ സംഭവം.

HUGE 🚨 Meloni tells PM Modi after their viral "Melody" toffee post hit 10 million Instagram likes.

"Nice to see you again. We are the most famous on Instagram." 😅🔥 pic.twitter.com/SUhRnb10UD

— News Algebra (@NewsAlgebraIND) June 16, 2026

കുറച്ചു ആഴ്ചകൾക്ക് മുൻപ് റോം സന്ദർശനവേളയിൽ പ്രധാനമന്ത്രി മോദി മെലോണിക്ക് പാർലെയുടെ 'മെലഡി' മിഠായി സമ്മാനമായി നൽകിയതിന്റെ പശ്ചാത്തലത്തിലാണ് ഈ പുതിയ കൂടിക്കാഴ്ചയെന്നത് കൗതുകം കൂട്ടുന്നു. തങ്ങളുടെ പേരുകൾ ചേർത്തുവെച്ച് സോഷ്യൽ മീഡിയ ഉണ്ടാക്കിയ പേരിനെ വളരെ തമാശരൂപേണയാണ് ഇരു നേതാക്കളും കാണുന്നത്. മിഠായി പാക്കറ്റുമായി ഇരുവരും പൊട്ടിച്ചിരിക്കുന്ന വീഡിയോ അന്ന് മെലോണി തന്നെ പങ്കുവെച്ചിരുന്നു.

2023-ലെ ഉഭയകക്ഷി ചർച്ചകൾക്ക് പിന്നാലെയാണ് 'മെലോഡി' എന്ന വാക്ക് ഇന്റർനെറ്റിൽ തരംഗമാകാൻ തുടങ്ങിയത്. പിന്നീട് 2024-ൽ മെലോണി മോദിക്കൊപ്പമുള്ള സെൽഫി പങ്കുവെച്ചുകൊണ്ട് "ഹായ് ഫ്രണ്ട്സ്, ഫ്രം #Melodi" എന്ന് കുറിച്ചിരുന്നു. 2025 ജൂണിലെ ജി7 ഉച്ചകോടിയിലും "ഹലോ ഫ്രം മെലോഡി ടീം" എന്ന അടിക്കുറിപ്പോടെ മറ്റൊരു സെൽഫി വീഡിയോയും അവർ പങ്കുവെക്കുകയുണ്ടായി.

വെറും സോഷ്യൽ മീഡിയ സൗഹൃദത്തിനപ്പുറം ഇന്ത്യയും ഇറ്റലിയും തമ്മിലുള്ള നയതന്ത്ര, സാമ്പത്തിക ബന്ധങ്ങളും ഇപ്പോൾ മികച്ച രീതിയിലാണ് മുന്നോട്ട് പോകുന്നത്. മിഡിൽ ഈസ്റ്റ് വഴി ഇന്ത്യയെ യൂറോപ്പുമായി ബന്ധിപ്പിക്കുന്ന സാമ്പത്തിക ഇടനാഴിയുടെ പ്രധാന പങ്കാളിയാണ് ഇറ്റലി. ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം നിലവിൽ 16.77 ബില്യൺ ഡോളർ കടന്നിട്ടുണ്ട്. കഴിഞ്ഞ മാസം റോമിലെ പ്രശസ്തമായ കൊളോസിയം സന്ദർശിച്ച ഇരു നേതാക്കളും ആഗോള വിഷയങ്ങളിൽ വിപുലമായ ചർച്ചകൾ നടത്തിയിരുന്നു. ഇപ്പോഴിതാ വീണ്ടും ഇന്റർനെറ്റ് ലോകത്തെ കീഴടക്കുന്നത് ജി7 വേദിയിലെ മെലോഡി ജോഡി തന്നെയാണ്.