ലോകത്തിന് വീണ്ടും വൈറസ് ഭീതി! എബോള വ്യാപനത്തിൽ അടിയന്തരാവസ്ഥ പ്രഖ്യാപിച്ച് ലോകാരോഗ്യ സംഘടന

ആഫ്രിക്കൻ രാജ്യങ്ങളിൽ മാരകമായ എബോള വൈറസ് വ്യാപനം അതിരൂക്ഷമാകുന്ന സാഹചര്യത്തിൽ ലോകാരോഗ്യ സംഘടന അന്താരാഷ്ട്ര തലത്തിൽ ആഗോള ആരോഗ്യ അടിയന്തരാവസ്ഥ പ്രഖ്യാപിച്ചു. ഡെമോക്രാറ്റിക് റിപ്പബ്ലിക് ഓഫ് കോംഗോ, ഉഗാണ്ട എന്നീ രാജ്യങ്ങളിൽ രോഗബാധയും മരണനിരക്കും കുത്തനെ ഉയർന്നതോടെയാണ് ലോകാരോഗ്യ സംഘടനയുടെ ഈ അടിയന്തിര ഇടപെടൽ. കോംഗോയിൽ മാത്രം ഇതിനകം നൂറിലധികം മരണങ്ങളും അറുനൂറിലധികം സംശയാസ്പദമായ കേസുകളും റിപ്പോർട്ട് ചെയ്യപ്പെട്ടിട്ടുണ്ട്. ഇതിന് പിന്നാലെ ആഫ്രിക്കൻ സെന്റർ ഫോർ ഡിസീസ് കൺട്രോൾ ഭൂഖണ്ഡാന്തര ആരോഗ്യ അടിയന്തരാവസ്ഥയും പ്രഖ്യാപിച്ചിരിക്കുകയാണ്.

എന്താണ് പുതിയ എബോള ഭീഷണി?

മുൻകാലങ്ങളിൽ ഉണ്ടായ എബോള വ്യാപനങ്ങളിൽ നിന്ന് വ്യത്യസ്തമായി, ഇപ്പോഴത്തെ പടർച്ചയ്ക്ക് കാരണം എബോളയുടെ ഏറ്റവും അപൂർവ്വവും മാരകവുമായ 'ബുണ്ടിബുഗ്യോ' (Bundibugyo virus - BDBV) എന്ന വകഭേദമാണ്. നിലവിൽ ലോകത്ത് ലഭ്യമായ എബോള വാക്സിനുകളോ മറ്റ് പ്രത്യേക ചികിത്സകളോ ഈ വകഭേദത്തിനെതിരെ ഫലപ്രദമല്ല എന്നതാണ് ആരോഗ്യ ലോകത്തെ ഏറ്റവും വലിയ ആശങ്കയിലാക്കുന്നത്. രോഗബാധിതരിൽ 30 മുതൽ 50 ശതമാനം വരെയാണ് ഇതിന്റെ മരണനിരക്ക്.

രോഗബാധിതരായ മൃഗങ്ങളിൽ നിന്നോ (പ്രത്യേകിച്ച് വവ്വാലുകൾ, കുരങ്ങുകൾ), രോഗബാധിതരായ മനുഷ്യരുടെ രക്തം, മറ്റ് ശരീരദ്രവങ്ങൾ (തുമിനീര്, വിയർപ്പ്, മൂത്രം) എന്നിവയുമായുള്ള നേരിട്ടുള്ള സമ്പർക്കത്തിലൂടെയോ ആണ് ഈ വൈറസ് പടരുന്നത്.

ലക്ഷണങ്ങൾ എന്തൊക്കെ?

വൈറസ് ശരീരത്തിൽ പ്രവേശിച്ച് 2 മുതൽ 21 ദിവസത്തിനുള്ളിൽ ലക്ഷണങ്ങൾ പ്രകടിപ്പിച്ചു തുടങ്ങും. കടുത്ത പനി, കഠിനമായ ക്ഷീണം, പേശി വേദന, തലവേദന, തൊണ്ടവേദന, ഛർദ്ദി, വയറിളക്കം, ചർമ്മത്തിൽ ഉണ്ടാകുന്ന തിണർപ്പുകൾ. രോഗം മൂർച്ഛിക്കുന്ന അവസ്ഥയിൽ ആന്തരികവും ബാഹ്യവുമായ രക്തസ്രാവം .

ഉയർന്ന അപകടസാധ്യതയുള്ള രാജ്യങ്ങൾ

നിലവിൽ ഡെമോക്രാറ്റിക് റിപ്പബ്ലിക് ഓഫ് കോംഗോയിലെ ഇറ്റൂരി പ്രവിശ്യയിലാണ് രോഗവ്യാപനം ഏറ്റവും കൂടുതൽ. ഇവിടെ നിന്നും അതിർത്തി കടന്ന് ഉഗാണ്ടയിലേക്കും രോഗമെത്തിക്കഴിഞ്ഞു. സുഡാൻ, റുവാണ്ട, ബുറുണ്ടി തുടങ്ങിയ കോംഗോയുടെ അതിർത്തി പങ്കിടുന്ന അയൽരാജ്യങ്ങളും നിലവിൽ അതീവ ജാഗ്രതയിലാണ്.

ഇന്ത്യക്കാർ എന്ത് ചെയ്യണം? കേന്ദ്ര സർക്കാരിന്റെ കർശന നിർദ്ദേശം

ആഗോള അടിയന്തരാവസ്ഥ പ്രഖ്യാപിച്ചതിന് പിന്നാലെ കേന്ദ്ര ആരോഗ്യ മന്ത്രാലയം രാജ്യത്ത് കർശനമായ ജാഗ്രതാ നിർദ്ദേശം പുറപ്പെടുവിച്ചു.

യാത്രകൾ ഒഴിവാക്കുക: ആഫ്രിക്കൻ രാജ്യങ്ങളായ കോംഗോ, ഉഗാണ്ട, ദക്ഷിണ സുഡാൻ തുടങ്ങിയ ഇടങ്ങളിലേക്കുള്ള അനാവശ്യമായ യാത്രകൾ ഇന്ത്യൻ പൗരന്മാർ പൂർണ്ണമായും ഒഴിവാക്കണമെന്ന് കേന്ദ്ര സർക്കാർ നിർദ്ദേശിച്ചിട്ടുണ്ട്.

വിമാനത്താവളങ്ങളിൽ പരിശോധന ശക്തമാക്കി: ഈ രാജ്യങ്ങളിൽ നിന്നും മറ്റ് അന്താരാഷ്ട്ര കണക്റ്റിംഗ് ഫ്ലൈറ്റുകൾ വഴിയും ഇന്ത്യയിലെത്തുന്ന യാത്രക്കാരെ കർശനമായ സ്ക്രീനിംഗിന് വിധേയമാക്കും. വ്യക്തമല്ലാത്ത കാരണങ്ങളാൽ കടുത്ത പനിയുള്ളവരെ പ്രത്യേകം നിരീക്ഷിക്കും.

ആഫ്രിക്കയിലുള്ള ഇന്ത്യൻ പൗരന്മാർ ശ്രദ്ധിക്കാൻ: നിലവിൽ രോഗബാധിത പ്രദേശങ്ങളിൽ താമസിക്കുന്ന ഇന്ത്യൻ പൗരന്മാർ പ്രാദേശിക ആരോഗ്യ നിർദ്ദേശങ്ങൾ കർശനമായി പാലിക്കണം. വന്യമൃഗങ്ങളുമായുള്ള സമ്പർക്കം ഒഴിവാക്കുകയും, വ്യക്തിശുചിത്വം പാലിക്കുകയും വേണം.

ഇന്ത്യയിൽ ഇതുവരെ ഈ എബോള വകഭേദം റിപ്പോർട്ട് ചെയ്യപ്പെട്ടിട്ടില്ല എങ്കിലും ആഗോളതലത്തിലുള്ള കപ്പൽ-വിമാന ഗതാഗതങ്ങൾ വഴി രോഗം എത്താതിരിക്കാൻ എല്ലാ സംസ്ഥാനങ്ങൾക്കും കേന്ദ്ര ഭരണപ്രദേശങ്ങൾക്കും നിരീക്ഷണം ശക്തമാക്കാൻ ആരോഗ്യ മന്ത്രാലയം നിർദ്ദേശം നൽകിയിട്ടുണ്ട്.