മന്ത്രി ഇടപെട്ടു: ലോട്ടറി വിറ്റു നടന്ന ദേശീയ കായിക താരത്തിന് സർക്കാർ ജോലി!! സംഭവം കണ്ണൂരിൽ
കണ്ണൂർ: പയ്യന്നൂരിൽ ലോട്ടറി വിറ്റ് ജീവിക്കുന്ന കായിക താരം സരോജിനിക്ക് ജോലി ലഭിച്ചു. ലോക മാസ്റ്റേഴ്സ് അത്ലറ്റിക്സില് ഇന്ത്യക്ക് അഭിമാനമായ പയ്യന്നൂര് സ്വദേശിനി സരോജിനി തോലാത്തിന് മന്ത്രി ഇ.പി ജയരാജന്റ ഇടപെടലില് കണ്ണൂര് സ്പോട്സ് ഡിവിഷനിലാണ് ജോലി ലഭിച്ചത്. വാര്ഡന് കം ഇന്സ്ട്രക്ടര് തസ്തികയില് താല്ക്കാലിക അടിസ്ഥാനത്തിലാണ് നിയമനം. ദേശീയ താരമായ സരോജിനി വായ്പയെടുത്തും ലോട്ടറി വില്പന നടത്തിയുമാണ് മത്സരത്തില് പങ്കെടുത്തിരുന്നത്.
സരോജിനിയുടെ പ്രയാസം കായിക മന്ത്രി ഇപി ജയരാജന്റെ ശ്രദ്ധയില് പെടുത്തിയതിനെ തുടര്ന്നാണ് നടപടി. അടിയന്തര നടപടി സ്വീകരിക്കാന് മന്ത്രി കായിക വകുപ്പിന് നിര്ദേശം നല്കുകയായിരുന്നു. ചൈന, ബ്രസീല്, ജപ്പാന്, സിംഗപ്പൂര്, ഓസ്ട്രേലിയ, ബ്രസീല് തുടങ്ങിയ നിരവധി രാജ്യങ്ങളില് ട്രാക്കിലിറങ്ങിയ സരോജിനി 10,000, 5000, 3000 മീറ്റര് നടത്തം, 800, 1500 മീറ്റര് ഓട്ടം, 4-100, 4-400 റിലേ, 200 മീറ്റര് സ്റ്റീപ്പിള് ചെയ്സ്, ലോങ്ങ് ജമ്പ് തുടങ്ങിയവയിലാണ് മെഡല് കൊയ്തത്.