എന്താണ് 'അബ്രഹാം ഉടമ്പടി'? അറബ് രാജ്യങ്ങളെ ഇസ്രായേലുമായി അടുപ്പിക്കാൻ ട്രംപിന്റെ നീക്കം

യുഎസ്-ഇറാൻ യുദ്ധം അവസാനിപ്പിക്കുന്നതിനുള്ള നിർണായക സമാധാന ചർച്ചകൾ പുരോഗമിക്കുന്നതിനിടയിൽ, പശ്ചിമേഷ്യയിൽ പുതിയൊരു നയതന്ത്ര നീക്കവുമായി അമേരിക്കൻ പ്രസിഡന്റ് ഡോണൾഡ് ട്രംപ്. ഇറാനുമായുള്ള യുദ്ധം അവസാനിപ്പിക്കുന്നതിനുള്ള കരാർ യാഥാർത്ഥ്യമായാൽ, യുഎഇയും ബഹ്‌റൈനും മാതൃകയാക്കിയ 'അബ്രഹാം ഉടമ്പടി'യുടെ ഭാഗമായി അറബ്-മുസ്ലിം രാജ്യങ്ങൾ ഇസ്രായേലുമായി നയതന്ത്രബന്ധം സ്ഥാപിക്കണമെന്നാണ് ട്രംപിന്റെ ആവശ്യം.

ശനിയാഴ്ച സൗദി അറേബ്യ, യുഎഇ, ഖത്തർ, പാകിസ്താൻ, തുർക്കി, ഈജിപ്ത്, ജോർദാൻ, ബഹ്‌റൈൻ എന്നീ രാജ്യങ്ങളിലെ ഭരണാധികാരികളുമായി നടത്തിയ ഫോൺ സംഭാഷണത്തിലാണ് ട്രംപ് ഈ നിർദ്ദേശം മുന്നോട്ടുവെച്ചത്. എന്നാൽ, പ്രാദേശിക നേതാക്കളിൽ നിന്ന് ഇതിനോട് അനുകൂലമായ പ്രതികരണമൊന്നും ഉടനടി ഉണ്ടായിട്ടില്ലെന്നാണ് റിപ്പോർട്ടുകൾ സൂചിപ്പിക്കുന്നത്.

എന്താണ് അബ്രഹാം ഉടമ്പടി?

അറബ് രാജ്യങ്ങളും ഇസ്രായേലും തമ്മിലുള്ള നയതന്ത്രബന്ധം പൂർണ്ണമായി പുനഃസ്ഥാപിക്കുന്നതിനായി ഒപ്പുവെച്ച ചരിത്രപരമായ കരാറുകളാണ് 'അബ്രഹാം ഉടമ്പടി'. ഡോണൾഡ് ട്രംപിന്റെ ആദ്യ ഭരണകാലത്ത്, 2020-ലാണ് അമേരിക്കയുടെ മധ്യസ്ഥതയിൽ ഈ കരാർ ഒപ്പുവെക്കുന്നത്. ട്രംപിന്റെ മരുമകൻ ജാരെഡ് കുഷ്‌നറായിരുന്നു ഈ നീക്കങ്ങൾക്ക് പിന്നിൽ പ്രവർത്തിച്ചത്.

ഈ ഉടമ്പടിയുടെ ഭാഗമായി യുഎഇ, ബഹ്‌റൈൻ, മൊറോക്കോ, സുഡാൻ എന്നീ രാജ്യങ്ങൾ ഇസ്രായേലുമായി ഔദ്യോഗികമായി നയതന്ത്ര-വ്യാപാര ബന്ധങ്ങൾ ആരംഭിച്ചു. ഇസ്രായേലിനെ ഒരു രാജ്യമായി അംഗീകരിക്കാതിരുന്ന അറബ് ലോകത്ത് വലിയൊരു മാറ്റത്തിനാണ് ഈ കരാർ തുടക്കമിട്ടത്. ഇതിൽ യുഎഇയുമായുള്ള കരാറാണ് ഇസ്രായേലിന് ഏറ്റവും വലിയ നയതന്ത്ര നേട്ടമുണ്ടാക്കിക്കൊടുത്തത്.

ഇസ്രായേലിന്റെ ആശങ്കയും ഫലസ്തീൻ നിലപാടും

ഇറാനുമായുള്ള യുദ്ധം അവസാനിപ്പിക്കാൻ 60 ദിവസത്തെ താൽക്കാലിക വെടിനിർത്തൽ ഉൾപ്പെടെയുള്ള കരാറാണ് ട്രംപ് മുന്നോട്ടുവെക്കുന്നത്. ഇതിലൂടെ ഇസ്രായേലിന് നയതന്ത്ര നേട്ടമുണ്ടാക്കിക്കൊടുക്കാൻ ട്രംപ് ശ്രമിക്കുമ്പോഴും, ഇസ്രായേൽ ഭരണകൂടം വലിയ ആശങ്കയിലാണ്. ഇറാന്റെ ആണവ പദ്ധതികളെക്കുറിച്ചോ, ബാലിസ്റ്റിക് മിസൈലുകളെക്കുറിച്ചോ, വിവിധ സായുധ ഗ്രൂപ്പുകൾക്ക് ഇറാൻ നൽകുന്ന പിന്തുണയെക്കുറിച്ചോ ട്രംപിന്റെ പുതിയ സമാധാന കരാറിൽ വ്യക്തതയില്ലെന്നാണ് ഇസ്രായേലിന്റെ ആക്ഷേപം. ഈ കരാർ ഇസ്രായേലിന്റെ താൽപ്പര്യങ്ങൾക്ക് മുൻതൂക്കം നൽകുന്നില്ല എന്ന് മുതിർന്ന ഇസ്രായേൽ ഉദ്യോഗസ്ഥർ മുന്നറിയിപ്പ് നൽകുന്നു.

അതേസമയം, ഫലസ്തീന് ഒരു സ്വതന്ത്ര രാജ്യം രൂപീകരിക്കാൻ അനുമതി നൽകാതെ ഇസ്രായേലുമായി അറബ് രാജ്യങ്ങൾ ബന്ധം സ്ഥാപിക്കുന്നത് തങ്ങളെ ഒറ്റിക്കൊടുക്കുന്നതിന് തുല്യമാണെന്നാണ് ഫലസ്തീൻ അധികൃതരുടെ നിലപാട്. നിലവിൽ സൗദി അറേബ്യ, ഖത്തർ, പാകിസ്താൻ തുടങ്ങിയ രാജ്യങ്ങൾക്ക് ഇസ്രായേലുമായി യാതൊരുവിധ ഔദ്യോഗിക നയതന്ത്ര ബന്ധവുമില്ല. ട്രംപിന്റെ പുതിയ സമ്മർദ്ദ തന്ത്രങ്ങൾക്ക് വഴങ്ങി കൂടുതൽ അറബ് രാജ്യങ്ങൾ ഇസ്രായേലുമായി കൈകോർക്കുമോ അതോ ഫലസ്തീൻ അനുകൂല നിലപാടിൽ ഉറച്ചുനിൽക്കുമോ എന്നാണ് ഇപ്പോൾ ലോകം ഉറ്റുനോക്കുന്നത്.